ཕྱི་ལོ་ ༢༠༡༨ ཟླ་ ༧ ཚེས་ ༦ རེས་གཟའ་པ་སངས།
༄༅། །བོད་རྒྱལ་ལོ་ ༢༡༤༥ ཕྱི་ལོ་ ༢༠༡༨ ཟླ་ ༧ ཚེས་ ༦ ཉིན་ལྷར་བཅས་སྲིད་ཞིའི་གཙུག་རྒྱན། འཛམ་གླིང་ཞི་བདེའི་དེད་དཔོན། བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་འགྲོ་བ་ལྷ་དང་བཅས་པའི་མགོན་སྐྱབས་དཔུང་གཉེན་དམ་པར་༸སྐུའི་མཚན་དཔེ་བཞད་ནས་ཕྱི་ལུགས་ལྟར་དགུང་གྲངས་ ༨༣ ལ་ཕེབས་པའི་སྐུའི་འཁྲུངས་སྐར་གྱི་སྔ་དྲོ་ཆུ་ཚོད་ ༨ ཐོག་བོད་མིའི་སྒྲིག་འཛུགས་ཀྱི་སྲི་ཞུ་བ་ཆེ་ཕྲ་དང་། རྡ་ས་ཁུལ་གྱི་ཆོས་སྡེ་ཁག་གི་དགེ་འདུན་པ། སེར་སྐྱ་མི་མང་སོགས་ནས་ལུས་ལ་ན་བཟའ་གཟབ་མཆོར་ལེགས་པར་སྤྲས་ཏེ་བཞུགས་སྒར་ལྷ་རྒྱལ་རིར་སྐུ་ཁམས་དང་མཐུན་པའི་སྐུ་རླུང་དར་འཛུགས་དང། དར་ཆེན་ཁག་ལ་ན་བཟའ་སྒྲོན་འབུལ་དང་ཆབས་ཅིག་ཁྲོ་བོ་ཁམས་གསུམ་དབང་འདུས། བསྟན་སྲུང་དམར་ནག་གཉིས་ཀྱི་སྤྱན་སྔར་སྐུ་བཅར་རྣམ་རྒྱལ་གྲྭ་ཚང་གི་དགེ་འདུན་པ་བཞིས་རྒྱགས་རྔན་ལྷ་བསངས་དང་། གནས་ཆུང་གྲྭ་ཚང་གི་དགེ་འདུན་པ་བཞིས་དཀར་ཕྱོགས་སྐྱོང་བའི་ལྷ་སྲུང་མཐུ་བོ་ཆེ་རྣམས་ཀྱི་དབུ་འཕང་དགུང་དུ་འདེགས་ཆེད་བསང་མཆོད་ཟབ་རྒྱས་དང་ལྷན་ཞལ་འདོན་གསུང་འདོན་སྐབས་མང་ཚོགས་རྣམས་མཉམ་ཞུགས་ཀྱིས་བསྟན་སྲུང་རྣམས་ལ་གཏང་རག་ཕུལ་ཏེ་༸གོང་ས་མཆོག་གི་ཐུགས་བཞེད་ལྷུན་འགྲུབ་དང་། བོད་རང་དབང་གི་བདེན་མཐའ་མྱུར་དུ་གསལ་བའི་འཕྲིན་བཅོལ་གསོལ་འདེབས་གནད་སྨིན་གནང་མཐར་ལྷ་རྒྱལ་རིའི་སྲུང་མ་དམར་ནག་གཉིས་ཀའི་མདུན་ཐང་དུ་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་ཚང་མས་སྒྲ་དབྱངས་གཅིག་འགྱུར་ཐོག ཀི་ཀི་བསྭོ་བསྭོ་ལྷ་རྒྱལ་ལོ། ཞེས་འབྲུག་སྒྲ་གྲགས་པ་ལྟར་ལན་གསུམ་འཐེན་རྗེས་སྔ་དྲོའི་ཆོས་ཕྱོགས་ཀྱི་མཛད་སྒོ་ཁག་གྲུབ།
དེ་ནས་སྔ་དྲོ་ཆུ་ཚོད་ ༡༠ ཐོག་མཛད་སྒོའི་སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་བཟའ་འབྲུ་བློན་ཆེན་སྐུ་ཞབས་ཀི་ཤན་ཀ་པུར་ Kishan Kapoor མཆོག་དང་། དམིགས་བསལ་སྐུ་མགྲོན་རྒྱ་གར་དབུས་གཞུང་གི་གྲོས་ཚོགས་འོག་མའི་འཐུས་མི་སྐུ་ཞབས་གོ་པལ་ནཱ་རཱ་ཡན་ Gopal Narayan མཆོག རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ཇཱ་ནར་དན་སིངྒ་Janardan Singh Sigriwal མཆོག