ཕྱི་ལོ་ ༢༠༡༨ ཟླ་ ༧ ཚེས་ ༢༡ རེས་གཟའ་སྤེན་པ།

༄༅། །ཕྱི་ལོ་ ༢༠༡༨ ཟླ་ ༧ ཚེས་ ༢༠ ནས་ ༢༢ བར་ཉིན་གྲངས་གསུམ་རིང་མི་ནི་སོ་ཊ་བོད་རིགས་སྤྱི་མཐུན་ཚོགས་པའི་ཚོགས་ཁང་དུ་བྱང་ཨ་རིའི་བོད་ཀྱི་སྐད་ཡིག་དང་རིག་གཞུང་སློབ་གྲྭའི་དགེ་རྒན་རྣམ་པར་ཟབ་སྦྱོང་དབུ་འབྱེད་ཀྱི་མཛད་སྒོ་ཚོགས་ཡོད།

དེ་ཡང་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་པདྨ་དབྱངས་ཅན་མཆོག་དང་། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དྲུང་ཆེ་ལས་འཕར་ཚེ་རིང་བསམ་གྲུབ་ལགས་དང་རྒས་ཡོལ་ཐོན་ཟིན་པའི་ཨ་རིའི་ལོ་སི་ཨེན་ཇི་ལེ་སི་ Los Angeles གྲོང་ཁྱེར་ནས་ཡིན་པའི་རྒན་བསྟན་འཛིན་འཆི་མེད་ལགས། དེ་བཞིན་བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་ ༡༣ ནས་ཕེབས་པའི་དགེ་རྒན་གྲངས་ ༤༦ ཟབ་སྦྱོང་ཐོག་མཉམ་ཞུགས་གནང་ཡོད།

མཛད་སྒོའི་ཐོག་སྐུ་མགྲོན་གཙོ་བོ་ཤེས་རིག་བཀའ་བློན་མཆོག་གིས་དགེ་རྒན་རྣམ་པས་གསར་གཏོད་ཀྱི་ཐབས་ལམ་བརྒྱུད་སློབ་ཕྲུག་ཚོར་སློབ་ཁྲིད་གནང་རྒྱུ་གལ་ཆེན་པོ་ཡིན་པ་མ་ཟད། དགེ་རྒན་རང་ཉིད་ནས་ཀྱང་སློབ་ཕྲུག་ཚོར་མིག་དཔེ་བཟང་པོ་སྟོན་དགོས་པའི་ལམ་སྟོན་དང་། སློབ་ཕྲུག་རྣམ་པ་ཚོས་སློབ་གཉེར་བྱེད་དུས་གོ་རྟོགས་མགྱོགས་མྱུར་གྱི་ཁྱད་པར་ཡོད་སྲིད་ཀྱང་། སྐྱེས་སྟོབས་ཀྱི་ཤེས་རབ་དང་ནུས་པ་ཚང་མར་གཅིག་མཚུངས་སུ་ཡོད། ཅེས་གསུངས།

དེ་ནས་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་བོད་ཀྱི་སྐད་ཡིག་གི་གལ་གནད་རང་བཞིན་དང་འབྲེལ་བའི་སྐོར་གསུང་དོན། བཙན་བྱོལ་བོད་མི་རྣམས་ཀྱིས་བོད་ཀྱི་ཐུན་མིན་ཆོས་དང་རིག་གཞུང་མི་ཉམས་རྒྱུན་འཛིན་བྱེད་དགོས་པ་དང་། བོད་ཀྱི་ཆོས་དང་རིག་གཞུང་གནས་དང་མ་གནས་བོད་ཀྱི་སྐད་ཡིག་ལ་རག་ལས་ཡོད་སྟབས། བོད་ཀྱི་སྐད་ཡིག་བདག་གཅེས་བྱ་རྒྱུ་ནི། བཙན་བྱོལ་བོད་མི་རྣམས་ཀྱི་འོས་འགན་ཡིན། ཞེས་གསུངས།
ཐེངས་འདིའི་ཟབ་སྦྱོང་དེ་བཞིན་བོད་མིའི་སྒྲིག་འཛུགས་ཤེས་རིག་ལས་ཁུངས་དང་མི་ནེ་སོ་ཊའི་ཨར་བོད་མཐུན་ཚོགས་ Tibetan American Foundation of Minnesota གཉིས་ཀྱི་མཐུན་འགྱུར་རོགས་རམ་འོག་བྱང་ཨ་རིའི་སྐུ་ཚབ་དོན་གཅོད་ཁང་གིས་གོ་སྒྲིག་གནང་ཡོད་པ་དང་བཅས། །