ཕྱི་ལོ་ ༢༠༡༨ ཟླ་ ༧ ཚེས་ ༢༥ རེས་གཟའ་ལྷག་པ།
༄༅། །ཨ་རིའི་ཕྱི་སྲིད་ལྷན་ཁང་གིས་གོ་སྒྲིག་འོག་ཕྱི་ལོ་ ༢༠༡༨ ཟླ་ ༧ ཚེས་ ༢༤ ནས་ ༢༦ བར་ཉིན་གྲངས་གསུམ་རིང་ཨ་རིའི་ཕྱི་སྲིད་ལས་ཁུངས་སུ་ཐེངས་དང་པོ་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་ཆེན་ཞིག་བསྐོང་ཡོད།
དེ་ཡང་རྒྱལ་ཁབ་ ༨༠ ཙམ་ནས་ཕེབས་པའི་ཆོས་ལུགས་ཁག་གི་སྐུ་ཚབ་མི་སྣ་ ༤༠༠ ལྷག་དང་ཚོགས་པ་ཁག་གི་སྐུ་ཚབ་བཅས་ཐེངས་འདིའི་རྒྱལ་སྤྱིའི་ཆོས་དད་རང་དབང་གི་ཚོགས་ཆེན་ཐོག་ཆེད་ཕེབས་གནང་ཡོད་པ་དང་།
སྐབས་དེར་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་དེ་མོ་མཆོག་སྤྲུལ་བསྟན་འཛིན་ཕུན་ཚོགས་རིན་པོ་ཆེ་རྣམ་གཉིས་རྒྱལ་སྤྱིའི་ཆོས་དད་རང་དབང་གི་ཚོགས་ཆེན་ཐོག་མཉམ་ཞུགས་གནང་ཡོད།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་རྒྱལ་སྤྱིའི་ཆོས་དད་རང་དབང་གི་ཚོགས་ཆེན་ཐོག་བརྙན་ཐུང་བརྒྱུད་འཛམ་གླིང་གི་ཆོས་ལུགས་ནང་ཁུལ་དབར་མཐུན་སྒྲིལ་དང་ཞི་བདེ། དེ་བཞིན་ཆོས་དད་རང་དབང་གི་གལ་གནད་རང་བཞིན་སྐོར་བཀའ་སློབ་སྩལ་ཡོད།
ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་བྷི་རོན་བྷད་ཀི་ Brownback ལགས་ཀྱིས་རྒྱལ་སྤྱིའི་ཆོས་དད་རང་དབང་གི་ཚོགས་ཆེན་དབུ་འབྱེད་མཛད་སྒོར་གསུང་བཤད་གནང་རྗེས་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་དེ་མོ་མཆོག་སྤྲུལ་བསྟན་འཛིན་ཕུན་ཚོགས་རིན་པོ་ཆེ་རྣམ་གཉིས་ལ་ཟུར་དུ་ཐུག་འཕྲད་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བརྙན་ཐུང་གོ་སྒྲིག་གནང་བར་ཐུགས་རྗེ་ཆེ་ཞུས་པ་དང་སྦྲགས། སྐུ་ཞབས་བྷི་རོན་བྷད་ཀི་ལགས་ཀྱིས་བདེ་པོ་རིན་པོ་ཆེ་ལགས་ལ་བོད་དོན་ཆེད་རོགས་རམ་ག་རེ་གནང་དགོས་སྐོར་གསུང་འདུག
སྐབས་དེར་དེ་མོ་མཆོག་སྤྲུལ་བསྟན་འཛིན་ཕུན་ཚོགས་རིན་པོ་ཆེས་སྐུ་ཞབས་བྷི་རོན་བྷད་ཀི་ལགས་ལ་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་ཆེན་བདེ་ལེགས་ངང་བསྐོང་ཐུབ་པར་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་འབྲེལ་འབྱུང་འགྱུར་མུ་མཐུད་བོད་དོན་ཆེད་རྒྱབ་སྐྱོར་དང་གླེང་སློང་གནང་དགོས་པའི་འབོད་སྐུལ་ཞུས་གནང་ཡོད།
ཨ་རིའི་སྲིད་འཛིན་གཞོན་པ་དང་ཕྱི་སྲིད་དྲུང་ཆེ་རྣམ་གཉིས་ནས་རྒྱལ་སྤྱིའི་ཆོས་དད་རང་དབང་ཚོགས་ཆེན་ཉིན་གསུམ་པར་གསུང་བཤད་གནང་རྒྱུ་ཡིན་པ་དང་། ཐེངས་འདིའི་ཚོགས་ཆེན་ཐོག་རྒྱ་ནག་དང་། བོད། ཡུ་གུར། བྱང་ཀོ་རི་ཡ། པ་ཀི་སི་ཐན། ཊར་ཀེ་བཅས་ཀྱི་ལུང་པ་ནང་ཆོས་དད་རང་དབང་གི་གཉའ་གནོན་འོག་མནར་གཅོད་མྱངས་པའི་སྐུ་ཚབ་རྣམ་པས་རང་ཉིད་ཀྱིས་མྱངས་པའི་དཀའ་སྡུག་གི་བྱུང་བ་རྣམས་ཚོགས་བཅར་བ་ཡོངས་ལ་འགྲེལ་བརྗོད་གནང་ཡོད་པ་དང་བཅས།།
