ཕྱི་ལོ་ ༢༠༡༨ ཟླ་ ༧ ཚེས་ ༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༨ ཟླ་ ༧ ཚེས་ ༦ རེས་གཟའ་པ་སངས་ཉིན་ཉི་ཧོང་སྐུ་ཚབ་དོན་ཁང་གི་གོ་སྒྲིག་འོག་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་བརྒྱད་ཅུ་གྱ་གསུམ་བཞེས་པའི་སྐུའི་འཁྲུངས་སྐར་དུས་ཆེན་གྱི་ཉིན་འཛིན་བཟུང་བྱས་པའི་ཉ་འབུམ་གཅིག་ཚེ་ཐར་གཏོང་སྐབས་སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་དང་། འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག ཉི་ཧོང་ས་གནས་ཡུལ་མི་དང་སོག་པོའི་མི་རིགས། དེ་བཞིན་ས་གནས་བོད་རིགས་བཅས་མཉམ་ཞུགས་གནང་འདུག
ཕྱོགས་མཚུངས་ཕྱི་ཚེས་ ༧ ཉིན་ཉི་ཧོང་སྐུ་ཚབ་དོན་ཁང་གིས་གོ་སྒྲིག་འོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད།
དེ་ཡང་མཛད་སྒོའི་སྐུ་མགྲོན་གཙོ་བོ་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་དང་། འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག ཉི་ཧོང་གི་གྲོས་ཚོགས་འཐུས་མི་དང་གནད་ཡོད་མི་སྣ། དེ་བཞིན་ས་གནས་བོད་རིགས་བཅས་འདུ་འཛོམས་ཀྱི་ཐོག་མར་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་འཕྲིན་ཁག་གི་སྤྱི་དང་། ལྷག་པར་འདས་པའི་ལོ་ངོ་ ༣༠ ལྷག་རིང་ཚན་རིག་པ་གྲགས་ཅན་དང་ལྷན་ནང་པའི་ལྟ་གྲུབ་དང་སེམས་ཁམས་རིག་པ་སོགས་ཀྱི་སྐོར་བགྲོ་གླེང་རིམ་པ་གནང་བའི་འབྲས་བུར། ཚན་རིག་པ་མང་པོས་ནང་པའི་ཆོས་དང་། ལྷག་པར་ནང་པའི་ཚན་རིག ནང་པའི་ལྟ་གྲུབ་ཀྱི་རྣམ་གཞག་དེ་དག་ཚན་རིག་དང་ཕྱོགས་མང་པོ་ནས་མཐུན་པ་མ་ཟད། ཚན་རིག་གི་ལམ་ནས་སེམས་དང་སྲོག་གི་དཔྱད་ཞིབ་བྱེད་པར་ཡང་ཕན་ཐོགས་ཆེན་པོ་ཡོང་བཞིན་ཡོད།་ཅེས་སོགས་ཀྱི་བཀའ་སློབ་གནང་།
དེ་ནས་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་གསུང་བཤད་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་འཐབ་རྩོད་ཐོག་ལམ་སྟོན་ཡང་དག་པ་གནང་བ་དང་། མགོན་པོ་གང་ཉིད་མཆོག་གི་དབུ་ཁྲིད་འོག་ལོ་ངོ་ ༦༠ རིང་བོད་མི་རྣམས་ཀྱིས་རང་གི་རིག་གཞུང་དང་། ཆོས། སྐད་ཡིག དེ་བཞིན་ངོ་བོ་བཅས་ཉར་ཚགས་བྱེད་ཐུབ་པ་བྱུང་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྗེས་དེ་དག་ལ་འཛམ་གླིང་ཕྱོགས་ཀུན་ནས་ཡི་རངས་ཏེ་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་ཀྱིས་མཚོན་གཟེངས་བསྟོད་གྲངས་ ༡༥༠ ལྷག་དགྱེས་འབུལ་ཞུས་ཡོད།
༸སྐུ་ཚེའི་ཐུགས་བསྐྱེད་དམ་བཅའ་བཞི་སྟེ་འགྲོ་བ་མི་ལ་གཅིག་མཚུངས་ཀྱི་བདེ་སྐྱིད་བསྐྲུན་ཐབས་དང་། ཆོས་ལུགས་མཐུན་འབྲེལ། བོད་ཀྱི་ཆོས་རིག་འཛིན་སྐྱོང་སྤེལ་གསུམ། རྒྱ་གར་གནའ་རབས་ཀྱི་རིག་གཞུང་བསྐྱར་གསོ་སླད་ཐུགས་བརྩོན་ཆེ་བསྐྱེད་ཀྱིས་མཛད་འཕྲིན་ཧ་ཅང་རྒྱ་ཆེ་སྐྱོང་བཞིན་ཡོད། ཉེ་ཆར་གསར་འགྱུར་བརྒྱུད་ལམ་ཁག་གཅིག་གི་ནང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བསྙུན་གཞི་ཚབས་ཆེ་ཡོད་གནས་ཁུངས་མེད་ཀྱི་གནས་ཚུལ་སྤེལ་བ་ལྟར། ད་རེས་ཀྱི་གོ་སྐབས་འདི་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཁམས་གསལ་ཐང་ཡིན་པས་མགོན་པོ་མཆོག་ལ་དད་དམ་གཡོ་བ་མེད་པའི་གཞིས་བྱེས་བོད་མི་ཡོངས་དང་། རྒྱལ་སྤྱིའི་རྒྱ་ཆེ་མང་ཚོགས་ཚང་མ་བློ་གཡེང་རྩ་བ་ནས་མི་དགོས་པ་ཞུ་འདོད་བྱུང་།
བོད་མིའི་སྒྲིག་འཛུགས་ཀྱི་གཉིས་སྨན་དབུ་མ་ལམ་གྱི་སྲིད་བྱུས་ནི་བོད་དོན་བདེན་མཐའ་གསལ་ཐབས་ཀྱི་ཐབས་ལམ་བཟང་ཤོས་དེ་ཡིན། ཅེས་དང་། དེ་བཞིན་རྒྱ་གར་གཙོས་པའི་འཛམ་གླིང་རྒྱལ་ཁབ་འདྲ་མིན་ནས་བོད་མིའི་འཐབ་རྩོད་དང་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་ཡོད།
དེ་ནས་གྲོས་ཚོགས་འཐུས་མི་སྐུ་ཞབས་ Mr. Uto Takashi ལགས་དང་། གྲོས་ཚོགས་འཐུས་མི་ལྕམ་Ms. Ishii Mitsuko ལགས་རྣམ་གཉིས་ཀྱིས་གསུང་བཤད་གནང་ཡོད་པ་བཅས།།
