ཕྱི་ལོ་ ༢༠༡༨ ཟླ་ ༧ ཚེས་ ༢༥ རེས་གཟའ་ལྷག་པ།
༄༅། །འདི་ག་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་ངག་དབང་ཐོགས་མེད་ལགས་ཀྱིས་ས་གནས་ནས་བཏང་གནས་ནང་འཁོད་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༨ ཟླ་ ༧ ཚེས་ ༢༤ ཉིན་གྱི་སྔ་དྲོ་ལ་དྭགས་ཟངས་དཀར་ལམ་སྟོན་སློབ་གྲྭའི་དགེ་ལས་སློབ་ཕྲུག་རྣམས་ལ་བཀའ་སློབ་སྩལ་བསྟུན། སློབ་ཕྲུག་རྣམས་ཀྱིས་བདེན་ཚིག་སྨོན་ལམ་དབྱངས་སུ་གྱེར་རྗེས་མགོན་པོ་གང་ཉིད་མཆོག་གིས་སླར་ཡང་བདེན་ཚིག་སྨོམ་ལམ་གྱི་ཚིག་འགྲེལ་སྐྱོན་གནང་མཛད་པ་དང་སྦྲགས་བཀའ་སློབ་སྩལ་དོན། བདེན་ཚིག་སྨོན་ལམ་ནང་དུ་ང་ཚོས་དཀའ་ངལ་དེ་དག་མར་བཤད། དཀའ་ངལ་འཕྲད་རྒྱུའི་རྒྱུ་རྐྱེན་གཙོ་བོ་དེ་བླང་དོར་གྱི་གནས་ལ་རྨོངས་པའི་མ་རིག་པའི་དབང་གིས་ང་ཚོར་དཀའ་ངལ་འདི་འཕྲད་པ་རེད།
དེ་ལྟར་ཡིན་སྟབས་རྒྱ་རིགས་གྲོགས་པོ་ཚོའི་བླང་དོར་གྱི་གནས་ལ་རྨོངས་པའི་མི་ཤེས་པ་དེ་དག་སེལ་ནས་བོད་པའི་དཀའ་ངལ་སེལ་ཡག་ཅིག་རེད། རང་རྒྱལ་གཞན་ཕམ་ཟེར་གྱི་མེད། ང་ཚོར་དཀའ་ངལ་དེ་དག་རྨོངས་པའི་དབང་གིས་འཕྲད་པ་རེད། རྒྱ་རིགས་མང་པོ་ཞིག་བོད་ཀྱི་དངོས་ཡོད་གནས་ཚུལ་མ་ཤེས། སྤྱིར་སྟངས་མིའི་བསམ་བློའི་འགྲོ་སྟངས་དེའང་མ་ཤེས་པར་དྲག་རྩུབ་ཁོ་ན་བྱས་ནས་མིའི་བསམ་བློར་འགྱུར་བ་གཏོང་ཐུབ་རྒྱུ་རེད་བསམ་པ་དྲན་བཞིན་ཡོད། མ་ཤེས་པའི་དབང་གིས་རེད། དེའི་ཁུངས་འཁྱོལ་ཐུབ་ཐབས་མེད། དེ་རིང་ཁ་སང་གི་རྒྱ་ནག་དང་ལོ་བཞི་བཅུའི་གོང་གི་རྒྱ་ནག་དབར་འགྱུར་བ་ཧ་ཅང་ཕྱིན་ཡོད།
དེར་བརྟེན་ལེགས་ཉེས་འབྱེད་པའི་བླང་དོར་གྱི་མིག་ཐོབ་ནས་ང་ཚོ་བོད་ཀྱི་ཆོས་དང་རིག་གཞུང་འདིས་རྒྱ་ནག་ལ་ཕན་ཐོགས་རླབས་ཆེན་ཞིག་བྱེད་ཐུབ། རྒྱ་ནག་དཔལ་འབྱོར་ཡར་རྒྱས་ཧ་ཅང་འགྲོ་སྐབས་འདིར་བོད་ལ་ཚུར་དེང་རབས་ཅན་གྱི་དངོས་པོ་ཡར་རྒྱས་ཡོང་རྒྱུར་ཏན་ཏན་རྒྱ་ནག་ནས་ཚུར་ང་ཚོར་ཕན་ཐོགས་ཆེན་པོ་བྱེད་ཐུབ་རྒྱུ་ཞིག་ཡོད། དེར་བརྟེན་ལོ་རྒྱུས་ཐོག་ནས་བོད་རང་བཙན་ཡིན་ཡང་ང་ཚོས་རང་བཙན་མ་རྩོད་པར་དབུ་མའི་ལམ་ཞེས་པ་འདི་གཉིས་ཕན་གྱི་བསམ་བློར་གཞི་བཅོལ་བ་རེད།
