ཕྱི་ལོ་ ༢༠༡༨ ཟླ་ ༧ ཚེས་ ༤ རེས་གཟའ་ལྷག་པ།

༄༅། །ཉེ་ལམ་ཛུ་རིག་མེ་འཁོར་འབབ་ཚུགས་ཞིག་ལ་བྷར་ཛིལ་ Brazil སྒྱུ་སྩལ་བ་ Ernesto Neto ལགས་ཀྱིས་ GaiaMother Tree ཞེས་པའི་སྡོང་པོ་ཞིག་ཉིན་གྲངས་གཉིས་རིང་འགྲེམས་སྟོན་གནང་འདུག་པར་ས་གནས་ཡུལ་མི་དང་འགྲུལ་བཞུད་བྱེད་མཁན་གྱི་ཡུལ་སྐོར་སྤྲོ་འཆམ་པ་སོགས་མང་དག་ཅིག་གིས་འགྲེམས་སྟོན་ལ་དོ་སྣང་ཤུགས་ཆེ་གནང་འདུག

སྐབས་དེར་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་འགྲེམས་སྟོན་དེར་གདན་ཞུ་ལྟར་ཆེད་ཕེབས་གནང་སྟེ། མ་འོངས་པའི་དགོས་མཁོ་ཞེས་པའི་བརྗོད་གཞིའི་ཐོག་གསུང་བཤད་གནང་བ་མ་ཟད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་གསུམ་གྱི་སྐོར་ངོ་སྤྲོད་གནང་འདུག
ཕྱོགས་མཚུངས་དོན་གཅོད་མཆོག་གིས་མ་འོངས་པར་ང་ཚོར་བྱམས་པ་དང་བརྩེ་བ། སྙིང་རྗེ་སོགས་དགོས་ཀྱི་ཡོད་ན། ཚང་མ་ད་ལྟའི་དུས་ཡུན་ལ་རག་ལུས་ཡོད་ཅིང་། ང་ཚོ་འགྲོ་བ་མི་ནི་མ་འོངས་ཁ་ལོ་བསྒྱུར་མཁན་ཞིག་ཡིན་ཅེས་གསུངས་གནང་འདུག

གཞན་ཡང་དོན་གཅོད་མཆོག་གིས་མ་འོངས་པར་ཕྱི་དངོས་པའི་མཐུན་རྐྱེན་དང་དཔལ་འབྱོར་ཙམ་མིན་པར། ཁོོར་ཡུག་དེ་ཡང་ཡག་པོ་ཞིག་དགོས་ཀྱི་ཡོད་སྐོར་གསུང་བཤད་གནང་འདུག རྒྱ་ནག་གཞུང་གིས་བོད་ཀྱི་རང་བྱུང་སྣོད་བཅུད་ལ་གཏོར་བཤིག་དང་། ཤིང་སྣ་གཅོད་འབྲེག ཆུ་བོ་ཆེ་ཁག་ཁ་ལོ་བསྒྱུར་བ་སོགས་བོད་ཀྱི་ཁོར་ཡུག་གཏོར་བཤིག་བཏང་ཡོད་སྐོར་ཡང་གསུང་གནང་འདུག དོན་གཅོད་མཆོག་གིས་སྐུ་ཞབས་ཁོང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ལུགས་ལ་གཞི་མ་བཅོལ་བའི་ཐོག་ནས་འགྲོ་བ་མིའི་བཟང་སྤྱོད་གོང་མཐོར་གཏོང་ཐབས་ཀྱི་དཔེ་དེབ་ Beyond Religion:Ethics For a Whole World ཞེས་པ་དྲན་རྟེན་ཕྱགས་རྟགས་སུ་ཕུལ་གནང་ཡོད་པ་བཅས། །