ཕྱི་ལོ་ ༢༠༡༨ ཟླ་ ༧ ཚེས་ ༢༠ རེས་གཟའ་པ་སངས།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༧ ཚེས་ ༡༧ ནས་ ༢༤ བར་ཧོང་ཀོང་འགྲེམས་སྟོན་ལྟེ་གནས་ཚོགས་ཁང་ནང་ཕྱི་ལོ་ ༢༠༡༨ ལོའི་རྒྱལ་སྤྱིའི་དཔེ་དེབ་འགྲེམས་ཚོང་དུས་སྟོན་སྐབས་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་གི་སྟངས་འཛིན་འོག་ཡོད་པའི་གངས་ལྗོངས་དཔེ་སྐྲུན་ཁང་ནས་ཐེ་ཝན་གྱི་གཞུང་འབྲེལ་མིན་པའི་ཚོགས་པ་ཁག་གཅིག་དང་ལྷན་དུ་མཉམ་ཞུགས་ཀྱིས་བོད་དོན་ངོ་སྤྲོད་ཆེད་གངས་ལྗོངས་དེབ་ཕྲེང་ཁག་གཅིག་འགྲེམས་ཚོང་གནང་ཡོད།
དེ་ཡང་ཐེངས་འདིའི་རྒྱལ་སྤྱིའི་དཔེ་དེབ་འགྲེམས་ཚོང་ནང་གངས་ལྗོངས་དེབ་ཕྲེང་ ༣ སྟེ་རྒྱལ་སྤྱིའི་ཁྲིམས་དོན་མཁས་པས་བྲིས་པའི་༼བོད་ཀྱི་གནས་བབ།༽ཅེས་པ་དང་། གངས་ལྗོངས་དེབ་ཕྲེང་ ༡༤ སྟེ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པས་བཏོན་པའི་༼བོད་ཀྱི་རིག་གཞུང་རྩ་གཏོར་གྱི་ལོ་དྲུག་ཅུ།༽ཞེས་པ། གངས་ལྗོངས་དེབ་ཕྲེང་ ༢༨ རྒྱ་རིགས་མཁས་པ་སོགས་ཀྱིས་བྲིས་པའི་བོད་དོན་རྩོམ་ཡིག་ཕྱོགས་སྒྲིག་༼བོད་དང་རྒྱ་ནག ཧོང་ཀོང་། ཐེ་ཝན་བཅས་དབར་བགྲོ་གླེང་།༽ཞེས་པ། གངས་ལྗོངས་དེབ་ཕྲེང་ ༣༠ སྟེ་བོད་ཀྱི་བུད་མེད་རྩོམ་པ་པོ་འོད་ཟེར་ལགས་ཀྱིས་བོད་མི་དང་། ཤར་ཏུ་ཀི་སི་ཐན། རྒྱ་རིགས་སོགས་ལ་བཅར་འདྲི་གནང་བའི་དཔེ་དེབ་“མནར་མེད་ཀྱི་འཁུན་སྒྲ་”བཅས་འགྲེམས་ཚོང་གནང་ཡོད་པ་རེད།
ཐེངས་འདིའི་ཧོང་ཀོང་གི་རྒྱལ་སྤྱིའི་དཔེ་དེབ་འགྲེམས་ཚོང་ནི་སྔ་ལོ་བཞིན་ཧོང་ཀོང་ཚོང་དོན་འཕེལ་རྒྱས་ལྷན་ཁང་ནས་གཙོ་གཉེར་དང་། ཐེ་ཝན་རིག་གཞུང་ལྷན་ཁང་ནས་ཐེ་ཝན་ནང་གི་གཞུང་འབྲེལ་མིན་པའི་ཚོགས་པ་ཁག་ལ་རྒྱབ་སྐྱོར་མཐུན་འགྱུར་གནང་སྟེ་ཐེ་ཝན་གྱི་གཞུང་འབྲེལ་མིན་པའི་ཚོགས་པ་རང་དབང་དཔེ་ཚོང་ཁང་ནས་འགན་ཁུར་གོ་སྒྲིག་གནང་སྟེ་གངས་ལྗོངས་དཔེ་སྐྲུན་ཁང་ཡང་མཉམ་ཞུགས་གནང་བ་ཞིག་ཡིན་པ་རེད། སྤྱི་ལོ་ ༢༠༡༧ ལོའི་ཧོང་ཀོང་གི་རྒྱལ་སྤྱིའི་དཔེ་དེབ་འགྲེམས་ཚོང་ཐེངས་ ༢༨ ཐོག་རྒྱལ་ཁབ་དང་ས་གནས་ཁག་ ༣༧ ནས་དཔེ་སྐྲུན་ཁང་གྲངས་ ༦༧༠ ལྷག་གིས་མཉམ་ཞུགས་གནང་ཡོད་ཅིང་། མི་གྲངས་ས་ཡ་གཅིག་ལྷག་ལྷན་ཞུགས་བྱས་ཡོད་ཁོངས་རྒྱ་ནག་སྐམ་ས་ནས་ཡོང་མཁན་བརྒྱ་ཆ་དགུ་ཙམ་ཟིན་ཡོད་པ་བཅས།།
