ཕྱི་ལོ་ ༢༠༡༨ ཟླ་ ༧ ཚེས་ ༢༧ རེས་གཟའ་པ་སངས།

༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༧ ཚེས་ ༢༣ ཉིན་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ཊོ་རོན་ཊོ་ས་གནས་སུ་རྟེན་གཞི་བྱས་པའི་བྱམས་བརྩེ་ཆོས་གླིང་དང་། བཀའ་བརྒྱུད་ཀརྨ་བསོད་ནམས་དར་རྒྱས་གླིང་ཆོས་ཚོགས་བཅས་ལ་འཚམས་གཟིགས་གནང་རྗེས།  ཉིན་རྒྱབ་ཆུ་ཚོད་ ༣ ཐོག་གངས་ལྗོངས་ཆོས་ལྡན་གླིང་གི་ཚོགས་ཁང་ནང་ས་གནས་བོད་རིགས་མི་མང་རྣམས་ལ་གསུང་བཤད་གནང་ཡོད།

དེ་ཡང་བཀའ་བློན་མཆོག་གིས༸གོང་ས་༸རྒྱལ་བ་སྐུ་ཕྲེང་བཅུ་བཞི་པ་ཆེན་པོ་མཆོག་གི་མཛད་འཕྲིན་ནི་༸གོང་ས་སྐུ་ཕྲེང་དང་པོ་ནས་བཅུ་གསུམ་པ་བར་གྱི་མཛད་འཕྲིན་ཡོངས་རྫོགས་ཕྱོགས་གཅིག་ཏུ་བསྡོམས་པ་ལས་ལྡབ་གསུམ་ལས་རྒྱ་ཆེ་བ་དང་གཏིང་ཟབ་པ་ཡོད་པས་ང་ཚོ་བོད་མི་རྣམས་ནས་དུས་རྟག་ཏུ་བཀའ་དྲིན་མ་རྗེད་པ་བྱེད་དགོས་སྐོར་སོགས་དང་།

ད་ལམ་བྱང་ཨ་རིའི་ས་གནས་ཁག་གཅིག་ལ་ཕེབས་དགོས་དོན་ནི། བཀའ་ཤག་སྐབས་འདིས་ལས་ཀ་བྱས་ནས་ལོ་གཉིས་ཕྱིན་པའི་ནང་གང་བྱས་ཡོད་མེད་དང་། ཡོང་རྒྱུའི་ལོ་གསུམ་ནང་གང་གནང་འཆར་ཡོད་པ། ལྔ་དང་ལྔ་བཅུའི་འཆར་སྣང་སོགས་ཀྱི་སྐོར་གསུང་བཤད་གནང་བ་དང་། གཞན་ཡང་ཁོང་གིས་གསུང་དོན་ད་ལྟའི་དུས་སྐབས་འདིར་རྒྱ་ནག་གཞུང་ནས་བོད་མི་ནང་ཁུལ་ཕན་ཚུན་འཁྲུག་རྐྱེན་བཟོ་མཁན་མི་སྣ་མང་པོ་གསོ་སྐྱོང་བྱས་པ་དེ་དག་དངོས་སུ་ལས་ཀ་བྱེད་པའི་དུས་ལ་བབ་ཡོད་ཞེས་ཤོད་བཞིན་ཡོད་པ་ལྟར། ད་ཆ་ལག་བསྟར་བྱེད་ཀྱི་ཡོད་ངེས་པས་བོད་མི་རྣམས་དོགས་ཟོན་བྱེད་དགོས་པའི་ལམ་སྟོན་གནང་སོང་།

ཕྱི་ལོ་ ༢༠༡༨  ཟླ་  ༧  ཚེས་  ༢༥ རེས་གཟའ་ལྷག་པ་ལྷ་དཀར་ཉིན་བཀའ་བརྒྱུད་ཀརྨ་བསོད་ནམས་དར་རྒྱས་གླིང་དགོན་དུ་བོད་ཕྲུག་རྣམས་ཀྱི་བོད་ཡིག་སློབ་གྲྭར་ཕེབས་ནས་སློབ་ཕྲུག་རྣམས་ལ་སོ་སོའི་སྐད་ཡིག་གལ་ཆེན་པོ་ཡིན་པ་དང་དུས་རྒྱུན་དུ་བོད་སྐད་རྒྱག་དགོས་པའི་སྐོར་གསུང་བཤད་གནང་སོང་།

ནང་སྲིད་བཀའ་བློན་མཆོག་ཨ་རིའི་མངའ་སྡེ་ས་གནས་ཁག་དྲུག་དང་། ཁེ་ན་ཌ་ཀྲོ་རོན་ཀྲོ་བཅས་ལ་འཚམས་གཟིགས་ལེགས་གྲུབ་ཀྱིས་ཟླ་འདིའི་ཕྱི་ཚེས ༢༤ ནས་ ༣༡ བར་དགོངས་ཞུ་དང་། ཕྱི་ཟླ ༨ ཚེས་ ༡ ཉིན་ཊོ་རོན་ཊོ་ནས་ལྡི་ལི་བརྒྱུད་རྡ་སར་ཕྱིར་ཕེབས་གནང་རྒྱུ་ཡིན་པ་རེད།

ད་ལན་ནང་སྲིད་བཀའ་བློན་མཆོག་བྱང་ཨ་རིའི་ནང་གཞུང་འབྲེལ་འཚམས་གཟིགས་ཀྱི་ལས་རིམ་སོགས་གོ་སྒྲིག་ཆ་ཚང་བྱང་ཨ་རི་སྐུ་ཚབ་དོན་གཅོད་ཁང་ནས་གནང་ཡོད་པ་དང་། དོན་གཅོད་ལས་བྱེད་དྲུང་གཞོན་བསྟན་འཛིན་ཚེ་དཔག་ལགས་ས་གནས་ཁག་ལ་མཉམ་བཅར་བྱེད་བཞིན་ཡོད་པ་བཅས།།