ཕྱི་ལོ་ ༢༠༡༨ ཟླ་ ༨ ཚེས་ ༣༠ རེས་གཟའ་ཕུར་བུ།
༄༅། །ཕྱི་ལོ་ ༢༠༡༨ ཟླ་ ༨ ཚེས་ ༢༩ རེས་གཟའ་ལྷག་པ་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་ཀྱི་མཉམ་འབྲེལ་ཚོགས་ཁང་ནང་གཞིས་མི་ཡོངས་ལ་གསུང་བཤད་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་ལྷོ་སྤྱི་ཆོས་འཕེལ་ཐུབ་བསྟན་ལགས་དང་། ས་གནས་འཐུས་ཚོགས་ཀྱི་ཚོགས་གཙོ་ནོར་བུ་ཚེ་རིང་ལགས། ས་གནས་འགོ་འཛིན་ཐུབ་བསྟན་ཚེ་རིང་ལགས། ས་གནས་རང་བདེན་ཚོགས་ཆུང་དང་མཉམ་འབྲེལ་སོགས་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ། དེ་བཞིན་སེར་སྐྱ་མི་མང་བཅས་ཚང་འཛོམས་ཐོག་ཀྱི་ཐོག་མར་ས་གནས་འགོ་འཛིན་ཐུབ་བསྟན་ཚེ་རིང་ལགས་ཀྱིས་ལས་བསྡོམས་སྒྲོགས་སྦྱང་གནང་།
དེ་ནས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གསུང་བཤད་གནང་དོན། དེ་རིང་རྣམ་པ་ཚོ་མཇལ་རྒྱུ་བྱུང་བར་དགའ་པོ་བྱུང་། ས་གནས་ཀྱི་སློབ་གྲྭ་འདི་ཉིད་ཉེ་ཆར་དབུས་བོད་སློབ་འཛིན་ཚོགས་ནས་རྩིས་བླངས་པར་བརྟེན་སློབ་གྲྭའི་གནས་སྟངས་སྐོར་རྟོག་ཞིབ་ཆེད་སམ་བྷོ་ཊའི་སྤྱི་ཁྱབ་འགན་འཛིན་ས་གནས་སུ་གཟིགས་སྐོར་ལ་ཕེབས་དགོས་པ་རེད། ཅེས་ངས་ཞུས་པ་ནང་བཞིན་ཕེབས་ཡོད། དེ་བཞིན་བོད་མིའི་སྒྲིག་འཛུགས་ཀྱི་ཤེས་རིག་དྲུང་ཆེ་ཀརྨ་སེངྒེ་ལགས་ཉེ་ཆར་སློབ་གྲྭར་རྟོག་ཞིབ་ཆེད་ཕེབས་པ་རེད། སློབ་གྲྭ་རྩིས་བླངས་ཟིན་སྟབས་ང་ཚོས་ཡར་རྒྱས་གཏོང་དགོས་ཀྱི་ཡོད། སློབ་གྲྭའི་དགེ་རྒན་དང་ལས་བྱེད་ཆ་ཚང་བོད་པ་ཡིན་པས། དགེ་རྒན་རྣམ་པས་ལས་འགན་ཁུར་དུ་བླངས་ཏེ་བརྩེ་བའི་སྒོ་ནས་སློབ་ཕྲུག་ཚོར་སྤུས་དག་པོ་སློབ་ཁྲིད་གནང་རྒྱུ་གལ་ཆེན་པོ་རེད། དགེ་རྒན་རྣམ་པས་སྔར་ལས་ལྷག་ལས་འགན་ཁུར་དུ་བླངས་ཏེ་སློབ་ཕྲུག་ཚོར་སློབ་ཁྲིད་གནང་གི་ཡོད་པ་གོ་ཐོས་བྱུང་། གོ་ཐོས་ལ་སློབ་གྲྭའི་ཚོགས་ཁང་དང་འཛིན་ཁང་སོགས་ཀྱི་གནས་སྟངས་སྐྱོ་བོ་ཡོད་ས་རེད། དེ་དག་བཟོ་བཅོས་གང་རྒྱག་དགོས་སྐོར་ལྟ་ན་བསམ་སོང་།
