ཕྱི་ལོ་ ༢༠༡༨ ཟླ་ ༧ ཚེས་ ༡༧ རེས་གཟའ་མིག་དམར།

༄༅། །འདི་ག་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་ངག་དབང་ཐོགས་མེད་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༧ ཚེས་ ༡༧ རེས་གཟའ་མིག་དམར་ཉིན་གྱི་སྔ་དྲོ་ཆུ་ཚོད་ ༩ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ལྡུམ་ར་བསམ་གླིང་སེར་སྐྱ་མང་ཚོགས་གཙོ་བོར་གྱུར་བའི་ལ་དྭགས་ས་གནས་འདྲ་མིན་ནས་འདུས་པའི་དད་ལྡན་རྣམས་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཀའ་དྲིན་སྩལ་བ་མ་ཟད། བྱང་སེམས་སྡོམ་པ་འབོགས་ཆོག་མཛད།

དེ་རྗེས་བསམ་གླིང་དགོན་པ་དང་རི་རྫོང་དགོན་པ་གཉིས་ཀྱིས་དབུ་ཁྲིད་དེ་ཏེ་གར་དང་གསུམ་ཡུར། ཚ་ཏི། ཁལ་གཙར། ཧ་ས་ར། པིན་ཆི་མིག་བཅས་གྲོང་གསེབ་ཁག་གི་དད་ལྡན་མང་ཚོགས་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གནས་བཅུ་དང་འབྲེལ་ནས་བརྟན་བཞུགས་བསྟར་འབུལ་ཞུས།
དེ་ཡང་ཐོག་མར་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། ཚེ་བསྲིང་རྒྱུའི་རྒྱུ་རྐྱེན་གཙོ་བོ་དེ་སེམས་ཀྱི་ཞི་བདེ་རེད་འདུག སེམས་ལ་ཞི་བདེ་ཡོད་པ་དང་དུས་རྟག་ཏུ་སེམས་ལྷོད་ལྷོད་བྱས་ནས་བསྡད་པ་ཡིན་ན། ཚེ་རིང་བར་དེས་ཕན་ཐོགས། བཀྲ་མ་ཤིས་པ་དེ་འདྲ་ཡོང་སྐབས་དེ་དག་ལ་ཕན་སེམས་སྐྱེ་རྒྱུ་དང་།

རང་བཞིན་གྱིས་མ་གྲུབ་པ་ཡིན་བསམ་པའི་སྟོང་ཉིད་ཀྱི་ལྟ་བས་རྒྱས་བཏབ་ནས་ཕྱིན་པ་ཡིན་ན། རྐྱེན་ངན་ཡོང་སྐབས་བྱང་ཆུབ་ཀྱི་སེམས་དང་སྟོང་ཉིད་སྒོམ་རྒྱུ་དེ་འདྲའི་རྐྱེན་བྱས་ཐུབ་ཚེ་རྐྱེན་ངན་ལམ་དུ་ལྷོང་པ་ཞེས་པ་དེ་ཆགས་རྒྱུ་རེད།  རྐྱེན་ངན་བྱང་ཆུབ་ཀྱི་གྲོགས་སུ་གྱུར་བ་ཞིག་ཡོང་རྒྱུ་རེད། ཚེ་སྒྲུབ་གཙོ་བོ་དེ་རེད། དེའི་ཐོག་ལ་ལྷག་པའི་ལྷ་དེ་འདྲའི་ཐོག་ནས་ཚེ་བསྲིང་བའི་ཆོ་ག་བཏོན་པ་ཡིན་ནའང་ཕན་རྒྱུ་རེད།
དེ་རིང་འདིར་ཚེའི་ལྷ་མཆོག་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བྱ་རྒྱུ་བྱས། ཞེས་བཀའ་སློབ་བསྩལ་རྗེས་ཚེ་དབང་དང་བྱམས་སེམས་སྡོམ་པ་འབོགས་ཆོག་མཛད། དེ་རྗེས་གནས་བརྟན་ཐུབ་བསྟན་རྡོ་རྗེ་མཆོག་དང་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་ལ་བརྟན་བཞུགས་བསྟར་འབུལ་ཞུས་རྗེས་བརྟན་བཞུགས་སྦྱིན་བདག་རྣམས་ལ་རིམ་བཞིན་མཇལ་ཁ་སྩལ།
དེ་ཡང་མཛད་འཆར་ལྟར་ན་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཚེས་ ༡༨ ཉིན་ནུབ་ར་སུ་མུར་ལམ་སྟོན་སློབ་གྲྭར་ཆིབས་བསྒྱུར་བཀའ་དྲིན་བསྐྱང་གནང་གིས་སློབ་གྲྭའི་ཚོགས་ཁང་གསར་པ་དབུ་འབྱེད་མཛད་རྒྱུ་མ་ཟད།

