༢༠༡༨ ཟླ་ ༧ ཚེས་ ༦ རེས་གཟའ་པ་སངས།
༄༅། །འདི་ག་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་ངག་དབང་ཐོགས་མེད་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༧ ཚེས་ ༦ རེས་གཟའ་པ་སངས་ཉིན་ལ་དྭགས་བསོད་ནམས་གླིང་གཞིས་ཆགས་སུ་རྟེན་གཞི་བྱས་པའི་ཞི་བའི་ཚལ་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་མགོན་པོ་གང་ཉིད་མཆོག་ཕྱི་ལུགས་ལྟར་དགུང་གྲངས་ ༨༣ བཞེས་པའི་༸སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་སོང་།
དེ་ཡང་བོད་སྐད་ཐོག་མཛད་རིམ་གཙོ་སྐྱོང་བ་བྱང་ཐང་འབྲེལ་མཐུད་པ་དོན་གྲུབ་རྒྱལ་པོ་ལགས་ཀྱིས་ལས་རིམ་ངོ་སྤྲོད་ཞུ་སྐབས། མཛད་སྒོའི་ཐོག་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་དང་། འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག ཁྲིག་རྩེ་རིན་པོ་ཆེ་མཆོག བློ་ཆེན་རིན་ཆེན་བཟང་པོ་མཆོག སོག་པོའི་སྐུ་ཚབ་སེར་སྨད་ཚ་བ་འོད་ཟེར་རིན་པོ་ཆེ་མཆོག་སོགས་ཕེབས་འདུག
དེ་ཡང་སྔ་དྲོ་ཆུ་ཚོད་ ༩ ཙམ་ལ་༸གོང་ས་མཆོག་གཟིམ་ཆུང་ནས་གསུང་ཆོས་ར་བར་༸ཞབས་སོར་འཁོད་མཚམས། སྣང་གསལ་ཞལ་ཕྱེ་མཛད་བསྟུན་ལ་དྭགས་བོད་ཁྱིམ་སློབ་གྲྭའི་སློབ་ཕྲུག་རྣམས་ནས་རྔ་རོལ་དང་བཅས་ཚང་མ་སྐུ་བཞེངས་ཐོག་འཕགས་བོད་གཉིས་ཀྱི་རྒྱལ་གླུ་དབྱངས་སུ་གྱེར། དེ་ནས་འཁྲུངས་ལྷ་དབྱར་གསོལ་གྱི་གླུ་གཞས་གཟིགས་འབུལ་ཞུས་རྗེས་ལ་དྭགས་ནང་ཚོགས་ཀྱི་ཚོགས་གཙོ་ཚེ་དབང་འཕྲིན་ལས་ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་།
དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་༸སྐུའི་འཁྲུངས་སྐར་གྱི་མངར་ཟས་ birthday cake ཞལ་ཕྱེ་མཛད་གྲུབ་མཚམས་ལ་དྭགས་ཡུལ་མིས་སྲོལ་རྒྱུན་གྱི་གཞས་སྣ་འཁྲབ་སྟོན་གཟིགས་འབུལ་ཞུས་རྗེས། ས་གནས་འཐུས་ཚོགས་ཀྱི་ཚོགས་གཙོ་དོན་གྲུབ་ཚེ་རིང་ལགས་ཀྱིས་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་ཞུས་གྲུབ་མཚམས་སླར་ཡང་ལ་དྭགས་ཡུལ་མིས་སྲོལ་རྒྱུན་གྱི་གཞས་སྣ་གཟིགས་འབུལ་ཞུས།
དེ་ནས་ཨན་ཇུ་མན་ཨི་མ་མི་ཡ་ཡི་ཁ་ཆེ་ཚོགས་གཙོ་སྐུ་ཞབས་ཨཤྲབ་ཨ་ལི་ Ashraf Ali ལགས་ཀྱིས་དུས་ཆེན་དང་འབྲེལ་བའི་གསུང་བཤད་གནང་རྗེས་ལ་དྭགས་ཡུལ་མིས་གཞས་སྣ་གཟིགས་འབུལ་ཞུས་བསྟུན་རྟ་དབང་བདེ་རྩ་ཚོགས་པའི་དབུ་འཛིན་སྐུ་ཞབས་མ་གླིང་མགོན་པོ་ལགས་ཀྱིས་གསུང་བཤད་གནང་། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གི་གསུང་ཆོས་ཁག་དགའ་ལྡན་ཕོ་བྲང་གསུང་འབུམ་ཕྱོགས་སྒྲིག་ཁང་ནས་ཡིག་ཐོག་ཏུ་ཕབ་སྟེ་ཕྱོགས་སྒྲིག་ཞུས་པའི་ཕྱག་དེབ་གསར་པ་ཁག་དགུ་༸གོང་ས་མཆོག་གིས་དབུ་འབྱེད་མཛད།
དེ་རྗེས་སླར་ཡང་ལ་དྭགས་ཡུལ་མིས་གཞས་སྣ་འཁྲབ་སྟོན་གཟིགས་འབུལ་ཞུས་བསྟུན་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་དེད་དཔོན་སྐུ་ཞབས་རྡོ་རྗེ་དངོས་གྲུབ་ལགས་ཀྱིས་གསུང་བཤད་གནང་རྗེས་ལ་དྭགས་བསོད་ནམས་གླིང་བོད་མི་ཚོས་སྲོལ་རྒྱུན་གྱི་གཞས་སྣ་འཁྲབ་སྟོན་གཟིགས་འབུལ་ཞུས།
དེ་རྗེས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་མཛད་སྒོའི་ཐོག་གསུང་བཤད་གནང་བ་མ་ཟད། རྒྱ་གར་གནད་ཡོད་མི་སྣ་རྣམས་ལ་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་དྲན་རྟེན་ཕྱག་རྟགས་ཕུལ་གྲུབ་བསྟུན། ལ་སྤྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་སླད་སླེ་བྱང་སེར་སྐྱ་མང་ཚོགས་ཐུན་མོང་ནས་རྒྱུ་རིན་ཆེན་གསེར་དངུལ་ལས་གྲུབ་པའི་ཆོས་ཀྱི་འཁོར་ལོ་འབུལ་ལམ་ཞུས་པར་ཐུགས་དགྱེས་བཞེས་མཛད། མཚམས་དེར་ལ་དྭགས་ཡུལ་མི་ནས་སྲོལ་རྒྱུན་གཞས་སྣ་འཁྲབ་སྟོན་གཟིགས་འབུལ་ཞུས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་བཀའ་དྲིན་སྩལ།
མཐར་ལ་སྤྱི་ཚེ་བརྟན་དབང་ཕྱུག་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས།།
