༄༅། །བོད་མིའི་སྒྲིག་འཛུགས་ཀྱི་ལས་བྱེད་ལས་དོན་གཟེངས་ཐོན་རྣམ་པར་གཟེངས་རྟགས་འབུལ་ཕྱོགས་ཀྱི་སྒྲིག་གཞི་དགོངས་དོན། ཕྱི་ལོ་ ༢༠༡༧ ལོའི་འགན་འཛིན་སྡེ་ཚན་གྱི་ལས་བྱེད་ལས་དོན་གཟེངས་ཐོན་གཟེངས་རྟགས་འདི་བཞིན་ནང་སྲིད་ལས་ཁུངས་ཀྱི་ཟུང་དྲུང་བདུད་འདུལ་རྡོ་རྗེ་ལགས་སུ་གནང་རྒྱུ་ཚོགས་ཆུང་ནས་ཐག་གཅོད་གནང་བ་བཞིན་ལས་དོན་གཟེངས་ཐོན་ཇི་བྱུང་གི་ལོ་རྒྱུས་གཤམ་གསལ།
ནང་སྲིད་ལས་ཁུངས་ཀྱི་ཟུང་དྲུང་བདུད་འདུལ་རྡོ་རྗེ་ལགས་ཕྱི་ལོ་ ༡༩༨༠ ཕྱི་ཟླ་ ༣ ཚེས་ ༡༠ ཉིན་ལ་བྱང་ས་སྨད་དུ་ཕ་ངག་དབང་ཐོག་མེད་དང་མ་དཀོན་མཆོག་སྒྲོལ་མ་གཉིས་ཀྱི་བུ་རྒན་ཤོས་སུ་སྐྱེ་ཞིང་གཞི་རིམ་སློབ་གྲྭ་ལ་དྭགས་བོད་ཁྱིམ་དང་། དེ་རྗེས་རིམ་པས་སྦེལ་ཀོབ་བོད་ཁྱིམ་དང་ཨན་ད་ར་ལོ་ཡོ་ལ་མཐོ་སློབ་ནས་མུ་མཐུད་ཚོང་རྩིས་ཐོག་བསླབ་པ་མཐར་སོན་བྱུང་ཡོད།
ཕྱི་ལོ་ ༢༠༠༨ ལོར་སྲི་ཞུའི་ལས་བྱེད་དུ་གསར་འདེམས་བྱུང་རྗེས་ཐོག་མ་སྤྱི་ཁྱབ་རྩིས་ཞིབ་ལས་ཁང་གི་དྲུང་གཞོན་གྱི་ལས་འཁུར་དང་། དེ་ནས་ཕྱི་ལོ་ ༢༠༠༩ ཟླ་ ༡༡ ནས་བལ་ཡུལ་རྩིས་ཞིབ་ཡན་ལག་ལས་ཁང་གི་འགན་འཛིན་ལས་རོགས་དང་། ཕྱི་ལོ་ ༢༠༡༠ ཟླ་ ༧ ནས་འགན་འཛིན་ངོ་མའི་ལས་འཁུར་ཞུས། ཕྱི་ལོ་ ༢༠༡༢ ཟླ་ ༡༢ ནས་བལ་ཡུལ་འབྲེལ་མཐུད་ལས་ཁང་གི་དྲུང་ཆེ་དང་། བལ་ཡུལ་རྒྱལ་ས་དང་འཕགས་ཤིང་། གློ་ཚེ་རོགས་བཅས་ཀྱི་ས་གནས་འགོ་འཛིན་དང་། ཀཐ་མན་གྲུ་འོས་བསྡུའི་འགན་འཛིན་གཅིག་ལྕོགས་ལས་འཁུར་ཞུས།
ཕྱི་ལོ་ ༢༠༡༣ ཟླ་ ༡༠ ནང་སྒང་ཏོག་ས་གནས་འགོ་འཛིན་དུ་གནས་སྤོས་རྗེས་ཁུལ་དེའི་ལ་བྱང་ས་ཁག་ ༡༡ དང་། ལ་ཤར་ས་ཁག་ ༨ སོ་སོའི་ཉམ་ཐག་ཞིབ་འཇུག་ཞུས་དགོས་ཁག་མཐིལ་ཕྱིན་ཞུས་ཐུབ་པ་བྱུང་ཡོད་པ་མ་ཟད་། སྒང་ཏོག་ས་གནས་འགོ་འཛིན་གནང་སྐབས་ཕྱི་ལོ་ ༢༠༡༥ ཟླ་ ༧ ཚེས་ ༦ ཉིན་ཏེ་༸སྐུའི་འཁྲུངས་སྐར་ཉིན་༸རྒྱལ་དབང་སྐུ་ཕྲེང་ལྔ་པ་ཆེན་པོ་ནས་སྐུ་ཕྲེང་རིམ་བྱོན་དང་འབྲས་ལྗོངས་དབར་ཆོས་སྲིད་ཀྱི་འབྲེལ་ལམ་ཇི་བྱུང་སྐོར་ལོ་རྒྱུས་ཀྱི་རང་བཞིན་ལྡན་པའི་དཔེ་དེབ་པར་སྐྲུན་གྱིས་མངའ་སྡེའི་སྤྱི་ཁྱབ་བློན་ཆེན་མཆོག་གིས་དབུ་འབྱེད་དང་མང་ཚོགས་ལ་འགྲེམས་སྤེལ་ཞུས།