དེ་བཞིན་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། ཡབ་གཞིས་སྐུ་འཁོར་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན། བོད་མི་མང་སྤྱི་འཐུས་རྣམ་པ། དྲུང་ཆེ་རྣམ་པ། སྲི་ཞུའི་ལས་བྱེད་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་འགན་འཛིན་རྣམ་པ། གཞན་ཡང་སྐུ་མགྲོན་རྣམས་བཞུགས་གྲལ་དུ་འཁོད་མཚམས་བོད་ཀྱི་ཟློས་གར་ཚོགས་པ་ནས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་འབུལ་བཞིན་པར་སྲིད་ཚབ་ཤེས་རིག་བཀའ་བློན་པདྨ་དབྱངས་ཅན མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་སྐབས་ཚང་མ་སྐུ་བཞེངས་ཀྱིས་འཕགས་བོད་གཉིས་ཀྱི་རྒྱལ་གླུ་བཏང་།
དེ་རྗེས་དཔལ་ལྡན་སྲིད་ཚབ་མཆོག་གིས་༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་རྗེས་ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་། བོད་མི་མང་སྤྱི་འཐུས་ཚོགས་གཙོ་ཚོགས་གཞོན། ཁྲིམས་ཞིབ་པ་གཞན་རྣམ་གཉིས། ཡབ་གཞིས་སྐུ་འཁོར་རྣམ་པ། བཀའ་བློན་ལས་ཟུར་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ་བཅས་ནས་རིམ་བཞིན་རྟེན་འབྱུང་མཇལ་དར་སྒྲོན་འབུལ་ཞུས། སྐབས་དེར་བོད་ཀྱི་ཟློས་གར་ཚོགས་པས་དྲུག་བཅུའི་དབྱངས་ལྡན་ཞེས་པའི་མཉམ་གཞས་བཏང་རྗེས་གསོལ་ཇ་འབྲས་སིལ་འདེགས་འབུལ་ཞུས་པ་དང་རྡ་ས་ས་གནས་འགོ་འཛིན་གྱི་གོ་སྒྲིག་འོག་བོད་ཆོལ་གསུམ་ཆིག་སྒྲིལ་ཚོགས་པས་རྟེན་འབྲེལ་མཚོན་སླད་མངར་ཟས་ Cake འདེགས་འབུལ་ཞུས།
དེ་ནས་ཕྱི་དྲིལ་རྒྱ་ཡིག་ཚན་པས་དུས་རབས་ཉེར་གཅིག་པའི་སྟོད་དུ་རྒྱ་རིགས་ཤེས་ཡོན་ཅན་གྱི་བོད་དོན་ལ་ལྟ་སྟངས་ཞེས་པའི་དཔེ་དེབ་རྒྱ་ཡིག་ནས་བོད་སྒྱུར་ཞུས་པ་དེ་ཉིད་དམིགས་བསལ་སྐུ་མགྲོན་སྐུ་ཞབས་ཇཱ་ནར་དན་སིངྒ་མཆོག་གིས་དབུ་འབྱེད་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མིའི་སྒྲིག་འཛུགས་ཀྱི་ལས་བྱེད་ལས་དོན་གཟེངས་ཐོན་གཟེངས་རྟགས་ཐོབ་མཁན་འགན་འཛིན་སྡེ་ཚན་ནས་ནང་སྲིད་ལས་ཁུངས་ཀྱི་ཟུང་དྲུང་བདུད་འདུལ་རྡོ་རྗེ་ལགས་ལ་གཟེངས་རྟགས་གནང་རྗེས་ཕྱི་དྲིལ་རྒྱ་ཡིག་ཚན་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སློབ་གྲྭ་ཁག་ལ་ཤེས་ཡོན་སློབ་སྦྱོང་བྱེད་སྒོའི་སྐོར་བསྩལ་བའི་བཀའ་སློབ་ཕྱོགས་སྒྲིག་སྟོད་ཆ་བོད་ཡིག་ནས་རྒྱ་ཡིག་ཐོག་བསྒྱུར་བ་དེ་ཉིད་དམིགས་བསལ་སྐུ་མགྲོན་སྐུ་ཞབས་གོ་པལ་ནཱ་རཱ་ཡན་མཆོག་གིས་དབུ་འབྱེད་གནང་།
