ཕྱི་ལོ་ ༢༠༡༨ ཟླ་ ༧ ཚེས་ ༥ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་ཕྱི་ལོ་ ༢༠༡༨ ཟླ་ ༧ ཚེས་ ༢ ནས་ ༨ བར་བདུན་ཕྲག་གཅིག་རིང་ཉི་ཧོང་ནང་ལས་རིམ་ཡོད་པ་ལྟར། ཕྱི་ཚེས་ ༤ ཉིན་འཕྲོད་བསྟེན་བཀའ་བློན་མཆོག་གིས་ས་ཡི་ཏ་མ་ Saitama རྒྱལ་སྤྱིའི་སྨན་གྱི་མཐོ་སློབ་ཏུ་འཚམས་གཟིགས་གནང་འདུག
དེ་ཡང་འབྲས་ནད་དང་། སྙིང་གི་ནད་གཞི། དེ་བཞིན་སྙིང་ཁྲག་འགག་པའི་ཚབ་ཆེའི་ནད་གཞི་སོགས་ཀྱི་སྨན་བཅོས་ཐོག་སྙན་གྲགས་ཡོད་པའི་སྨན་ཁང་དེ་ཡིས་ད་བར་བོད་ཕྲུག་ ༢༠ ཐམ་པར་སློབ་སྦྱོང་རོགས་རམ་གནང་སྟེ། ད་ཆ་བོད་ཕྲུག་དེ་དག་ཉི་ཧོང་ས་གནས་གང་སར་སྨན་པ་དང་སྨན་ཞབས་པགནང་བཞིན་ཡོད་པ་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཀྱང་སྨན་ཁང་དེར་ཐེངས་གསུམ་ཆིབས་སྒྱུར་བཀའ་དྲིན་བསྐྱངས་མྱོང་ཡོད་པ་སོགས་འདས་པའི་ལོ་ངོ་ ༥༠ ལྷག་རིང་སྨན་ཁང་དེ་དང་བོད་མི་དབར་འབྲེལ་བ་དམ་གཟབ་ཡོད་པ་ཞིག་རེད་འདུག
ཐེངས་འདིར་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་སྨན་ཁང་དེར་ཕེབས་སྐབས་འབྲེལ་ཡོད་ལས་ཀྱི་སྣེ་མོ་བ་རྣམ་པས་སྣེ་ལེན་གཟབ་རྒྱས་ཞུས་འདུག སྐབས་དེར་བཀའ་བློན་མཆོག་གིས་འདས་པའི་དུས་ཡུན་འདིའི་རིང་སྨན་ཁང་དེ་ནས་བོད་ཕྲུག་ཚོར་སྨན་གྱི་སློབ་སྦྱོང་སླད་མཐུན་འགྱུར་རོགས་རམ་གནང་བར་དཔལ་ལྡན་སྲིད་སྐྱོང་མཆོག་དང་བོད་མིའི་སྒྲིག་འཛུགས་ཀྱི་ཚབ་ཞུས་ནས་ཐུགས་རྗེ་ཆེ་ཞུས་འདུག
ཕྱོགས་མཚུངས་བོད་མིའི་སྤྱི་ཚོགས་ནང་གི་ཊི་སྦི་ནད་གཞི་དང་མཆིན་པའི་གཉན་ཚད་ནད་གཞི་གཉིས་ཀྱི་དཀའ་ངལ་སྐོར་དང་། སྨན་པའི་སློབ་སྦྱོང་ཐོན་པའི་བོད་རིགས་ཚོར་ལོ་གསུམ་གྱི་གན་རྒྱའི་དུས་ཡུན་ཚང་བའི་རྗེས་སུའང་བཙན་བྱོལ་བོད་མིའི་གཞིས་ཆགས་སུ་མུ་མཐུད་ཕྱག་ལས་གནང་ཐུབ་པའི་ཆེད་དུ་སྨན་ཁང་དེའི་ནང་ཆེད་ལས་སྦྱོང་བརྡར་རིགས་གནང་སྐྱོང་ཡོང་བའི་རེ་སྐུལ་ཞུས་འདུག
ཉི་ཧོང་སྐུ་ཚབ་དོན་གཅོད་ལུང་རྟོགས་ལགས་དང་། བོད་རིགས་སྨན་པ་རྒན་གྲས་སྐུ་ཞབས་ Nishikura Tsewang ལགས་རྣམ་གཉིས་བཀའ་བློན་མཆོག་དང་ལྷན་བཅར་ཞུས་འདུག
ཕྱི་ཚེས་ ༥ ཉིན་བཀའ་བློན་མཆོག་ཉི་ཧོང་གྲོས་ཚོགས་སུ་བཅར་ནས་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་དབུ་ཁྲིད་རྣམས་དང་མཇལ་འཛོམས་གནང་རྒྱུ་དང་། ཕྱི་ཚེས་ ༦ ཉིན་ཉི་ཧོང་སྐུ་ཚབ་དོན་ཁང་གི་གོ་སྒྲིག་འོག་མཆོད་འབུལ་སྨོན་ལམ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཆེ་ཡུན་རིང་བརྟན་ཕྱིར་ཉ་འབུམ་གཅིག་ཚེ་ཐར་གཏོང་རྒྱུའི་ཐོག་མཉམ་ཞུགས་གནང་རྒྱུ། དེ་བཞིན་ཕྱི་ཚེས་ ༧ ཉིན་ཉི་ཧོང་གི་རྒྱལ་ས་ཊོ་ཀི་ཡོ་ནང་སྐུའི་འཁྲུངས་སྐར་སྲུང་བརྩི་ཞུ་རྒྱུའི་མཛད་སྒོར་མཉམ་ཞུགས་དང་བོད་མིར་གསུང་བཤད་གནང་རྒྱུ་ཡིན་འདུག་པ་བཅས།།
