ཕྱི་ལོ་ ༢༠༡༨ ཟླ་ ༧ ཚེས་ ༡༧ རེས་གཟའ་མིག་དམར།
༄༅། །འདི་ག་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་ངག་དབང་ཐོགས་མེད་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༧ ཚེས་ ༡༦ རེས་གཟའ་ཟླ་བ་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ལྡུམ་ར་བསམ་གཏན་གླིང་དགོན་པར་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་དང་ཁྲིག་རྩེ་རིན་པོ་ཆེ་མཆོག་གིས་གཙོས་དགེ་བཤེས་བླ་སྤྲུལ་ཁག་གཅིག་དང་། གཞན་ཡང་ཆབ་སྲིད་དབུ་ཁྲིད་དང་མི་མང་སྟོང་ཕྲག་བརྒལ་བར་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་དང་། སེམས་སྐྱེས་བཀའ་བརྒྱ་མ། དེ་བཞིན་འཇམ་དཔལ་མཚན་བརྗོད་ཀྱི་ལྗགས་ལུང་སྩལ། དེ་ཡང་ཐོག་མར་ནང་ཆོས་ངོ་སྤྲོད་སྩལ་དོན། ཆོས་འདི་ལམ་དང་ལུགས་སྲོལ་ལྟ་བུ་བྱས་ནས་ཕྱིན་པ་ཡིན་ན་དེར་དེ་ཙམ་གྱི་དོན་གཉེར་དང་དོ་སྣང་བསླེབ་ཐུབ་རྒྱུ་མེད།
ཆོས་དེ་དེ་རིང་ཁ་སང་དུས་རབས་ ༢༡ ནང་འབྲེལ་བ་ཡོད་པ་གཅིག་ཡིན་ན། དེར་དོ་སྣང་བྱེད་དགོས་པ་ཞིག་ཆགས་ཡོད། སྤྱིར་ཆོས་ལུགས་ཚང་མའི་ནང་བྱམས་བརྩེའི་བསླབ་བྱ་ཡོད་པ་ལྟར་ངོས་ཀྱི་ངོས་ཤེས་ཡེ་ཤུའི་ཆོས་པ་ཁག་གཅིག་གིས་བྱམས་བརྩེའི་ཉམས་ལེན་ཧ་ལས་པ་འདུག ཕྱོགས་མཚུངས་དཔེར་ན་ཀོལ་ཀ་ཏའི་ཨ་མ་ཊེ་རེ་སར་ Mother Teresa མཚོན་ན་ཡེ་ཤུའི་ཆོས་པ་རེད། གཞན་ཕན་ཧ་ལས་པ་རེད། བྱང་ཆུབ་ཀྱི་སེམས་ཞེས་བརྗོད་ཐུབ་རྒྱུ་མ་རེད། ཤེས་རབ་ཀྱི་ཆ་ནས་བྱང་ཆུབ་ལ་དམིགས་པ་དེ་མེད་སྟབས་བྱང་ཆུབ་ཀྱི་སེམས་ཞེས་བརྗོད་མ་ཐུབ་ཀྱང་གཞན་དོན་དོན་གཉེར་གྱི་སེམས་ཤུགས་ཧ་ལས་པ་རེད། མི་མང་པོར་ཕན་ཐོགས་བྱེད་ཀྱི་ཡོད། ངོས་རང་ཁོང་ལ་མོས་པ་ཆེན་པོ་ཡོད། ཁོང་གཤེགས་རྗེས་ཁོང་གི་གནས་གཞི་ཀོལ་ཀ་ཏར་ཕྱིན་པ་ཡིན།
ཨ་མ་ལགས་ཁོང་གཤེགས་ཟིན་ཡང་རྗེས་འཇུག་ཚོས་ཧུར་ཐག་གནང་བཞིན་འདུག ཆོས་ལུགས་ཚང་མས་བྱམས་པ་དང་བརྩེ་བའི་བསླབ་བྱ་ཧ་ཅང་སྐྱོན་བཞིན་ཡོད་སྟབས་ཆོས་ལུགས་ཚང་མ་ད་ལྟའི་དུས་རབས་འདིར་དགོས་མཁོ་ཡོད་པ་ཞིག་རེད། ང་ཚོས་མཐོང་བ་མངོན་འགྱུར། ཅུང་ཟད་ལྐོག་འགྱུར། ཤིན་ཏུ་ལྐོག་འགྱུར་ཞེས་བཤད་པའི་ནང་གི་མཐོང་བ་མངོན་འགྱུར་ལ་ཚན་རིག་པས་དཔྱད་པ་ཧ་ཅང་བྱས་ནས་ང་ཚོས་མ་ཤེས་པ་དེ་འདྲ་མང་པོ་ཤོད་བཞིན་འདུག ཕན་རྒྱུ་འདུག ཏག་ཏག་ར་འཕྲོད་རྒྱུ་ཡོང་བཞིན་འདུག མཐོང་བ་མངོན་འགྱུར་ལ་དཔྱད་པ་བྱས་ནས་གཞི་ནས་ཅུང་ཟད་ལྐོག་འགྱུར་ལ་དོ་སྣང་གསར་པ་བསླེབ་རྒྱུ་ཞིག་ཆགས་ཀྱི་འདུག
