ཕྱི་ལོ་ ༢༠༡༨ ཟླ་ ༧ ཚེས་ ༢ རེས་གཟའ་ཟླ་བ།
༄༅། །འདི་གར་ཨོ་སི་ཌོ་ལི་ཡ་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༦ ཚེས་ ༣༠ རེས་གཟའ་སྤེན་པའི་ཉིན། ནེའུ་ཛི་ལན་ཌའི་གྲོང་ཁྱེར་ཆེན་མོ་ཨོག་ལན་ཌར། ས་གནས་བོད་རིགས་མཐུན་ཚོགས་ངོས་ནས་བདུན་ཕྲག་གཅིག་སྔ་བསྣུར་གྱིས་༸གོང་ས་མཆོག་དགུང་གྲངས་གྱ་གསུམ་ལ་ཕེབས་པའི་སྐུའི་འཁྲུངས་སྐར་སྲུང་བརྩི་ཞུས་པ་དང་ཆབས་ཅིག བོད་མིའི་སྒྲིག་འཛུགས་ནས་ཇི་ལྟར་བཀོད་ཁྱབ་གནང་བ་བཞིན་ད་བར་བོད་མི་ཚོ་ཕྱི་ཡུལ་དུ་གྱར་ནས་ལོ་ངོ་དྲུག་ཅུ་ཧྲིལ་པོ་འཁོར་བའི་དུས་ཚོད་དང་སྟབས་བསྟུན་ནས་ས་གནས་ཀྱི་བོད་དོན་རྒྱབ་སྐྱོར་བ་ཚོར་བཀའ་དྲིན་རྗེས་དྲན་གྱི་ལས་འགུལ་གཟབ་རྒྱས་ཕུན་སུམ་ཚོགས་པ་ཞིག་སྤེལ་སོང་བར་ཁྱོན་མི་གྲངས་བརྒྱ་ཙམ་འཛོམས་འདུག་པ་ནས་ས་གནས་གཞན་ཧྥང་གྷ་རི་ནས་བོད་མི་ལྔ་དང་། ལྷོ་གླིང་ཁེ་རི་སི་ཆར་ཆི་གྲོང་ཁྱེར་ནས་བོད་མི་གཅིག་བཅས་དམིགས་སུ་བཀར་ནས་དུས་སྟོན་མཛད་སྒོ་འདིའི་ཆེད་ཕེབས་འདུག
ཆུ་ཚོད་ ༥།༣༠ ཙམ་ནས་བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག་དང་དྲུང་ཆེ་ཀརྨ་རིན་ཆེན་ལགས། སྐུ་ཚབ་དོན་གཅོད་མཚོ་སྒོ་ལྷག་པ་ལགས་བཅས་རྣམ་པ་གསུམ་གྱིས་རེས་མོ་བྱས་ནས་བོད་རིགས་ཚོར་བླང་དོར་གྱི་གསུང་བཤད་གནང་། དང་ཐོག་སྐུ་ཚབ་དོན་གཅོད་ལྷག་པ་ལགས་ཀྱིས་འཚམས་འདྲི་དང་ངོ་སྤྲོད་མདོར་བསྡུས་དང་བཅས་ལོ་འདིར་རང་རེའི་སྒྲིག་འཛུགས་ཀྱི་ངོས་ནས་བཀའ་བཀོད་གནང་དོན་བཞིན། ད་ལོར་རྒྱ་གར་གཙོ་བོར་གྱུར་པའི་བོད་རིགས་གནས་ཡུལ་གྱི་རྒྱལ་ཁབ་ཚང་མའི་ནང་བོད་དོན་ལ་རྒྱབ་སྐྱོར་གནང་མཁན་གྱི་སྲིད་གཞུང་དང་ཚོགས་སྡེ། མི་དམངས་སོགས་ལ་བཀའ་དྲིན་རྗེས་དྲན་ཞུས་དང་ཞུ་མུས་ལྟར། འདིར་ནེའུ་ཛི་ལན་ཌའི་ནང་དུ་ཡང་། ༸གོང་ས་མཆོག