ཕྱི་ལོ་ ༢༠༡༨ ཟླ་ ༧ ཚེས་ ༡༡ རེས་གཟའ་ལྷག་པ།

༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན།   ཕྱི་ལོ་ ༢༠༡༨ ཟླ ༧ ཚེས ༩ རེས་གཟའ་ཟླ་བ་ཉིན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ཨ་རིའི་གྲོང་ཁྱེར་ནིའུ་ཡོག་ནས་ཝར་མོན་ཊི་མངའ་སྡེར་ཕེབས་འབྱོར་སྐབས་སྦར་མོན་ཊི་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་བསོད་ནམས་ཆོས་འཕེལ་ལགས་དང་ཚོགས་གཞོན་བསྟན་འཛིན་སྒྲོལ་དཀར་ལགས་རྣམ་གཉིས་ཀྱིས་གཙོས་ཚོགས་པའི་རྒྱུན་ལས་དང་མི་མང་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

ཕྱི་ཚེས་ ༡༠ ཉིན་བཀའ་བློན་མཆོག་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིག་ལི་ཧེ་ Patrick Leahy མཆོག་གི་མངའ་སྡེའི་འགན་འཛིན་སྐུ་ཞབས་ཇོན་པེ་ཊིག་ཊེ་རེ་སི་ State Director, John Patrick Tracy མཆོག ཨ་རི་གྲོས་ཚོགས་གོང་མའི་འཐུས་མི་སྐུ་ཞབས་སྦར་ནི་སེན་ཌེར་ Bernie Sanders མཆོག་གི་ཕྱི་འབྲེལ་འགན་འཛིན་ཧེ་ལེ་པེ་རོ་ Haley Pero ལགས། གྲོང་ཁྱེར་སྦར་ལིང་ཊོན་གི་སྤྱི་ཁྱབ་སྐུ་ཞབས་མེའི་རོ་ཝེར་སྦར་སྒེར་Miro Weinberger ལགས། གཞན་ཡང་མངའ་སྡེའི་དཔོན་རིགས་ཁག་གཅིག་མཇལ་འཕྲད་གནང་ཡོད།

དེ་ཉིན་གྱི་ཕྱེད་ཡོལ་ཆུ་ཚོད་ ༥།༣༠ ཐོག་ཝར་མོན་ཊི་ས་གནས་བོད་རིགས་རྣམས་ཚང་འཛོམས་ཐོག་ནང་སྲིད་བཀའ་བློན་མཆོག་གིས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུ་ཁྲིད་པའི་སྐབས་བཅོ་ལྔ་པའི་བཀའ་ཤག་གིས་ལས་ཁུར་ཞུས་ནས་འདས་པའི་ལོ་གཉིས་ནང་ལས་དོན་ཇི་གྲུབ་དང། ལྔ་དང་ལྔ་བཅུའི་འཆར་སྣང་དང་གཉིས་སྨན་དབུ་མའི་ལམ་བཅས་ཀྱི་སྐོར་ངོ་སྤྲོད། དེ་བཞིན་འབྱུང་འགྱུར་ལོ་གསུམ་ནང་མ་འོངས་འཆར་སྣང་དང་གདོང་ལེན་གནང་དགོས་པའི་གནད་དོན་སོགས་ཀྱི་སྐོར་གསུང་བཤད་གནང་ཡོད།

བཀའ་བློན་མཆོག་དང་ལྷན་བྱང་ཨ་རི་སྐུ་ཚབ་དོན་ཁང་གི་ལས་བྱེད་བསྟན་འཛིན་ཚེ་དཔག་ལགས་ཕེབས་ཡོད་པ་བཅས།།