སྐུ་པར། དགའ་ལྡན་ཕོ་བྲང་།

དགེ་སློབ་ལས་བྱེད་བཅས་ཁྱོན་མི་གྲངས་ ༣༨༠ བརྒལ་བར་བླངས་དོར་བཀའ་སློབ་སྩལ་རྒྱུ་ཡིན་འདུག དེ་རྗེས་ནུབ་ར་བདེ་སྐྱིད་མི་མང་ཕོ་བྲང་དུ་ཞོགས་ཇ་བཞེས་རྗེས་མཁའ་ལམ་བརྒྱུད་གླེ་རུ་ཆིབས་སྒྱུར་བཀའ་དྲིན་བསྐྱང་རྒྱུ་ཡིན་འདུག
དེ་ཡང་ལྡུམ་ར་བསམ་གཏན་གླིང་དགོན་པ་ནི་ཐོག་མར་བླ་མ་ཚུལ་ཁྲིམས་ཉི་མ་མཆོག་གིས་ཕྱག་བཏབ་ཅིང་། བླ་མ་ཁོང་དུས་རབས་ ༡༨ ནང་བོད་མངའ་རིས་ཕྱོགས་སུ་ཕེབས་ནས་མངའ་རིའི་མཁན་པོའི་སྐུ་དྲུང་ནས་བསྙེན་རྫོགས་སྡོམ་པ་ཞུས། མཚན་ལ་ཚུལ་ཁྲིམས་ཉི་མ་ཞེས་སྲོལ། ཚུལ་ཁྲིམས་ཉི་མ་ལྟར་ཤར་བའི་རྟེན་འབྲེལ་དུ་གྲགས། དེ་རྗེས་ལ་དྭགས་སུ་ཕེབས་ནས་སྐབས་དེའི་རྒྱལ་པོ་མཆོག་སྤྲུལ་མཆོག་གི་དྲུང་ནས་འདུལ་བ་གཞིར་བཟུང་ས་ཆ་སློང་གནས་ནས་རི་རྫོང་དགོན་པ་ཐོག་མར་ཕྱག་བཏབ། དེ་རྗེས་དུས་རབས་ ༡༨ སྨད་ཙམ་ལ་ལྡུམ་རར་ཕེབས་ནས་བསམ་གཏན་གླིང་དགོན་པ་ཕྱག་བཏབ།
སྤྱིར་ལ་དྭགས་ནང་ས་དགེ་བཀའ་རྙིང་གཡུང་དྲུང་བོན་བཅས་ཀྱི་དགོན་པ་གྲགས་ཆེ་བ་ ༡༨ ཡོད་ཅིང་། དགེ་ལུགས་པའི་དགོན་པ་ནི་ཁྲིག་རྩེ་དང་པི་ཐུབ། ཀླུ་འཁྱིལ། རི་རྫོང་། བསམ་གཏན་གླིང་། གླིང་བཤད། གར་ཤ། རྟོགས་ལྡན། ཕུག་ཏལ།
བཀའ་བརྒྱུད་ནས་འབྲུག་པ་བཀའ་བརྒྱུད་དགོན་པར་མཚོན་ན་ཧེ་མི་དགོན་པ་དང་། ཅེམ་སྦྲེལ། སྟག་སྣ་དགོན་པ། ཀོར་རྫོགས། མྱོ་མ།འབྲི་གུང་བཀའ་བརྒྱུད་ལ་མཚོན་ན་ཕྱི་དབང་དགོན་པ། བླ་མ་གཡུ་རུ། ཤ་ཆུ་ཀུལ། ཤང་བཅས་ཡིན། ས་སྐྱ་དགོན་པ་གཅིག་ཡོད་པ་ནི་མང་སྤྲོ་དགོན་པ། དེ་བཞིན་རྙིང་མའི་དགོན་པ་གཅིག་ཡོད་པ་ནི་བྲག་ཐོག་དགོན་པ་ཡིན། གཡུང་དྲུང་བོན་གྱི་དགོན་པ་ནི་གཡུང་དྲུང་ལྷ་རྩེ་དགོན་བཅས་ཡིན།།