ངས་དུས་རྟག་ཏུ་ཤེས་ཡོན་གལ་ཆེ་ཤོས་ཡིན། ཞེས་ཞུ་བཞིན་ཡོད། དཔེར་ན་བཀའ་ཤག་སྐབས་ ༡༤ དང་ ༡༥ སྐབས་ལའང་ཤེས་ཡོན་གལ་ཆེ་ཤོས་རྩི་ཡི་ཡོད། དཔེར་ན་མི་ཉམ་ཐག་གཅིག་ཤེས་ཡོན་ལྡན་པ་ཞིག་ཆགས་པ་ཡིན་ན། སོ་སོ་སྒེར་དང་ཕ་མ་ཙམ་མ་ཟད། བོད་ཀྱི་རྩ་དོན་ལའང་ཕན་ཐོགས་ཐུབ་ཀྱི་ཡོད། ཤེས་ཡོན་གལ་ཆེན་པོ་ཡིན་པ་ནང་བཞིན། སློབ་གྲྭ་དང་དགེ་ལས་ཕ་མ་སོགས་གལ་ཆེན་པོ་རེད། སློབ་གྲྭ་ཡག་པོ་ཆགས་དང་མ་ཆགས་དགེ་རྒན་ལས་བྱེད་དང་ཕ་མ་ཚོར་འགན་ཡོད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དུས་རྟག་ཏུ་འཕྲོད་བསྟེན་གལ་ཆེན་པོ་རེད། ཅེས་གསུང་གི་ཡོད། དེར་བརྟེན་ཀོ་ལི་གྷལ་བོད་མིའི་གཞིས་ཆགས་སུ་རྐང་པོལ་རྩེད་ཐང་བརྒྱབ་ཐུབ་ཡོད།
དེ་བཞིན་ལུས་སྦྱོང་ཐང་ Open Gym བཟོ་ཐུབ་ཡོད། དེ་རིང་ང་ལུས་སྦྱོང་ཐང་དེའི་དབུ་འབྱེད་མཛད་སྒོར་བཅར་དགོས་ཀྱི་ཡོད། གཞན་ཡང་ལག་རྩེད་པོ་ལིའི་ཐང་གསར་རྒྱག་གི་ལས་གཞི་འགྲོ་བཞིན་ཡོད། ལས་གཞི་འདི་ཉིད་ཕྱི་ཟླ་ ༡༢ ནང་འགྲུབ་ཀྱི་ཡོད་ས་རེད། དེ་བཞིན་ལྷ་མོ་ཚོགས་པ་ཞིག་འཛུགས་རྒྱུ་བྱས་པ་རེད།
ད་ལྟའི་ཆར་ཀོ་ལི་གྷལ་བོད་མིའི་གཞིས་ཆགས་ལ་བོད་མིའི་ས་ཐོ་ལག་འཛིན་ Record of Tenancy Certificate (RTC) ཐོབ་ཡོད། ལྷོ་སྤྱི་ལས་ཁུངས་ནས་དཀའ་ལས་བརྒྱབ་པར་བརྟེན། བོད་མི་ཚོས་ཞིང་ཁ་འདེབས་པར་ཀར་ན་ཊ་ཀ་མངའ་སྡེ་གཞུང་གིས་ཡུལ་མི་དང་གཅིག་མཚུངས་སུ་བུ་ལོན་གཡར་གྱི་ཡོད། ལམ་ཁ་དང་ཚོང་ཁང་། དཔེ་མཛོད་ཁང་བཅས་འཛུགས་སྐྲུན་བྱེད་རྒྱུའི་འཆར་གཞི་ཡོད། ཅེས་དང་།
དེ་བཞིན་དབུ་མའི་ལམ་གྱི་སྲིད་བྱུས་ཀྱི་སྔ་ཕྱིའི་བྱུང་རིམ་དང་གྲུབ་འབྲས། ལྔ་དང་ལྔ་བཅུའི་འཆར་སྣང་། དཔལ་འབྱོར་ལས་ཁུངས་ཀྱི་བུན་གཡར་ལས་གཞི། སྨན་བཅོས་ལྟ་སྐྱོང་ལས་གཞི། རྡ་ས་གངས་སྐྱིད་དུ་བོད་མིའི་སྒྲིག་འཛུགས་ཀྱི་ལས་ཁུངས་ཁག་བོད་ལུགས་ལ་འགྱུར་རྒྱུ་སོགས་ཀྱི་འཛུགས་སྐྲུན་ལས་གཞི་ཁག་གི་སྐོར་གསུང་བཤད་ཞིབ་རྒྱས་གནང་ཡོད་པ་མ་ཟད། མང་ཚོགས་ཀྱི་དྲི་བར་ལན་འདེབས་ཀྱང་གནང་ཡོད་པ་བཅས།།