དེང་སྐབས་དུས་རབས་ ༢༡ ནང་དཔལ་ནཱ་ལེནྜའི་ཆོས་རྒྱུད་འདི་དགོས་མཁོ་ཡོད་པ་ཞིག་དང་ཕན་ཐོགས་ཡོད་པ་ཞིག་ཏན་ཏན་རེད། དེར་བརྟེན་ཕྱི་ལོ་ ༡༩༦༠ ཙམ་ནས་ངོས་ཀྱིས་དགོན་པ་ཚང་མས་དཔེ་ཆ་བལྟ་དགོས་པ་འདུག བཙུན་མ་ཚོས་ཀྱང་དཔེ་ཆ་བལྟ་དགོས་ཀྱི་འདུག ཅེས་འབོད་སྐུལ་བྱས་པ་ཡིན། ཁ་སང་མི་སྐྱ་ཕོ་མོ་ཚོས་རྟགས་གསལ་བཏང་བ་རེད། གང་ལྟར་ཁྱེད་རང་ཚོ་ཧི་མཱ་ལ་ཡི་རི་རྒྱུད་ལ་སྐྱ་སེར་ཕོ་མོ་དབྱེ་བ་མེད་པར་གཞུང་ཆེན་ལ་དོ་སྣང་བྱས་ནས་སློབ་སྦྱོང་བྱེད་བཞིན་པ་འདི་ཧ་ཅང་ཡག་པོ་རེད། རྗེས་སུ་ཡི་རངས་ཡོད། ཅེས་སོགས་ཀྱི་བཀའ་སློབ་སྩལ།
གཞན་ཡང་ཐུགས་དམ་སྐོར་བཀའ་སློབ་སྩལ་དོན། ངོས་ཀྱི་ངོ་ཤེས་དབང་རྩའི་ཚན་རིག་པ་རི་ཆཌ་ཌེ་ཝི་ཌི་སན་ Richard Davidson ཁོང་གིས་ཐུགས་དམ་བཞུགས་མཁན་ལ་བརྟག་དཔྱད་བྱེད་ཆེད་ཡོ་ཆས་གཅིག་ཆེད་མངགས་རྡ་སར་བཞག་ཡོད། ཁོང་གིས་དེ་སྔ་སེར་བྱེས་གཙང་པ་ཁང་མཚན་དགེ་བཤེས་བཟོད་པ་ལགས་ཨ་རིར་གཤེགས་སྐབས་རི་ཆཌ་ཌེ་ཝི་ཌི་སན་ཝི་ཀོན་སིན་ Wisconsin སློབ་གྲྭ་ཆེན་མོའི་དགེ་རྒན་རེད། ཉེ་འགྲམ་དེར་ཡོད་སྟབས་ཁོང་ཕྱིན་པ་ཡིན་ཞེས་བརྗོད་བྱུང་། དགེ་བཤེས་བཟོད་པ་ལགས་གཤེགས་ཟིན་ཡང་སྐུ་གཟུགས་ཧ་ཅང་གསོས་ཉམས་ལྡན་པ་འདུག་ཅེས་ཁོང་ལ་ཚོར་བ་མི་འདྲ་བ་ཧ་ཅང་ཞིག་བྱུང་ཞེས་བརྗོད་བྱུང་། གླིང་རིན་པོ་ཆེ་ཐུགས་དམ་བཞུགས་སྐབས་རྡ་སའི་ཨེམ་རྗེས་བཅར་ནས་བརྟག་དཔྱད་བྱས་པ་རེད། གཤེགས་ཟིན་སྟབས་ཀླད་པའི་བྱེད་ལས་གང་ཡང་མེད་ཀྱང་སྐུ་གཟུགས་གསོས་པ་བྱས་ནས་བསྡད་པ་རེད། ཅེས་སོགས་ཀྱི་བཀའ་སློབ་སྩལ་རྗེས་ལམ་གཙོ་རྣམ་གསུམ་དང་དེ་ནས་སེམས་སྐྱེས་བཀའ་བརྒྱ་མའི་ཆོས་འབྲེལ་སྩལ་རྗེས་འཇམ་དཔལ་མཚན་བརྗོད་ཀྱི་བཤད་ལུང་བཀའ་དྲིན་སྩལ། དེ་ཡང་འཛམ་དཔལ་མཚན་བརྗོད་ཀྱི་བཤད་ལུང་དང་འབྲེལ་བཀའ་སློབ་སྩལ་དོན། འཇམ་དཔལ་མཚན་བརྗོད་ཀྱི་བཤད་ལུང་དཀོན་པོ་འདུག ༸རྒྱལ་དབང་དགེ་འདུན་རྒྱ་མཚོས་འཇམ་དཔལ་མཚན་བརྗོད་ཀྱི་འགྲེལ་ཆེན་ཞིག་བརྩམས་ཡོད། འགྲེལ་ཆེན་དེའི་བཤད་ལུང་དེ་དགེ་ལུགས་ནང་ལ་ཕལ་ཆེར་མེད་པ་འདྲ། མདོ་སྨད་ཁུལ་ལ་གཅིག་བྱས་ན་ཡོད་ཤས་ཆེ། དབུས་གཙང་ཁུལ་ལ་མི་འདུག དིལ་མགོ་མཁྱེན་བརྩེ་རིན་པོ་ཆེས་མཁྱེན་བརྩེ་ཆོས་ཀྱི་བློ་གྲོས་སྐུ་མདུན་ནས་གསན་འདུག མཁྱེན་བརྩེ་ཆོས་ཀྱི་བློ་གྲོས་གང་ནས་གསན་མིན་མི་ཤེས། དིལ་མགོ་མཁྱེན་བརྩེ་རིན་པོ་ཆེས་ཐམས་ཅད་མཁྱེན་པ་དགེ་འདུན་རྒྱ་མཚོའི་གསུང་འཇམ་དཔལ་མཚན་བརྗོད་ཀྱི་འགྲེལ་ཆེན་གྱི་བཤད་ལུང་འདུག ངོས་ཀྱིས་ཁོང་གི་དྲུང་ནས་ཞུས་པ་ཡིན། བཤད་ལུང་འདི་དཀོན་པོ་འདུག ཅེས་སོགས་བཀའ་ཆོས་སྩལ།།
