ཕྱི་ལོ་ ༢༠༡༨ ཟླ་ ༧ ཚེས་ ༡༠ རེས་གཟའ་མིག་དམར།
༄༅། །ཨིན་ཡུལ་སྐུ་ཚབ་དོན་གཅོད་ཁང་དང་ཨིན་ཡུལ་བོད་རིགས་སྤྱི་མཐུན་ཚོགས་པ་ཐུན་མོང་གི་་གོ་སྒྲིག་འོག་ཕྱི་ལོ་ ༢༠༡༨ ཟླ་ ༧ ཚེས་ ༧ ཉིན་བཀའ་དྲིན་ཞེས་པའི་བོད་ཀྱི་རིག་གཞུང་དུས་ཆེན་ཞིག་ལོན་ཌོན་ཨེ་རི་ཞི་རིག་གཞུང་བསྟི་གནས་ཁང་དུ་སྲུང་བརྩི་ཞུས་ཡོད།
དེ་ཡང་དབུ་འབྱེད་མཛད་སྒོའི་ཐོག་བཀྲ་ཤིས་ལྷུན་པོ་དགོན་པའི་དགེ་འདུན་པ་ཁག་གཅིག་གིས་༸རྒྱལ་བའི་སྐུ་ཕྱྭའི་ཞབས་བརྟན་གསོལ་འདེབས་གསུང་འདོན་དང་འབྲེལ་ཨིན་ཡུལ་སྐུ་ཚབ་དོན་གཅོད་ཚེ་རིང་ཆོས་འཕེལ་ལགས་ཀྱིས་ཕེབས་བསུའི་གསུང་བཤད་གནང་དོན།
བོད་མིའི་སྒྲིག་འཛུགས་ཀྱི་དབུ་ཁྲིད་ལམ་སྟོན་འོག་བོད་མི་རྣམས་ནས་ཕྱི་ལོ་ ༢༠༡༨ ཧྲིལ་པོར་གནས་ཡུལ་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འཆར་གྱི་ཆ་ཤས་སུ། བཀའ་དྲིན་ཞེས་པའི་བོད་ཀྱི་རིག་གཞུང་དུས་སྟོན་དེ་ཡང་ཨིན་ཡུལ་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འགུལ་གྱི་ཆ་ཤས་ཡིན་པ་དང་། འདས་པའི་ལོ་ངོ་ ༦༠ རིང་ཨིན་ཡུལ་གཞུང་མང་གཉིས་ནས་བོད་དོན་ཆེད་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་གསུངས་ཡོད། ཨིན་ཡུལ་སྐུ་ཚབ་དོན་གཅོད་ཀྱིས་བོད་དོན་རྒྱབ་སྐྱོར་བ་རྣམ་པར་ཡི་རང་བསྔགས་བརྗོད་ཀྱི་ཕྱག་འཁྱེར་རེ་གནང་ཡོད།
བོད་ཀྱི་རིག་གཞུང་དུས་ཆེན་ཐོག་ཕེབས་པའི་སྐུ་མགྲོན་རྣམས་ལ་བོད་ཀྱི་ཐུན་མོང་མ་ཡིན་པའི་གྲོ་སོ་ཕྱེ་མར་དང་འབྲས་སིལ་ཕུལ་ཡོད་པ་མ་ཟད། སྤྱན་རས་གཟིགས་རྡུལ་མཚོན་དཀྱིལ་འཁོར་དང་། བོད་ཀྱི་འབྲོག་པས་འཚོ་བ་སྐྱེལ་སྟངས། སྲོལ་རྒྱུན་གཞས་སྣ་སོགས་ངོ་སྤྲོད་དང་གཟིགས་འབུལ་ཞུས་ཡོད།
དེ་བཞིན་བཀྲ་ཤིས་ལྷུན་པོ་དགོན་པའི་དགེ་འདུན་པ་ཁག་གཅིག་གིས་འཆམ་འཁྲབ་སྟོན་གནང་ཡོད། བོད་ཀྱི་རིག་གཞུང་དུས་ཆེན་ཐོག་Councillor Kastriot Berber ལགས་ཀྱིས་གཙོས་མི་གྲངས་ ༤༠༠ ཙམ་ཕེབས་ཡོད་པ་བཅས།།