རྒྱ་ནག་རྒྱལ་ཁབ་ལ་ཡིན་ནའང་ཕན་རྒྱུ་དང་། བོད་པ་ལ་ཡིན་ནའང་ཕན་རྒྱུ་རེད། ཅེས་བཀའ་སློབ་སྩལ་བ་དང་སྦྲགས་ལམ་སྟོན་སློབ་གྲྭའི་སྦྱིན་བདག་ཕ་རན་སི་ French མི་རིགས་ཁག་གཅིག་ལ་ཞལ་ཕྱོགས་ནས་བཀའ་སློབ་སྩལ་དོན། ངོས་རང་རྟག་ཏུ་ཡུ་རོབ་སྤྱི་མཐུན་ཚོགས་པར་ཡིད་འཕྲོག་བཞིན་འདུག འོན་ཀྱང་རྒྱ་ནག་འགོ་ཁྲིད་མཁྲེག་བཟུང་ཅན་དེ་འདྲས་དགོས་དབང་གིས་ཆེད་མངགས་ཏཱ་ལའི་བླ་མ་ཁ་བྲལ་བ་རེད། རང་བཙན་རྩོད་མཁན་རེད། ཅེས་ཟེར་བཞིན་ཡོད་ཀྱང་ང་ཚོས་རྒྱ་ནག་གི་རྩ་ཁྲིམས་ནང་འཁོད་པའི་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་ཡོད་པ་དེ་ཐོབ་ཐབས་བྱེད་བཞིན་པ་ལས་རྒྱ་ནག་དང་ཁ་བྲལ་གྱི་རང་བཙན་དགོས་ནམ་ཡང་ཟེར་གྱི་མེད་པ་འཛམ་གླིང་ཚང་མས་ཤེས་གསལ་རེད།
དེ་སྔ་ངོས་རང་ཨ་རིའི་སྲིད་འཛིན་སྐུ་ཞབས་བྷ་རག་ཨོ་བྷ་མ་མཆོག་དང་ལྷན་ཕོ་བྲང་དཀར་པོའི་ནང་མཇལ་འཕྲད་གྲུབ་མཚམས་ཕོ་བྲང་དཀར་པོ་ནས་གསར་འགོད་གསལ་བསྒྲགས་ཤིག་སྤེལ་བ་བརྒྱུད་ཨ་རིའི་སྲིད་འཛིན་མཆོག་གིས་བོད་མིའི་དབུ་མའི་ལམ་གྱི་ལངས་ཕྱོགས་དེར་མཐའ་གཅིག་ཏུ་རྒྱབ་སྐྱོར་ཡོད་པ་བསྒྲགས་ཡོད། དེར་བརྟེན་ང་ཚོས་རང་བཙན་མི་རྩོད་པ་འཛམ་གླིང་ཀུན་གྱིས་ཤེས་གསལ་རེད། སྔ་ལོ་ནས་བཟུང་རྒྱ་ནག་གཞུང་གིས་ངོས་ལ་ཐད་ཀར་སྐྱོན་བརྗོད་བྱེད་རྒྱུ་ཉུང་དུ་ཕྱིན་སོང་། ང་ཚོས་བལྟས་ཆོག ལོ་གཉིས་ཙམ་རྗེས་འགྱུར་བ་ཕལ་ཆེར་འགྲོ་རྒྱུ་རེད། ཅེས་བཀའ་སློབ་སྩལ། དེ་རྗེས་དགེ་ལས་སློབ་ཕྲུག་རྣམས་དང་ལྷན་སྐུ་པར་ལྷན་སྒྲོན་མཛད་རྗེས་༸རྒྱལ་བའི་ཕོ་བྲང་དུ་ཆིབས་སྒྱུར་བསྐྱངས།
