ཕྱི་ལོ་ ༢༠༡༨ ཟླ་ ༧ ཚེས་ ༤ རེས་གཟའ་ལྷག་པ།

༄༅། །ཕྱི་ལོ་ ༢༠༡༨ ཟླ་ ༧ ཚེས་ ༣ རེས་གཟའ་མིག་དམར་ཉིན་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཞོན་དང་གཞུང་འཛིན་རྙིང་ཞེན་ Conservative Party ཆབ་སྲིད་ཚོགས་པའི་གྲོས་ཚོགས་འཐུས་མི་སྐུ་ཞབས་ཊིམ་ལུབ་ཊོན་ Rt. Hon Tim Loughton ལགས་དང་། སི་ཁོ་ཊི་ཞི་ཆབ་སྲིད་ཚོགས་པའི་གྲོས་ཚོགས་ Scottish National Party འཐུས་མི་སྐུ་ཞབས་ཁིར་སི་ལའོ་ Chris Law ལགས་རྣམ་གཉིས་ལ་མཇལ་འཕྲད་གནང་ཡོད། སྐབས་དེར་སྐུ་ཚབ་དོན་གཅོད་ལགས་ཀྱིས་བོད་མིའི་སྒྲིག་འཛུགས་བཀའ་ཤག་ནས་ཕྱི་ལོ་ ༢༠༡༨ ལོ་འདི་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ནང་བཙན་བྱོལ་དུ་ཕེབས་ནས་ལོ་ ༦༠ འཁོར་གྱི་ཡོད་པ་དང་སྟབས་བསྟུན། རྒྱ་གར་གྱིས་གཙོས་པའི་བོད་མིའི་གནས་སྡོད་ཕྱི་རྒྱལ་ཡུལ་གྲུ་ཁག་གི་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འགུལ་སྤེལ་བཞིན་ཡོད་པའི་སྐོར་འགྲེལ་བརྗོད་གནང་ཡོད། གཞན་ཡང་གོ་སྐབས་དང་བསྟུན་སྐུ་ཞབས་ཊིམ་ལུབ་ཊོན་ Rt. Hon Tim Loughton མཆོག་དང་། སྐུ་ཞབས་ཁིར་སི་ལའོ་ Chris Law མཆོག་རྣམ་གཉིས་ལ་ལོ་མང་རིང་བོད་དོན་དང་བོད་མི་རྣམས་ལ་རྒྱབ་སྐྱོར་གནང་བར་ཐུགས་རྗེ་ཆེ་མཚོན་སླད་ཁ་བཏགས་དང་ཐུགས་རྗེ་ཆེ་ཞུའི་ཕྱག་རྟགས་ཕུལ་ཡོད། ཕྱོགས་མཚུངས་ཁོང་རྣམས་ཀྱི་ཕྱག་རོགས་ལའང་ཕྱག་རྟགས་ཕུལ་ཡོད།

ཨིན་ཡུལ་སྐུ་ཚབ་དོན་ཁང་ནས་ཨིན་ཡུལ་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་རིམ་ལྟར་ན། ཕྱི་ཚེས་ ༦ རེས་གཟའ་པ་སངས་ཉིན་ཨིན་ཡུལ་ནང་བསྟན་ཚོགས་ཁང་དུ་བོད་དོན་རྒྱབ་སྐྱོར་ཚོགས་པ་དང་གྲོགས་པོ་རྣམས་མགྲོན་འབོད་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་ན་དགུང་གྲངས་ ༨༣  ཕེབས་པའི་འཁྲུངས་སྐར་དུས་ཆེན་སྲུང་བརྩི་ཞུ་རྒྱུ་དང་། ཕྱི་ཚེས་ ༧ ཉིན་ཨིན་ཡུལ་དོན་ཁང་དང་སྦིར་ཊན་བོད་རིགས་ཚོགས་པ་གཉིས་མཉམ་འབྲེལ་གྱིས་གོ་སྒྲིག་འོག་ཨིན་ཡུལ་རྒྱལ་ས་ལོན་ཌོན་གྱི་ཁམ་ཌན་དུ་རྟེན་གཞི་བྱས་པའི་ཨི་རི་ཞི་བསྟི་གནས་ཁང་ irish Centre དུ་ ཉིན་གུང་ཆུ་ཚོད་ ༡༢ ནས་ ༥ བར་བོད་ཀྱི་དུས་སྟོན་གྱི་མཛད་སྒོ་འཚོགས་རྒྱུ་དང་། སྐབས་དེར་ཨིན་ཡུལ་གཞང་མང་གཉིས་ནས་འདས་པའི་ལོ་ངོ་ ༦༠ རིང་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུའི་མཚོན་སླད་བོད་ཀྱི་རིག་གཞུང་དང་འབྲེལ་བའི་སྐོར་གཟིགས་འབུལ་ཞུ་རྒྱུ་ཡིན་འདུག་པ་བཅས།།