༢༠༡༨ ཟླ་ ༧ ཚེས་ ༣ རེས་གཟའ་མིག་དམར།
༄༅། །འདི་ག་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་ངག་དབང་ཐོགས་མེད་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༧ ཚེས་ ༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྡི་ལི་ནས་མཁའ་ལམ་བརྒྱུད་རྒྱ་གར་བྱང་ཕྱོགས་ལ་དྭགས་རྒྱལ་ས་སླེའི་བྷ་ཀུ་ལ་གནམ་ཐང་དུ་༸ཞབས་སོར་བདེ་བར་འཁོད་སྐབས་མངའ་སྡེའི་གྲོས་ཚོགས་འཐུས་མི་རྣམ་པ་དང་། ལ་དྭགས་ནང་པའི་ཚོགས་པ། Ladakh Buddhist Association ལ་དྭགས་རི་ལྗོངས་ཡར་རྒྱས་ལྷན་ཚོགས། Ladakh Autonomous Hill Development Council དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་དང་། སྟག་ལུང་མ་སྤྲུལ་རིན་པོ་ཆེ་མཆོག འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག ཁྲིག་རྩེ་རིན་པོ་ཆེ་མཆོག་སོགས་ཀྱིས་དབུས་བླ་སྤྲུལ་དགེ་བཤེས་རྣམ་པ་དང་། ལ་དྭགས་ཨ་མ་ཚོགས་པ། དགོན་པའི་ཚོགས་པ། All Ladakh Gonpa Association ས་གནས་རྫོང་དཔོན་དང་ཉེན་རྟོག་འགོ་དཔོན། ལ་དྭགས་ཁ་ཆེ་ཚོགས་པ། ལ་སྤྱིས་གཙོས་གཞུང་དང་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ་འཐུས་མི་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་ཡང་བྷ་ཀུ་ལ་གནམ་ཐང་ནས་མགོན་པོ་གང་ཉིད་མཆོག་ལྕོག་ལམ་གསར་ཞི་བའི་འཚལ་༸རྒྱལ་བའི་ཕོ་བྲང་དུ་ཆིབས་སྒྱུར་སྐྱོང་སྐབས་དད་ལྡན་སེར་སྐྱ་ཕོ་མོ་རྒན་གཞོན་སྟོང་ཕྲག་མང་པོས་ལག་ཏུ་དཀར་གཙང་མཇལ་དར་དང་བདུག་སྤོས། མེ་ཏོག་སོགས་ཐོགས་ནས་དགའ་དད་སྤྲོ་གསུམ་གྱི་སྒོ་ནས་ཕེབས་བསུའི་སྣེ་ལེན་གཟབ་རྒྱས་ཞུས།
