ཕྱི་ལོ་ ༢༠༡༨ ཟླ་ ༨ ཚེས་ ༢ རེས་གཟའ་ཕུར་བུ།
༄༅། །འདི་ལོའི་དབྱར་ཁའི་གུང་སེང་དང་སྟབས་བསྟུན་བྱང་ཨ་རི་དང་། སུད་སི། ཁེ་ན་ཌ། ཕ་རན་སི། ཧོལ་ལེན་ཌི། པོར་ཅུ་གྷལ་བཅས་ནས་བོད་རིགས་སློབ་ཕྲུག་ཁག་གཅིག་བཞུགས་སྒར་རྡ་སར་རྟེན་གཞི་བྱས་པའི་རྡ་སྟེང་བོད་ཁྱིམ་སློབ་གྲྭར་དབྱར་ཁའི་བོད་ཀྱི་སྐད་ཡིག་དང་རིག་གཞུང་འཛིན་གྲྭའི་ཆེད་ཕེབས་ཡོད་པ་དང་། དེ་རིང་སྟེ་ཕྱི་ལོ་ ༢༠༡༨ ཟླ་ ༨ ཚེས་ ༢ ཉིན་གྱི་སྔ་དྲོ་ཆུ་ཚོད་ ༡༠ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྡ་ས་གངས་སྐྱིད་གཉའ་ཁྲི་ཚོགས་ཁང་ནང་ཡུལ་གྲུ་དེ་དག་གི་བོད་པའི་སློབ་ཕྲུག་གྲངས་ ༧༡ ཙམ་ལ་བོད་ཀྱི་ཆོས་དང་རིག་གཞུང་། དེ་བཞིན་སྐད་ཡིག་གི་གལ་གནད་རང་བཞིན་སྐོར་ངོ་སྤྲོད་གསུང་བཤད་གནང་དོན།
ཁྱེད་རང་ཚོས་རང་གི་རང་ལ་ང་སུ་རེད། ཅེས་དྲི་བ་དྲིས་མྱོང་ཡོད་དམ། ཁྱེད་རང་ཚོ་ཨ་རི་དང་ཁེ་ན་ཌ། སུད་སི་སོགས་ཀྱི་མི་སེར་ཡིན་པའི་ཆ་ནས། ཁྱེད་ཚོས་རྒྱལ་ཁབ་དེ་དག་བཀའ་དྲིན་ཆེན་པོ་ཡིན་པ་ཚོར་དགོས། ཡིན་ཡང་ཁྱེད་རང་ཚོ་བོད་པ་ཡིན་པ་ནམ་ཡང་མ་བརྗེད་པ་གནང་རོགས། ཁྱེད་རང་ཚོ་བོད་པ་ཡིན་པ་ངེས་པར་དུ་ཤེས་དགོས་པ་མ་ཟད། བོད་པ་ཡིན་པ་སྤོབས་པའང་བྱེད་དགོས། ཁྱེད་ཚོས་བོད་ཀྱི་སྐད་ཡིག་སྦྱང་རྒྱུ་ཧ་ཅང་གལ་ཆེན་པོ་རེད། རང་གི་ཕ་སྐད་བརྗེད་པའི་ཉིན་མོ་ནས་བཟུང་ཁྱེད་རང་སུ་ཡིན་མིན་ཡང་བརྗེད་འགྲོ་གི་རེད། དེར་བརྟེན་ཁྱེད་རང་ཚོས་བོད་ཀྱི་སྐད་ཡིག་དང་ནང་པའི་ལྟ་གྲུབ་སོགས་སྦྱང་རྒྱུ་ཧ་ཅང་གལ་ཆེན་པོ་རེད། ཁྱེད་རང་ཚོ་ཕལ་ཆེ་བ་ནང་པ་རེད།
ང་ཚོར་བཀའ་འགྱུར་པོ་ཏི་ ༡༠༠ དང་བསྟན་འགྱུར་པོ་ཏི་ ༢༢༥ ལྷག་བོད་ཡིག་ནང་ཡོད། དུས་རབས་ ༧ དང་ ༨ སྐབས་སུ་བོད་ཀྱི་དཔའ་བརྟུལ་རྣམ་པ་སུ་རེད། ཁྱེད་ཚོས་ཤེས་ཀྱི་ཡོད་དམ། དུས་རབས་བདུན་པ་དང་བརྒྱད་པའི་སྐབས་སུ་བོད་ཀྱི་ལོ་ཙཱ་བ་རྣམ་པ་ཚོ་བོད་ཀྱི་དཔའ་བརྟུལ་རེད། བོད་ཀྱི་རྒྱལ་པོ་རྣམ་པས་ཁོང་ཚོ་ལམ་བགྲོད་པར་དཀའ་བའི་རྒྱ་གར་འཕགས་པའི་ཡུལ་ལ་ལེགས་སྦྱར་སྐད་དང་ནང་ཆོས་སྦྱོང་བར་བཏང་སྟེ་མང་པོ་ཞིག་ལམ་བར་དུ་གྲོངས་པ་རེད།
མཐར་བོད་ཀྱི་ལོ་ཙཱ་བ་ཚོས་རྒྱ་གར་འཕགས་པའི་ཡུལ་ནས་ལེགས་སྦྱར་སྐད་སྦྱངས་ཏེ་ནང་ཆོས་བོད་སྐད་དུ་བསྒྱུར་ཡོད། དེས་བོད་མི་ཚོ་བློ་རྣོ་བ་དང་འཇོན་ཐང་ཡོད་པ་ཞིག་བསྟན་ཡོད། བོད་ལ་ཆོས་རྒྱལ་མེས་དབོན་རྣམ་གསུམ་གྱིས་གཙོས་དཔའ་འཛངས་རྟུལ་ཕོད་ཅན་གྱི་རྒྱལ་རབས་ ༤༢ བྱུང་ཡོད། ཆོས་རྒྱལ་མེས་དབོན་རྣམ་གསུམ་གྱི་སྐབས་ལ་ནང་ཆོས་ལེགས་སྦྱར་སྐད་ནས་བོད་སྐད་དུ་བསྒྱུར་ཡོད། ཅེས་སོགས་ཀྱི་གསུང་བཤད་གནང་ཡོད་པ་དང་བཅས། །