གཞན་ཡང་ཕྱི་ལོ་ ༢༠༡༦ ཕྱི་ཟླ་ ༦ པའི་ཟླ་མཇུག་ནས་ནང་སྲིད་ལས་ཁུངས་ཀྱི་རྩིས་ཁང་ཚན་པའི་འགན་འཛིན་གྱི་འགན་ཁུར་བླངས་ནས་ནང་སྲིད་ལས་ཁུངས་ཀྱི་ཁྲིམས་མཐུན་དེབ་སྐྱེལ་ཚོགས་པ་དེ་དབུས་བོད་མིའི་ངལ་སེལ་ཚོགས་པའི་ ༢༠༠༩༌༌༌༢༠༡༠ ལོའི་འབབ་ཁྲལ་སྒོར་ས་ཡ་བཞི་བཅུ་ཞེ་གཅིག་རྒྱ་གར་འབབ་ཁྲལ་ལས་ཁུངས་ལ་འབུལ་དགོས་བརྡ་ཁྱབ་འབྱོར་ཡོད་པར། དོ་བདག་ནས་འགན་ཁུར་གྱིས་ཁྲལ་ཆག་ཐོབ་ཐབས་སུ་ཡིག་ཆ་ཁུངས་འཕེར་གྲ་སྒྲིག་གནང་སྟེ་ཁྲིམས་རྩོད་པ་བརྒྱུད་ཁྲིམས་གཏུག་བྱས་ཏེ་མཐར་གོང་གསལ་དངུལ་འབབ་ཆ་ཚང་འབུལ་མི་དགོས་པར་ཆག་ཡང་ཐོབ་ཡོད།
ཕྱོགས་མཚུངས་དོ་བདག་ནང་སྲིད་ལས་ཁུངས་སུ་སླེབས་རྗེས་རྩིས་ཞིབ་སྙན་ཐོའི་ནང་གསལ་བའི་སྐྱོན་གནད་ཁག་ལ་མཇུག་སྐྱོང་དོ་ནན་གནང་འབྲས་སུ་སྐྱོན་གནས་ཉུང་དུ་ཕྱིན་ཡོད་པ་དང་། ལྷག་པར་རྩིས་ལོ་ ༢༠༡༦་་་༢༠༡༧ ལོའི་རྩིས་ཞིབ་སྙན་ཐོའི་ནང་སྐྱོན་གནད་རྐང་གཅིག་ལས་མེད་པའི་རྩིས་ཀྱི་འགན་ཁུར་གཟེངས་སུ་ཐོན་པ་བྱུང་འདུག
དེ་བཞིན་རྩིས་ལོ་ ༢༠༡༥་་་༢༠༡༦ ནས་རྒྱ་གར་དབུས་གཞུང་ནང་སྲིད་ལས་ཁུངས་ནས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་གཞིས་ཆགས་སྤྱི་ཚོགས་ཡོངས་ལ་གཟིགས་རྟོགས་ཆེད་རོགས་དངུལ་སྒོར་ས་ཡ་བརྒྱད་ཅུ་རེ་ལོ་ལྔའི་རིང་གནང་གཏན་འཁེལ་ཡོད་ཀྱང་ལོ་ལྟར་མུ་མཐུད་ཐོབ་དང་མ་ཐོབ་ཀྱི་ཆ་རྐྱེན་ནི་འདས་མ་ཐག་པའི་ལོའི་ལས་བསྡོམས་དང་རྩིས་ཁྲ་ཁུངས་འཕེར་ཁམས་དང་ཡོད་མེད་ལ་རག་ལས་ཡོད་པ་བཞིན། དོ་བདག་ནས་འགན་འཁུར་སྣེ་འཁྲིད་འཐུས་ཤོར་མེད་པར་གནང་སྟེ་ད་བར་རོགས་དངུལ་མུ་མཐུད་ཐོབ་མུས་ཡིན་འདུག་པ་བཅས་ལས་དོན་གཟེངས་སུ་ཐོན་ལུགས་འབྲེལ་ཡོད་ལས་ཁུངས་ནས་ཁ་གསལ་འགྲེལ་བཤད་བྱུང་བ་ཚོགས་ཆུང་ནས་ངོས་བཞེས་དང་འབྲེལ་འདི་ལོའི་འགན་འཛིན་སྡེ་ཚན་གྱིས་ལས་བྱེད་ལས་དོན་གཟེངས་ཐོན་གཟེངས་རྟགས་དེ་བཞིན་ཁོང་པར་འབུལ་རྒྱུའི་ཐག་གཅོད་གནང་བའི་ལོ་རྒྱུས་སྙིང་བསྡུས་སུ། བོད་མིའི་སྒྲིག་འཛུགས་ཀྱི་ལས་བྱེད་ལས་དོན་གཟེངས་ཐོན་གཟེངས་རྟགས་ཚོགས་ཆུང་ནས།།
