ཕྱི་ལོ་ ༢༠༡༨ ཟླ་ ༧ ཚེས་ ༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༨ ཟླ་ ༦ ཚེས་ ༢༩ ནས་ཕྱི་ཟླ་ ༧ ཚེས་ ༡ བར་ཉིན་གྲངས་གསུམ་རིང་རྒྱལ་སྤྱིའི་བོད་དོན་འབྲེལ་མཐུད་ཁང་ International Tibet Network གི་གོ་སྒྲིག་འོག་ཨི་ཊ་ལེ་ལྷོ་ཊེ་རོལ་རང་སྐྱོང་མངའ་ཁུལ་Autonomous Region of South Tyrol གྱི་རྒྱལ་ས་བྷོལ་ཛ་ནོའི་ Bolzano ནང་བོད་དོན་རྒྱབ་སྐྱོར་ཚོགས་པའི་ཚོགས་འདུའི་སྟེང་སུད་སི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་མཉམ་ཞུགས་གནང་ཡོད།
དེ་ཡང་བོད་དོན་རྒྱབ་སྐྱོར་ཚོགས་པའི་ཚོགས་འདུའི་དབུ་འབྱེད་མཛད་སྒོའི་ཐོག་རྒྱལ་སྤྱིའི་བོད་དོན་འབྲེལ་མཐུད་ཁང་གི་འགན་འཛིན་ལྕམ་སྐུ་ཨེ་ལེ་སན་རེ་ནོལ་ཌི་ Alison Reynolds ལགས་ཀྱིས་ཕེབས་བསུའི་གསུང་བཤད་གནང་སྐབས་ཚོགས་འདུའི་གལ་གནད་རང་བཞིན་དང་རྒྱབ་ལྗོངས་ཀྱི་གནས་ཚུལ། དེ་བཞིན་ཉིན་གསུམ་གྱི་ཚོགས་འདུའི་གྲོས་འཆར་ཁག་གི་སྐོར་འགྲེལ་བརྗོད་གནང་ཡོད།
དེ་རྗེས་རྒྱལ་སྤྱིའི་བོད་དོན་འབྲེལ་མཐུད་ཁང་གི་འགན་འཛིན་ལྷན་ཚོགས་ཀྱི་ཚོགས་གཞོན་སྐུ་ཞབས་གུན་ཐར་ཁོ་ལོག་ན་ Gunther Cologna ལགས་ཀྱིས་ཨི་ཊ་ལེ་བྷོལ་ཛ་ནོའི་ཡུ་རོབ་ཤེས་ཡོན་བསྟི་གནས་ཁང་གི་སྐོར་ངོ་སྤྲོད་གནང་གྲུབ་མཚམས་སུད་སི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས། ཚོགས་འདུ་འདིའི་ཐོག་མཉམ་ཞུགས་གནང་མཁན་ཡོངས་ནས་གྲོས་འཆར་ཁག་ལག་བསྟར་གནང་སྟེ། བོད་ཀྱི་རྩ་དོན་དེ་བཞིན་རྒྱལ་སྤྱིའི་སྡིངས་ཆའི་སྟེང་སྔར་ལས་ལྷག་ཤུགས་ཆེ་སྤེལ་རྒྱུའི་འབད་བརྩོན་གནང་དགོས་པའི་རེ་སྐུལ་ཞུས་འདུག་པ་མ་ཟད། དབུ་མའི་ལམ་དང་རང་བཙན་རྒྱབ་སྐྱོར་བ་གཉིས་ཀྱི་དབར་དབྱེ་འབྱེད་བྱེད་རྒྱུ་གལ་ཆེན་པོ་མ་ཡིན་པར། གཙོ་བོ་བོད་མི་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཐོབ་ཐབས་བྱ་རྒྱུ་དེ་ཡིན། ཞེས་གསུངས།
ཨེ་ཊ་ལི་ Casa del Tibet རོགས་ཚོགས་ཀྱི་འགན་འཛིན་འབུམ་རམས་པ་སི་ཊེ་ཧྥན་ཌ་ལ་རི་ Dr. Stefan Dallari ལགས་ཀྱིས་མགྲོན་འབོད་ཞུས་པ་ལྟར། སུད་སི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཕྱི་ཚེས་ ༡ ཉིན་ཨེ་ཊ་ལེའི་ཁ་ནོ་སཱ་ Canossa གྲོང་སྡེ་ནང་ཚོགས་པའི་རྒྱ་གར་གྱི་རོལ་དབྱངས་དུས་ཆེན་མཛད་སྒོའི་སྟེང་ཆེད་ཕེབས་གནང་།
ཐེངས་འདིའི་ཉིན་གྲངས་གསུམ་གྱི་ཚོགས་འདུའི་ཐོག་འཛམ་གླིང་གི་རྒྱལ་ཁབ་ ༡༨ ནས་ཕེབས་པའི་ཚོགས་བཅར་བ་ ༥༠ ཙམ་མཉམ་ཞུགས་གནང་ཡོད་པ་དང་བཅས། །