་གི་༸སྐུའི་འཁྲུངས་སྐར་དང་སྟབས་བསྟུན་ནས་དེ་རིང་བོད་དོན་རྒྱབ་སྐྱོར་བ་ཚོར་བཀའ་དྲིན་རྗེས་དྲན་གྱི་ལས་འགུལ་སྤེལ་གྱིན་པ་དང་། བོད་མི་ཧ་ཅང་ཉུང་ཡང་ད་བར་བོད་མིའི་རྩ་དོན་དང་འབྲེལ་བའི་ལས་དོན་གང་སྤྱིའི་ཐད་ལ་ཕྱག་ལས་ཧ་ཅང་ཡག་པོ་གནང་བར་བསྔགས་བརྗོད་ཀྱི་གསུང་བཤད་ཕེབས་རྗེས། བདེ་སྲུང་བཀའ་བློན་མཆོག་གིས་སྐུ་ཉིད་ཕྱི་ལོ་ ༡༩༩༢ ལོར་བོད་ནས་རྒྱ་གར་ལ་བཙན་བྱོལ་དུ་ཕེབས་པ་དང་། ཐོག་མར་བོད་གཞུང་བདེ་སྲུང་ཉམས་ཞིབ་ལས་ཁུངས་སུ་ཡིག་བསྒྱུར་དང་བོད་གནས་ཉམས་ཞིབ་ཀྱི་ཕྱག་ལས་གནང་བ་དང་། དེ་ནས་ཐེག་པ་རིམ་འཛེགས་ཀྱིས་དྲུང་ཡིག་ཆེན་མོ་དང་བཀའ་བློན་བཅས་ཀྱི་གནས་རིམ་བར་ཇི་ལྟར་ཕེབས་པའི་སྐོར་དང་།
བོད་མིའི་སྒྲིག་འཛུགས་ཀྱི་ལས་ཁུངས་ཨ་མ་བདུན་པོ་རེ་རེའི་ཁྱད་ཆོས་དང་དེ་དག་གི་ད་ལྟའི་གནས་བབ། ལྷག་པར་བོད་མིའི་སྒྲིག་འཛུགས་ཀྱི་དཔལ་འབྱོར་གྱི་གནས་སྟངས་ཀྱང་སྔར་བས་ཡར་རྒྱས་སུ་འགྲོ་མུས་ཐོག སྐུ་ཉིད་བདེ་སྲུང་གི་བཀའ་བློན་དུ་བསྐོས་པ་ནས་བཟུང་ད་བར་ལོ་ངོ་གཉིས་ཙམ་གྱི་རིང་དུ་ལས་འགན་གཙོ་བོ་༧གོང་ས་མཆོག་གི་སྐུ་ཕྱྭའི་སྲུང་སྐྱོབ་ཐད་ལྷག་བསམ་རྣམ་དག་དང་ཧུར་ཐག་འབད་ཐག་གིས་འཐུས་ཤོར་མེད་པ་ཞབས་སྤྱི་བསྒྲུབས་ཡོད་ལ། ད་དུང་ཡང་མུ་མཐུད་དེ་མ་འོངས་པའི་ལོ་ངོ་གསུམ་གྱི་བཀའ་བློན་གྱི་ལས་འཁུར་རིང་ལ་སྔར་བཞིན་ཧུར་ཐག་བྱ་རྒྱུའི་ཆོད་སེམས་བརྟན་པོ་ཡོད་པ་སོགས་གསུངས་གྲུབ་རྗེས། དྲུང་ཆེ་ཀརྨ་རིན་ཆེན་ལགས་རང་ཉིད་ངོ་སྤྲོད་དང་སྦྲགས་བོད་རིགས་ཚོ་ནང་ཕན་ཚུན་མཐུན་ལམ་གལ་ཆེ་དང་ཕ་མ་ཚོས་གཙོ་བོ་འགན་བླངས་ནས་སོ་སོའི་བུ་ཕྲུག་ཚོར་ཁྱིམ་དུ་བོད་སྐད་སྤྱད་ནས་བོད་སྐད་དང་བོད་ཡིག་བསླབ་གལ་ཆེ་བ་དཔེ་མཚོན་དང་འབྲེལ་གསུངས་པ་དང་།
