༢༠༡༨ ཟླ་ ༧ ཚེས་ ༨ རེས་གཟའ་ཉི་མ།
༄༅། །འདི་ག་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་ངག་དབང་ཐོགས་མེད་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༧ ཚེས་ ༧ རེས་གཟའ་ཉི་མ་ཉིན་གྱི་ཕྱེད་ཡོལ་ཆུ་ཚོད་ ༥ ཐོག་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ལ་དྭགས་བསོད་ནམས་གླིང་མི་མང་ཚོགས་ཁང་ནང་དུ་ལ་དྭགས་ཁུལ་གྱི་བོད་མི་རྣམས་ལ་གསུང་བཤད་གནང་ཡོད།
སྐབས་དེར་ཤེས་རིག་དྲུང་ཆེ་ཀརྨ་སེངྒེ་ལགས་དང་ལ་སྤྱི། ས་གནས་འཐུས་ཚོགས་ཀྱི་ཚོགས་གཙོ། བྱང་ཐང་འབྲེལ་མཐུད་པ། ས་གནས་རང་བདེན་ཚོགས་ཆུང་། དེ་བཞིན་ས་གནས་གཞོན་ནུ་དང་བུད་མེད་ཚོགས་པ། བརྒྱ་དཔོན། གཡུང་དྲུང་བོན་གྱི་དགོན་པ་དང་བཀའ་བརྒྱུད་དགོན་པའི་སྐུ་ཚབ། བསོད་ནམས་གླིང་མང་ཚོགས་བཅས་ཚང་འཛོམས་ཐོག་ཀྱི་ཐོག་མར་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ཀྱིས་གཙོས་རང་ལུས་མེར་སྲེག་གནང་མཁན་སྤུན་ཟླ་ཡོངས་ལ་གདུང་སེམས་མཉམ་སྐྱེ་མཚོན་སླད་སྐར་མ་གཅིག་རིང་མྱ་ངན་གུས་འདུད་ཞུས། དེ་ནས་ལ་སྤྱི་ཚེ་བརྟན་དབང་ཕྱུག་ལགས་ཀྱིས་ལོ་འཁོར་ལས་བསྡོམས་སྒྲོགས་སྦྱང་གནང་།
དེ་རྗེས་དཔལ་ལྡན་སྲིད་སྐྱོང་མཆོག་གིས་གཙོ་ཆེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་ལྟར་བོད་མི་ནང་ཁུལ་ཆོལ་ཁ་དང་ཆོས་ལུགས་ཀྱི་འཐེན་འཁྱེར་མ་བྱས་པར་མཐུན་སྒྲིལ་རྡོག་རྩ་ཆིག་སྒྲིལ་ཐོག་ནས་བོད་དོན་བདེན་མཐའ་གསལ་སླད་མུ་མཐུད་འབད་བརྩོན་བྱེད་དགོས་གལ་དང་།
བོད་ནང་ལ་མཚོན་ན་ཕྱི་ལོ་ ༢༠༠༩ ནས་བཟུང་ད་བར་གཞིས་ལུས་མི་ ༡༥༢ རང་ལུས་མེར་སྲེག་བཏང་ནས་རྒྱ་ནག་གཞུང་གི་དྲག་གནོན་ཅན་གྱི་སྲིད་བྱུས་ལ་ངོ་རྒོལ་བྱེད་བཞིན་ཡོད་སྐོར། ལོ་ལྟར་སྤྱི་ནོར་༸གོང་ས་༸སྐྱབས་མགོན་པོ་ཆེན་པོ་མཆོག་ལ་དྭགས་སུ་ཆིབས་སྒྱུར་བཀའ་དྲིན་སྐྱོང་བཞིན་ཡོད་པ་མ་ཟད། བར་ལམ་ནས་༸སྐུའི་འཁྲུངས་སྐར་དུས་ཆེན་ཡང་འདིར་སྲུང་བརྩི་མཛད་བཞིན་པ་ནི་ཧ་ཅང་བསོད་ནམས་ཀྱི་བགོ་སྐལ་ཡིན་པ་དང་།
མགོན་པོ་གང་ཉིད་མཆོག་ད་ཆ་དགུང་ནའི་བབ་ཀྱི་ཆ་ནས་༸སྐུ་ངལ་གསོ་གནང་མཛད་དགོས་པ་ཧ་ཅང་གལ་ཆེ་ཡིན་པ་བོད་མི་ཚོས་ངོས་འཛིན་ཞུ་བཞིན་ཡོད་ཀྱང་། ཚང་མས་མཇལ་ཁ་ཞིག་ཐོབ་ན་བསམ་པའི་ཀུན་སློང་འོག་མཇལ་ཁ་ཐོབ་རྒྱུར་འཚང་ཁ་ཤིག་ཤིག་བྱས་པ་ཡིན་ན་༸སྐུ་ངལ་ཇི་ལྟར་གསོ་གནང་མཛད་ཐུབ་མིན་ཤེས་གསལ་ཡིན་སྟབས། ཞལ་ནས་གསུང་པ་དང་ལག་ལེན་མཚུངས་པ་བྱེད་དགོས་སྐོར་གསུངས། དཔལ་ལྡན་སྲིད་སྐྱོང་ངོས་ཀྱང་དེ་སྔ་ལ་དྭགས་ནང་པའི་ཚོགས་པའི་སྐུ་ཚབ་༸གོང་ས་མཆོག་ལ་དྭགས་སུ་གདན་ཞུའི་གསོལ་འདེབས་ཞུ་ཆེད་རྡ་སར་བཅར་སྐབས་མཛད་འཆར་མང་པོ་མ་བཟོ་རོགས་ཞེས་འབོད་སྐུལ་གནང་ཡོད་སྐོར་དང་།
དེ་བཞིན་སྲིད་སྐྱོང་མཆོག་གིས་ཆུ་ཚོད་ ༢།༣༠ ཐོག་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་འགན་འཛིན་དང་སླེ་རྫོང་དཔོན་སོགས་དང་མཇལ་ནས་སླེ་བྱང་བོད་མི་རྣམས་ཀྱི་བདེ་སྡུག་དང་འབྲེལ་བའི་གནད་དོན་བཅུ་གསུམ་ཐོག་གོ་བསྡུར་གནང་བ་དང་། ལྷག་པར་གཞིས་ཆགས་ནང་ཁུལ་ལམ་བཟོ་ཡར་རྒྱས་དང་བྱང་ཐང་མ་ཆུ་ས་ཁུལ་ནས་བོད་མི་མི་ཚང་ ༡༣ སླེ་རུ་གནས་སྤོ་བྱ་རྒྱུའི་ཆེད་ས་ཆ་གནང་རོགས་ཞུས་པའི་སྐོར།
ཕྱོགས་མཚུངས་ཨ་རིའི་གཞུང་གིས་བོད་མི་བཙན་བྱོལ་བ་རྣམས་ལ་དེ་སྔ་ལས་རོགས་དངུལ་སྤར་ཆ་གནང་ཡོད་པ་དང་། རྒྱ་གར་གཙོ་བོར་གྱུར་བའི་རྒྱལ་སྤྱིའི་གཞུང་མང་གཉིས་ལ་བཀའ་ཤག་གིས་ཐུགས་རྗེ་ཆེ་ཞུའི་ལས་འགུལ་སྤེལ་བཞིན་པའི་སྐོར་སོགས་ངོ་སྤྲོད་གནང་ཡོད་པ་མ་ཟད་མི་མང་གི་དྲི་བར་ལན་འདེབས་གནང་ཞིབ་རྒྱས་གནང་ཡོད་པ་བཅས། །