དེ་རྗེས་ཞི་བའི་འཚལ་ཕོ་བྲང་དུ་སྔ་དྲོ་ཆུ་ཚོད་ ༩།༣༠ ཙམ་ལ་༸ཞབས་སོར་འཁོད་མཚམས་རི་རྫོང་རིན་པོ་ཆེ་མཆོག་གིས་མཎྡལ་རྟེན་གསུམ་འདེགས་འབུལ་ཞུས་གྲུབ་མཚམས་གསོལ་ཇ་འབྲས་བསིལ་འདེགས་འབུལ་ཞུས། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། དེ་རིང་འདིར་ལ་དྭགས་སུ་འབྱོར་ཐུབ་པར་ཧ་ཅང་ཡག་པོ་བྱུང་། ལ་དྭགས་མི་མང་དད་པ་དམ་ཚིག་གཡོ་བ་མེད་པ་རེད། ཧ་ཅང་ཡག་པོ་ཡིན། ངོས་རང་ལ་དྭགས་སུ་ཐེངས་མང་པོ་བསླེབས་པ་རེད། སྔ་མོ་འགོ་སྟོད་ཡོང་སྐབས་ཕལ་ཆེར་ལུང་པ་ཡར་རྒྱས་དེ་ཙམ་མེད། དགོན་པ་ཚོའང་དེ་ཙམ་སྤུས་དག་པོ་མེད།
བར་སྐབས་ལ་དྭགས་ཡར་རྒྱས་ཧ་ཅང་ཤུགས་ཆེན་པོ་ཕྱིན་འདུག དགོན་པ་ཚོའང་སྤུས་ཀ་དག་ཏུ་དང་སློབ་གཉེར་ཡག་ཏུ་ཕྱིན། མི་མང་གི་འཚོ་བ་ཡིན་ནའང་རེད། གང་ཅིའི་ཐོག་ལ་འཛུགས་སྐྲུན་ཡར་རྒྱས་ཕྱིན་ནས་ཧ་ཅང་ཡག་པོ་རེད་འདུག དེ་དང་ཆབས་ཅིག་སྤྱི་ཡོངས་ཀྱི་ཡུལ་པ་ཚོའང་སོ་སོའི་ཆོས་དང་རིག་གཞུང་གི་བག་ཆགས་མ་ཡལ་བ་བྱས་ནས་ཡོད་པ་འདི་ཧ་ཅང་ཡག་པོ་བྱུང་འདུག སླར་ཡང་འདིར་བསླེབས་པ་རེད། ཚང་མར་ཐུགས་རྗེ་ཆེ་ཞུ་རྒྱུ་དང་། ཚང་མར་བཀྲ་ཤིས་བདེ་ལེགས། ཁྱེད་ཚོ་ལ་དྭགས་པ་ཚོས་དུས་རྒྱུན་ཕྱག་འཚལ། ཞེས་ཟེར་སྲོལ་ཡོད་པ་ལྟར་ངོས་ཀྱིས་ཕྱག་འཚལ་ཟེར་རྒྱུ་ཡིན། དེང་སྐབས་རྡ་སར་ཆར་ཞོད་འགོ་འཛུགས་རྒྱུ་ཡིན་ནའང་། ལ་དྭགས་ཁུལ་དུ་ས་སྐམ་པོ་ཡིན་སྟབས། གྲུམ་བུའི་ནད་རིགས་ལ་ས་སྐམ་པོའི་ཕྲན་བུ་ཁྱད་པར་ཡོད་པ་ལྟ་བུ་འདུག དེར་བརྟེན་འདིར་འཁྱུག་ཙམ་སྡོད་དགོས་དྲན་བྱུང་།
འཁྲུངས་སྐར་འདིར་སྲུང་བརྩི་ཞུ་རྒྱུ་རེད། སྐབས་དེར་ང་ཚོ་སླར་ཡང་ཐུག་གི་རེད། ཁ་སང་ལྡི་ལིར་ཧི་མ་ལ་ཡ་རི་ཁུལ་ནུབ་ལ་དྭགས་ནས་ཤར་མོན་བར་གྱི་དགོན་ཁག་ཡོད་པ་དེ་དག་ཤེས་ཡོན་གྱི་བསྟི་གནས་ཁང་བཟོ་རྒྱུའི་ཚོགས་པ་ཞིག་བཙུགས་འདུག