ཕྱི་ལོ་ ༢༠༡༨ ཟླ་ ༨ ཚེས་ ༣༡ རེས་གཟའ་པ་སངས།

༄༅། །བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཨ་རིའི་མངའ་སྡེ་མི་ནི་སོ་ཊར་བྱང་ཨ་རིའི་སྐུ་ཚབ་དོན་གཅོད་ཁྱབ་ཁོངས་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༡༧ པའི་དབུ་འབྱེད་མཛད་སྒོར་ངོ་བཅར་དང་། ཨ་རིའི་མངའ་སྡེ་ལོ་སེ་ཨན་ཇེ་ལེསེ་ནང་འཛམ་གླིང་ནང་པའི་ཚོགས་ཆེན་ཞིག་ཏུ་ངོ་བཅར་ཆེད་གཞུང་འབྲེལ་ཕྱོགས་ཕེབས་གནང་ཡོད།
དེ་ཡང་ཕྱི་ཟླ་ ༩ ཚེས་ ༡ ཉིན་བྱང་ཨ་རིའི་སྐུ་ཚབ་དོན་གཅོད་ཁྱབ་ཁོངས་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༡༧ པའི་དབུ་འབྱེད་དང་དེ་གའི་ཚོགས་པ་དབུ་བརྙེས་ནས་ལོ་ངོ་ ༢༥ འཁོར་བའི་མཛད་སྒོའི་སྐུ་མགྲོན་གཙོ་བོར་དཔལ་ལྡན་བཀའ་ཤག་གི་སྐུ་ཚབ་ཏུ་ངོ་བཅར་གནང་རྒྱུ་དང་། ཕྱི་ཚེས་ ༢ ཉིན་བཙན་བྱོལ་བོད་མིའི་མང་གཙོ་དབུ་བརྙེས་པའི་དུས་དྲན་མཛད་སྒོར་ངོ་བཅར་གནང་རྗེས་ཚེས་ ༧ ནས་ ༡༠ བར་འཛམ་གླིང་ནང་པའི་ཚོགས་ཆེན་ WFB’s Forum on Buddhism and Business དུ་མགྲོན་འབོད་ཞུས་པ་ལྟར་ངོ་བཅར་གནང་རྒྱུ་ཡིན་པ་བཅས།།