ཕྱི་ལོ་ ༢༠༡༨ ཟླ་ ༧ ཚེས་ ༡༧ རེས་གཟའ་མིག་དམར།

༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག་རྡ་ས་དབུས་སྣེ་ལེན་འབྲེལ་མཐུད་ཁང་དུ་ཕྱི་ལོ་ ༢༠༡༨ ཟླ་ ༧ ཚེས་ ༡༧ ནས་ ༡༨  བར་ཉིན་གྲངས་གཉིས་རིང་ལང་ཚོ་དར་བབ་ཀྱི་འཕྲོད་བསྟེན་དང་འབྲེལ་བའི་ཟབ་སྦྱོང་ཞིག་གོ་སྒྲིག་གནང་ཡོད།
དེེ་ཡང་གོང་ཚེས་ཉིན་གྱི་དབུ་འབྱེད་མཛད་སྒོར་སྐུ་མགྲོན་གཙོ་བོ་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་། དྲུང་ཆེ་ཆུ་སྐྱ་སྦྲ་གཉིས་ཚེ་རྒྱལ་ལགས། དྲུང་འཕར་ཡེ་ཤེས་དབང་མོ་ལགས། ཟུང་དྲུང་བྱམས་པ་ཕུན་ཚོགས་ལགས། འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད།  བོད་པའི་སློབ་གྲྭ་ཁག་ ༢༢ ནས་ཕེབས་པའི་སློབ་སྤྱི་དང་། སློབ་གྲྭའི་འགོ་འཛིན། དེ་བཞིན་ཚོགས་བཅར་བ་ཁྱོན་མི་གྲངས་ ༢༦ བཅས་ཚང་འཛོམས་ཐོག་སྐུ་མགྲོན་གཙོ་བོ་འཕྲོད་བསྟེན་བཀའ་བློན་མཆོག་གིས་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་རྗེས་རྟེན་འབྲེལ་གྱི་སྣང་གསལ་ཞལ་ཕྱེ་གནང་ཡོད།

དེ་ནས་འཕྲོད་བསྟེན་དྲུང་ཆེ་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་ཟབ་སྦྱོང་གི་ངོ་སྤྲོད་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་གསུང་བཤད་གནང་དོན། དེ་རིང་ལང་ཚོ་དར་བབ་ཀྱི་འཕྲོད་བསྟེན་དང་འབྲེལ་བའི་ཟབ་སྦྱོང་དེར་གལ་ཆེན་པོ་བརྩིས་པའི་ཐོག་ནས་ཕྱོགས་མཐའ་སློབ་གྲྭ་ཁག་ནས་ཕེབས་པའི་སློབ་གྲྭའི་སློབ་སྤྱི་དང་། སློབ་གྲྭའི་འགན་འཛིན། དེ་བཞིན་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་རྣམས་ལ་ཐོག་མར་འཚམས་འདྲི་བཀྲ་ཤིས་བདེ་ལེགས་ཞུ་ཡིན། རྩ་བའི་ལང་ཚོ་དར་བབ་ཟེར་དུས་ཚང་མའི་མཁྱེན་གསལ་རེད། སྤྱིར་བཏང་འཛམ་གླིང་འཕྲོད་བསྟེན་ལྷན་ཚོགས་ཀྱི་གསུང་སྟངས་བྱས་ན། ཕྲུ་གུ་ལོ་ ༡༠ ནས་ལོ་ ༡༩ བར་གྱི་ཕྲུ་གུ་ལང་ཚོ་དར་བའི་གནས་བབ་ཁོངས་སུ་རྩི་ཡི་ཡོད། འཛམ་གླིང་ནང་མི་འབོར་ཐེར་འབུམ་ ༡.༢  ལང་ཚོ་དར་ལ་བབ་པ་རེད། ཕྱོགས་གཞན་ནས་དུས་རྒྱུན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་སྟེང་མི་འབོར་ཐེར་འབུམ་བདུན་ཞེས་བཀའ་སློབ་ཕེབས་ཀྱི་ཡོད། མི་དྲུག་ཡོད་པ་ནང་ནས་མི་གཅིག་དེ་ལང་ཚོ་དར་ལ་བབ་པའི་མི་ཆགས་ཀྱི་ཡོད། འཛམ་གླིང་འཕྲོད་བསྟེན་ལྷན་ཚོགས་ཀྱིས་འཕྲོད་བསྟེན་གྱི་གནས་བབ་ཐོག་ནས་དཀའ་ངལ་གདོང་ལེན་གནང་ཕྱོགས་ནི། གཅིག་ནི་བུད་མེད་ལོ་གཞོན་མངལ་ཆགས་ Child Birth པའི་དཀའ་ངལ་དང་། དེ་བཞིན་ལོ་གཞོན་རྣམས་ལ་རེག་དུག་གཉན་སྲིན་ HIV ནད་རིགས་ཡོང་གི་ཡོད།   རེག་དུག་གཉན་སྲིན་ HIV ནད་རིགས་ཤུགས་ཆེ་བ་དེ་ཨ་ཕི་རི་ཀའི་ནང་ཡོང་གི་ཡོད། གཞོན་སྐྱེས་ས་ཡ་གཉིས་ཙམ་གྱི་རེག་དུག་གཉན་སྲིན་ནད་འབུ་ཁྱེར་ནས་སྡོད་ཀྱི་ཡོད།