བསྔགས་བརྗོད་ཤུགས་ཆེ་བྱས་པ་ཡིན། གཞན་དགོན་པ་ཁག་བརྗོད་སྐབས་སློབ་གཉེར་དེ་ཙམ་མེད་པར་ཆོ་ག་ཕྱག་ལན་ལྟ་བུ་ཞིག་བཏོན་ནས་འགྲོ་རྒྱུ་ལྟ་བུ་ཞིག་འདུག་པ་དེས་ལུང་རྟོགས་ཀྱི་བསྟན་པ་འཛིན་སྐྱོང་སྤེལ་གསུམ་ཡོང་རྒྱུ་མེད། ཁ་སང་ལྡི་ལིར་པཱ་ལིའི་ཡུལ་གྲུ་ཁག་གི་དགེ་སློང་ཚོ་དང་དགེ་སློང་དབུ་ཁྲིད་གང་ཙམ་ཕེབས་འདུག སྐབས་དེར་ངོས་རང་མཛད་སྒོའི་རྣམ་པ་འདྲ་ཆགས་པོ་དེ་འདྲ་བྱ་རྒྱུར་དགའ་པོ་གང་ཡང་མེད། ངོས་ལ་དྲི་བ་གཅིག་ཡོད། སངས་རྒྱས་བཅོམ་ལྡན་འདས་ཀྱི་ཆོས་དེ་ལོ་ངོ་ ༢༦༠༠ ལྷག་ཕྱིན་པ་རེད།
ད་ལྟ་དུས་རབས་ ༢༡ ནང་བསླེབས་ཡོད། དུས་རབས་ ༢༡ ནང་འདིར་དགོས་མཁོ་ཡོད་དང་མེད། ཅེས་དྲི་བ་དང་པོ་འདི་ཡིན། ཞེས་ངོས་ཀྱིས་སྐབས་དེར་བརྗོད་པ་ཡིན། ངོས་ཀྱིས་དངོས་གནས་འདི་འདྲ་དྲན་གྱི་འདུག གལ་ཏེ་དུས་ཚོད་ཡོལ་ཟིན་པ་ཞིག་ཡིན་ན་དེ་ཙམ་ཇབ་མི་འདུག འཛམ་གླིང་གི་རིས་སུ་མ་ཕྱེ་བའི་ཆོས་བརྒྱུད་ཧིན་དུ་དང་ཇིའུ། ཡེ་ཤུ། ཁ་ཆེ་སོགས་ཆོས་བརྒྱུད་གཙོ་ཆེ་བ་དེ་དག་བྱམས་པ་དང་སྙིང་རྗེ། ཞེས་ཚང་མས་བཤད་ཀྱི་ཡོད། དེ་འདྲ་ཡིན་སྟབས་དུས་ད་ལྟ་ཡིན་ནའང་དགོས་མཁོ་འདུག ལྷག་པར་སངས་རྒྱས་པའི་ཆོས་ལ་མཚོན་ན་ལྟ་གྲུབ་ཐོག་ནས་དེང་སྐབས་ཚན་རིག་དང་ལྷན་དུ་ཕན་ཚུན་འབྲེལ་བ་བྱས་ནས་ཕྱོགས་གཉིས་ཀས་གོ་རྟོགས་སྤེལ་རས་བྱེད་བཞིན་ཡོད། དུས་རབས་ ༢༡ ནང་ དངོས་པོ་ཡར་རྒྱས་ཧ་ཅང་ཕྱིན་ཡོད་ཀྱང་སེམས་ཀྱི་ཡར་རྒྱས་ཕྱིན་མེད། དེར་བརྟེན་ཆོས་བརྒྱུད་ཁག་དེ་དག་དུས་ད་ལྟ་ཡིན་ནའང་དགོས་མཁོ་འདུག ཅེས་ངོས་ཀྱིས་དེ་འདྲ་བརྗོད་པ་ཡིན།
སྤྱིར་ངོས་ཀྱིས་ཆོས་ལུགས་ཚང་མར་གུས་ཞབས་བྱེད་ཀྱི་ཡོད། དེའི་ནང་ནས་སངས་རྒྱས་པའི་ཆོས་འདི་ཡག་ཤོས་རེད། ཅེས་ངོས་ཀྱིས་ནམ་ཡང་བརྗོད་ཀྱི་མེད། བཅོམ་ལྡན་འདས་རང་ལ་མཚོན་ནའང་ཉན་ཐོས་ཀྱི་ཐེགས་པ། རང་སངས་རྒྱས་ཀྱི་ཐེག་པ། ཐེག་ཆེན་ཐེག་པ་ཟེར་ནའང་མི་འདུག་བྱང་ཆུབ་སེམས་པའི་ཐེག་པ་གསུང་བཞིན་ཡོད། འདུལ་བྱའི་ཁམས་དང་མོས་པ་མི་འདྲ་བ་ཡོད་པར་བརྟེན་མི་འདྲ་བ་གསུང་བཞིན་ཡོད། ལྟ་གྲུབ་ཐོག་ནས་ཡིན་ནའང་ཤེར་ཕྱིན་གྱི་དངོས་བསྟན་སྟོང་ཉིད་ཀྱི་རིམ་པ་གཅིག་གསུང་བཞིན་ཡོད། གཞན་ཡང་དགོས་པའི་དབང་གིས་འཁོར་ལོ་མཐའ་མའི་ནང་དུ་མདོ་སྡེ་དགོངས་འབྲེལ་ལྟ་བུ་ཤེར་ཕྱིན་གྱི་དགོངས་པ་དྲང་དོན་དུ་བཀྲལ་བ་ལྟ་བུ་བཅོམ་ལྡན་འདས་རང་ཉིད་ཀྱིས་བཀའ་གནང་བ་ཞིག་རེད།
གདུལ་བྱ་མི་འདྲ་བ་ཡོད་པར་བརྟེན་གདུལ་བྱ་མི་འདྲ་བའི་ཁམས་དང་མོས་པ་མི་འདྲ་བར་ཞེ་ས་མ་ཞུས་ན་བརྩི་བཀུར་གནང་བ་ལྟ་བུ་ཞིག་རེད། ཁྱེད་ཚོས་མོས་ནའང་རེད། མ་མོས་ནའང་རེད། ལྟ་བ་མཐར་ཐུག་འདི་ཡིན། ཞེས་ཐག་བཅད་ནས་གསུང་གི་མེད། ཁམས་དང་མོས་པ་སྣ་ཚོགས་ཡིན་སྟབས་ལྟ་གྲུབ་མི་འདྲ་བ་དེ་དག་དགོས་མཁོ་ཡོད། འཇིག་རྟེན་བཀོད་པ་པོ་འདོད་མཁན་གྱི་ཆོས་བརྒྱུད། འཇིག་རྟེན་བཀོད་པ་པོ་མི་འདོད་མཁན་གྱི་ཆོས་བརྒྱུད། བདག་ཏུ་ལྟ་བ་འདོད་མཁན་དང་མི་འདོད་མཁན་གྱི་ཆོས་བརྒྱུད། དེ་དག་ལྟ་གྲུབ་མི་འདྲ་ཡང་དགོས་མཁོ་ཡོད། ཅེས་དང་།
དེ་སྔ་ཞིང་བྲན་ལམ་ལུགས་སྐབས་ཀྱི་འགྲོ་སྟངས་ཕྲན་བུ་དེང་སྐབས་དཀྱིལ་ཤར་ཡུལ་གྲུའི་ནང་དུ་ཆོས་དང་འདྲེས་ནས་འགྲོ་བཞིན་པར་བརྟེན་འཚེ་བའི་ལས་འགུལ་ཧ་ཅང་ཡོང་བཞིན་ཡོད། དེང་སྐབས་བོད་བརྒྱུད་ནང་བསྟན་ལ་མཚོན་ནའང་ཕྲན་བུ་དེ་སྔའི་ཞིང་བྲན་ལམ་ལུགས་ Feudalism ཀྱི་ལམ་སྲོལ་དང་འདྲེས་ནས་འགྲོ་བཞིན་ཡོད་པའི་རྣམ་པ་ཞིག་ཡོད་སྟབས། ད་ཆ་མང་གཙོའི་རིང་ལུགས་ཐོག་འགྲོ་བཞིན་ཡོད་པར་བརྟེན། དེ་དང་མཐུན་པ་བྱས་ནས་འགྲོ་དགོས་རྒྱུ་ཧ་ཅང་གལ་ཆེན་པོ་རེད། དེ་བཞིན་ནང་པ་སངས་རྒྱས་པའི་ཆོས་ནི་ཚད་མ་རིག་པ་དང་སེམས་ཁམས་རིག་པའི་རྣམ་གཞག་སྐོར་ཧ་ཅང་གཏིང་ཟབ་མོ་ཡོད། ཅེས་དང་།