སུད་ཌན་ནང་དུ་རྒྱ་གཞུང་གི་གསང་མྱུལ་བ་བོད་རིགས་ཤིག་འཛིན་བཟུང་བྱས་ཡོད་པ་བཞིན་འདི་ཁུལ་ལ་ཡང་། བོད་རིགས་ཚོས་རྒྱུན་དུ་ནས་གནས་ཚུལ་དེ་རིགས་ལ་དོགས་ཟོན་བྱ་གལ་སོགས་ཀྱི་ལམ་སྟོན་གསུང་བཤད་གནང་གྲུབ་མཚམས། མང་ཚོགས་ནས་ས་གནས་སུ་རྒྱ་ཡིག་གི་ཚགས་ཤོག་ཁག་ལྔ་ལས་གཅིག་ཙམ་མ་གཏོགས་ཚང་མ་རྒྱ་ནག་དམར་ཤོག་གི་སྟངས་འཛིན་བྱེད་ཀྱིན་པར་ང་ཚོས་གདོང་ལེན་ཇི་ལྟར་བྱ་དགོས་ཕྱོགས་དང་། བོད་མིའི་དང་བླངས་དཔྱ་དངུལ་ལག་དེབ་གསར་བཟོ་དང་འབྲེལ་བའི་སྐོར། བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གསར་འགྱུར་འགོད་སྐབས་གནས་ཚུལ་ལ་ཞིབ་འཇུག་མཐིལ་ཕྱིན་པ་གནང་ནས་འགོད་ནོར་མ་ཤོར་བ་ཧ་ཅང་གལ་ཆེ་བ་དང་། དབུ་མའི་ལམ་གྱི་སྲིད་བྱུས་ཀྱི་བདག་དབང་བོད་མིའི་སྒྲིག་འཛུགས་ལ་ཡོད་སྐོར་གྲོས་ཚོགས་ཀྱི་ནང་དུ་བརྗོད་པ་དེ་ཡང་སྙིང་འགྲིག་མིན་ཞེས་དང་། བར་སྐབས་ཤིག་ནས་བཀའ་ཤག་ནས་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་འཕོ་འགྱུར་གནང་སྟངས་ཐད་ཀྱི་དགོངས་ཚུལ་ལེགས་སྤེལ་ཉེས་འགོག་གི་ཚུལ་དུ་སྲང་པོར་གསུངས་སོང་བ་བཅས་ལ་བདེ་སྲུང་བཀའ་བློན་མཆོག་དང་། སྐུ་ཚབ་དོན་གཅོད་ལགས་རྣམ་གཉིས་ཀྱིས་ཀྱང་བཀའ་ལན་ཁ་གསལ་གནང་བ་བཅས་ཕན་ཚུན་བགྲོ་གླེང་ལྷུག་པོ་བྱུང་བ་ངོ་མཚར་ཆེ།
དེ་ནས་ཆུ་ཚོད་བདུན་པའི་ཐོག་ལ་༸སྐུའི་འཁྲུངས་སྐར་སྲུང་བརྩིའི་མཛད་སྒོ་དངོས་གཞི་འགོ་བཙུགས་པ་དང་། མཛད་རིམ་གཙོ་སྐྱོང་བ་ཨོག་ལན་ཌའི་ས་གནས་བོད་རིགས་མཐུན་ཚོགས་ཀྱི་ཚོགས་གཙོ་སྐུ་ཞབས་ཐུབ་བསྟན་སྐལ་བཟང་ལགས་ཀྱིས་ཚོགས་བཅར་བ་ཡོངས་ལ་དགའ་བསུའི་འཚམས་འདྲི་དང་བཅས་མཛད་རིམ་མདོར་བསྡུས་ཤིག་ངོ་སྤྲོད་གནང་མ་ཐག བོད་དང་ནེའུ་ཛི་ལན་ཌའི་རྒྱལ་གླུ་གྱེར་བ་དང་། དེ་ནས་༸རྒྱལ་བའི་ཞབས་བརྟན་གསོལ་འདེབས་ཨིན་བོད་གཉིས་ཀའི་ནང་དུ་འདོན་གནང་པ་དང་ཆབས་ཅིག སྐྱབས་གནས་དགེ་འདུན་པ་ཚོ་དང་སྐུ་མགྲོན་གཙོ་བོ་བདེ་སྲུང་བཀའ་བློན་མཆོག་གིས་དབུ་བཙུགས་ནས་ཚོགས་བཅར་བ་ཚོས་རིམ་བཞིན་བཞུགས་ཁྲིའི་སྟེང་གི་༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེར་བཀྲ་ཤིས་རྟེན་འབྲེལ་གྱི་མཇལ་དར་བསྒྲོན་པ་དང་སྐུ་མགྲོན་གཙོ་བོ་མཆོག་གིས་འཁྲུངས་སྐར་གྱི་ཞིམ་ཟས་འཁུར་ར་འདེགས་འབུལ་གནང་།
དེ་ནས་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཞོན་ཀུན་བཟང་འཇིགས་མེད་ལགས་དང་བཟའ་ཟླ་ཚེ་རིང་ལགས་གཉིས་ཀྱིས་༧རྒྱལ་དབང་ཐམས་ཅད་མཁྱེན་པའི་བསྟོད་གླུ་ཡིད་དབང་འཕྲོག་པ་ཞིག་བླངས་རྗེས་སྐུ་མགྲོན་ཚང་མས་ས་གནས་བོད་རིགས་མཐུན་ཚོགས་ཀྱི་ངོས་ནས་གོ་སྒྲིག་གནང་བའི་གསོལ་སྟོན་གཟབ་རྒྱས་ལ་དགྱེས་བཞིན་དུ་རོལ།
གསོལ་སྟོན་གྲུབ་རྗེས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དུས་སྟོན་སྲུང་བརྩི་གནང་མཁན་ཚང་མར་འཚམས་འདྲི་དང་། དམིགས་བསལ་གྱིས་ད་བར་བོད་དོན་ལ་ཁ་ཞེ་གཉིས་མེད་ཀྱིས་རྒྱབ་སྐྱོར་གནང་མཁན་བོད་ཀྱི་གྲོགས་ཚོགས་ཀྱི་ཚོགས་མི་ཡོངས་ལ་བཀའ་དྲིན་རྗེས་དང་། ད་དུང་མུ་མཐུད་རྒྱབ་སྐྱོར་གནང་རོགས་ཞེས་འབོད་སྐུལ་དང་བཅས་བོད་ནང་གི་གནས་སྟངས་ནི་དོན་ངོ་མར་བྱང་ཀོ་རི་ཡ་དང་སི་རི་ཡ་ལས་ཀྱང་ཆེས་ཛ་དྲག་པ་དང་དམ་བསྒྲགས་ཆེ་བ་ཡོད་སྐོར་གྱི་གསལ་བཤད་ལུང་དང་བཅས་པའི་བརྙན་ཐུང་མང་ཚོགས་ལ་གཟིགས་འབུལ་ཞུས།
དེ་ནས་ས་གནས་བོད་རིགས་མཐུན་ཚོགས་ཀྱི་ངོས་ནས་གོ་སྒྲིག་གནང་བ་ལྟར། སྐུ་མགྲོན་གཙོ་བོ་བདེ་སྲུང་བཀའ་བློན་མཆོག་དང་སྐུ་ཚབ་དོན་གཅོད་རྣམ་གཉིས་ཀྱིས་ལོ་ངོ་མང་པོའི་རིང་ལ་མུ་མཐུད་ནས་བོད་དོན་རྒྱབ་སྐྱོར་གནང་མཁན་བོད་ཀྱི་གྲོགས་ཚོགས་ཀྱི་ཚོགས་མི་མི་ཉུང་བ་ཞིག་དང་རྒྱ་བོད་མཐུན་ཚོགས་ཀྱི་ཚོགས་གཙོ་སྐུ་ཞབས་ཁྲེན་ཝུས་ཅན་ལགས་སོགས་ལ་བཀའ་དྲིན་རྗེས་དྲན་གྱི་ཕྱག་འཁྱེར་དང་འབུལ་སྐྱེས་གནང་བ་མ་ཟད། ས་གནས་བོད་རིགས་མཐུན་ཚོགས་ནས་ཀྱང་ཚོགས་གཙོ་ཐུབ་བསྟན་སྐལ་བཟང་ལགས་ཀྱི་སྐྱེས་སྐར་ལ་བཀྲིས་བདེ་ལེགས་དང་། བཟའ་ཟླ་གྷོན་ལགས་སུའང་འབུལ་སྐྱེས་གནང་ཡོད།
མཐའ་དོན་ཀུན་བཟང་འཇིགས་མེད་ལགས་ཀྱིས་ཁམས་ཀྱི་ཞབས་བྲོ་བརྗིད་ཆེ་བ་ཞིག་འཁྲབ་གྲུབ་རྗེས་མཛད་རིམ་གཙོ་སྐྱོང་བས་ཐུགས་རྗེ་ཆེ་ཞུའི་གཏམ་བཤད་གནང་བ་དང་། དེ་ནས་ཚོགས་བཅར་ཚང་མ་སྐུ་མགྲོན་གཙོ་བོ་དང་ལྷན་དུ་སྐུ་དཔར་བསྒྲོན་ནས་༸སྐུའི་འཁྲུངས་སྐར་དང་བཀའ་དྲིན་རྗེས་དྲན་གྱི་ཉིན་མོ་བཟང་པོ་འདི་བཞིན་རེ་ཞིག་དགའ་སྤྲོའི་ངང་ནས་མཇུག་སྒྲིལ་ཡོད།
དཔལ་ལྡན་བཀའ་ཤག་ནས་༸སྐུའི་འཁྲུངས་སྐར་དུས་ཆེན་དང་སྟབས་བསྟུན་བཀའ་བློན་ཁག་གཅིག་ཕྱིའི་རྒྱལ་ཁབ་ཁག་ཏུ་གཞུང་འབྲེལ་འཚམས་གཟིགས་བཀོད་སྒྲིག་གནང་སྟེ་བོད་རིགས་མང་ཚོགས་ལ་ཐུག་འཕྲད་དང་། འབྲེལ་ཡོད་གཞུང་མང་གཉིས་ལ་ཐུགས་རྗེ་ཞུའི་ལས་འགུལ་སྤེལ་གྱི་ཡོད་པ་ལྟར། བདེ་སྲུང་བཀའ་བློན་མཆོག་དང་དྲུང་ཆེན་རྣམ་གཉིས་ཕྱི་ཟླ་ ༦ ཚེས་ ༢༩ ཉིན་ནིའུ་ཛི་ལན་ཌའི་རྒྱལ་ས་ཆེ་ཤོས་ཨོག་ལན་ཌའི་གནམ་ཐང་དུ་འབྱོར་སྐབས། ཨོ་སི་ཀྲི་ལི་ཡའི་སྐུ་ཚབ་དོན་གཅོད་མཚོ་མགོ་ལྷག་པ་ལགས་དང་། ནིའུ་ཛི་ལན་ཌ་རྒྱལ་ཡོངས་བོད་རིགས་མཐུན་ཚོགས་དང་བོད་རྒྱ་མཛའ་འབྲེལ་ཚོགས་པའི་ཚོགས་གཙོ་གཅིག་ལྕོགས་རིན་ཆེན་དོན་འགྲུབ་ལགས། ཨོག་ལན་ཌར་བོད་རིགས་མཐུན་ཚོགས་ཀྱི་ཚོགས་གཙོ་ཐུབ་བསྟན་སྐལ་བཟང་ལགས་ཀྱིས་གཙོས་བོད་རིགས་ཁག་གཅིག་གནམ་ཐང་དུ་ཕེབས་བསུར་བཅར་ཡོད་པ་དང་། ནིའི་ཛི་ལན་ཌའི་ལས་རིམ་ཁག་གྲུབ་རྗེས་བདེ་སྲུང་བཀའ་བློན་མཆོག་དང་དྲུང་ཆེ་རྣམ་གཉིས་ཨོ་སི་ཀྲི་ལི་ཡའི་མངའ་ཁུལ་ཁག་ཏུ་མུ་མཐུད་ལས་རིམ་བསྐྱང་རྒྱུ་ཡིན་པ་བཅས།།