དེ་རྗེས་དཔལ་ལྡན་ཁྲིམས་ཞིབ་པ་ཆེ་བ་མཆོག་གིས་ཤེས་རིག་ལས་ཁུངས་ཀྱི་སྒྲིག་ཞུགས་མིན་པའི་རིགས་གཅིག་རྐང་འཛིན་ཉམས་ཞིབ་པ་ཚེ་བརྟན་བཀྲ་ཤིས་ལགས་དང་། མཁྱེན་རབ་རྒྱ་མཚོ་ལགས་རྣམ་གཉིས་ལ་འདི་ལོར་ཆེད་རྩོམ་དང་ངག་རྒྱུགས་གཉིས་ཀར་ཚད་སོན་བྱུང་བའི་ཕྱག་འཁྱེར་གནང་གྲུབ་མཚམས་སྲིད་ཚབ་མཆོག་གིས་སྦལ་སིལ་སྐུ་ཚབ་དོན་གཅོད་ལས་ཁུངས་ནས་ཡུ་རོབ་གཞུང་མང་གཉིས་ལ་ཐུགས་རྗེ་ཆེ་ཞུའི་ལོ་སྲུང་བརྩི་ཞུ་སླད་ཡུ་རོབ་ནང་གི་གྲོང་སྡེ་ཁག་ནང་ལོ་ལྟར་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་སྐབས་བོད་ཀྱི་རྒྱལ་དར་སྒྲེང་འཛུགས་ཞུས་པའི་སྐོར་གྱི་དཔེ་དེབ་ Banned in Tibet but celebrated in the free world” Thank you Europe hoisting the Tibetan Flag ཞེས་པ་དབུ་འབྱེད་དང་སྲི་ཞུ་བ་ལས་བྱེད་ལས་རྒྱུན་ཞབས་ལོ་ ༢༥ ཧྲིལ་པོ་ལོན་པའི་ལས་བྱེད་རྒན་གྲས་ ༡༠ ལ་ལེགས་གསོའི་གཟེངས་རྟགས་ཕྱག་འཁྱེར་གནང་།
དེ་ནས་སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་བཟའ་འབྲུ་བློན་ཆེན་སྐུ་ཞབས་ཀི་ཤན་ཀ་པུར་མཆོག་གིས་འབྲས་ལྗོངས་བྱ་མ་རྟ་གསར་ཤོག་གི་རྩོམ་སྒྲིག་པ་ཟུར་པ་གཏིང་སྐྱེས་སྨུག་པ་འབར་རོ་ནུབ་པའི་ཚེ་དབང་རྟ་མགྲིན་ནས་བརྩམས་པའི་གྲངས་ངེས་ཤེས་བྱ་གཅིག་བསྡུས་ཞེས་པའི་དཔེ་དེབ་དབུ་འབྱེད་གནང་རྗེས་ཧི་མཱ་ཅལ་མངའ་སྡེའི་གཞས་པ་གྲགས་ཅན་སུ་ནིལ་ར་ན་ Sunil Rana ལགས་ཀྱིས་བཏང་བའི་གླུ་གཞས་འོད་སྡེར་སྐུ་མགྲོན་གཙོ་བོ་མཆོག་དང་སྲིད་ཚབ་མཆོག་རྣམ་གཉིས་ནས་དབུ་འབྱེད་གནང་བསྟུན་གཞས་པ་སུ་ནིལ་ལགས་ཀྱིས་གླུ་གཞས་ཞིག་བཏང་གནང་།
དེ་རྗེས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་དང་། དམིགས་བསལ་སྐུ་མགྲོན་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ཇཱ་ནར་དན་སིངྒ་མཆོག་གིས་རྒྱ་གར་གཞུང་གིས་བོད་
དེ་ནས་སྐུ་ཞབས་གོ་པལ་ནཱ་རཱ་ཡན་མཆོག་གིས་རྒྱ་གར་གཞུང་གི་བོད་ཀྱི
དེ་རྗེས་དཔལ་ལྡན་སྲིད་ཚབ་མཆོག་གིས་བཀའ་ཤག་གི་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་སྐུ་ཞབས་ཀི་ཤན་ཀ་པུར་མཆོག་གིས་གསུང་བཤད་གནང་དོན། སྤྱི་ནོར་༸གོང་ས་༸སྐྱ
སྐབས་དེར་བོད་ཀྱི་ཟློས་གར་ཚོགས་པས་གཙོས་རྡ་སའི་ཉེ་འཁྲིས་སུ་གནས་པའི་སློབ་གྲྭ་ཁག་གི་གཞས་སྣ་འཁྲབ་སྟོན་གནང་སྟེ་སྐུའི་འཁྲུངས་སྐར་དུས་ཆེན་དགའ་སྤྲོའི་རྣམ་པའི་ཁྲོད་དུ་གྲོལ་ཡོད་པ་བཅས།།