ཕྱོགས་མཚུངས་ཁོར་ཡུག་སྐོར་བཀའ་སློབ་སྩོལ་སྐབས་ལ་དྭགས་ས་ཁུལ་རི་རྒྱུད་ཐོག་དེ་སྔ་ལྟར་གངས་མ་བབ་པ་དང་། སྔར་གངས་ཡོད་པ་རྣམས་རིམ་བཞིན་བྲི་བཞིན་ཡོད་པ་དེ་དག་གོ་ལའི་ཚ་དྲོད་རྒྱས་བཞིན་པར་བརྟེན་ནས་ཡོང་བཞིན་ཡོད་སྐོར་དང་། ༸གོང་ས་མཆོག་ད་ལྟ་༸སྐུ་གཟུགས་དྭངས་སྐྱེད་ཡིན་སྐོར་བཀའ་སློབ་སྩལ།
དེ་ཡང་མཛད་འཆར་ལྟར་ན་ཕྱི་ཟླ་ ༧ ཚེས་ ༦ ཉིན་ཞི་བའི་འཚལ་ཕོ་བྲང་དུ་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༣ བཞེས་པའི་༸སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུ་རྒྱུ་དང་། སྐབས་དེར་སླེ་བྱང་སེར་སྐྱ་མང་ཚོགས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་མཚོན་སླད་རྒྱུ་རིན་ཆེན་གསེར་དངུལ་ལས་གྲུབ་པའི་ཆོས་ཀྱི་འཁོར་ལོ་ཞིག་གཟེངས་རྟགས་སུ་འབུལ་ལམ་ཞུ་རྒྱུ་ཡིན་འདུག་པ་དང་།
ཕྱི་ཚེས་ ༡༠ ནས་ ༡༢ བར་ཞི་བའི་འཚལ་ཕོ་བྲང་དུ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་བཀའ་ཆོས་འཕྲོ་སྐྱོང་མཛད་རྒྱུ་དང་། ཕྱི་ཟླ་ ༧ ཚེས་ ༡༣ ཉིན་ཞི་བའི་འཚལ་ཕོ་བྲང་དུ་༸སྐུ་ངལ་གསོ་གནང་མཛད་རྒྱུ། ཕྱི་ཚེས་ ༡༤ ཉིན་ནུབ་ར་བདེ་སྐྱིད་ཕོ་བྲང་དུ་༸ཞབས་སོར་འཁོད་མཚམས་ཕྱི་ཚེས་ ༡༥ ཉིན་༸སྐུ་ངལ་གསོ་གནང་མཛད་རྗེས། ཕྱི་ཚེས་ ༡༦ ཉིན་བདེ་སྐྱིད་དགོན་པར་བཀའ་ཆོས་སྩལ་གནང་མཛད་རྒྱུ། ཕྱི་ཚེས་ ༡༦ ཉིན་ནུབ་ར་བསམ་གཏན་གླིང་དགོན་པར་ཆིབས་སྒྱུར་བཀའ་དྲིན་བསྐྱངས་ནས་ཕྱི་ཚེས་ ༡༨ ནས་ ༢༠ བར་དབྱར་ཆོས་ཆེན་པོར་༸ཞབས་སོར་བཀའ་དྲིན་ཆེ་གནང་མཛད་རྒྱུ་དང་། ཕྱི་ཚེས་ ༢༠ ཉིན་བསམ་གཏན་གླིང་དགོན་པར་བརྟན་བཞུགས་བསྟར་འབུལ་ཞུས་གྲུབ་བསྟུན། བདེ་སྐྱིད་དགོན་པའི་གཟིམ་ཆུང་ཕོ་བྲང་དུ་ཆིབས་སྒྱུར་བཀའ་དྲིན་བསྐྱང་རྒྱུ་ཡིན་འདུག
༸གོང་ས་མཆོག་ཐེངས་འདིར་ཀར་གྷིལ་ Kargil དང་ཟངས་དཀར་ཁུལ་དུའང་འཁྱུག་ཙམ་རིང་ཆིབས་སྒྱུར་བསྐྱང་འཆར་ཡོད་འདུག་པ་བཅས། །
