ཕྱི་ལོ་ ༢༠༡༨ ཟླ་ ༧ ཚེས་ ༡༤ རེས་གཟའ་སྤེན་པ།
༄༅། །བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་ནས་ཕྱི་ཟླ་ ༧ ཚེས་ ༨ ཉིན་ཕ་རན་སི་བོད་རིགས་ཚོགས་པའི་གོ་སྒྲིག་ཞུས་པའི་༸གོང་ས་མཆོག་གི་སྐུའི་འཁྲུངས་སྐར་དུས་ཆེན་གྱི་སྐུ་མགྲོན་གཙོ་བོར་ལྷན་ཞུགས་གནང་། དང་ཐོག་ཕ་རན་སི་རྒྱལ་ཡོངས་ནང་པའི་བསྟི་གནས་སུ་དཀར་ཕྱོགས་སྐྱོང་བའི་ལྷ་སྲུང་རྣམས་ལ་སྐུའི་བསང་གསོལ་ཟབ་རྒྱས་དང། དེ་ནས་མཛད་སྒོ་དངོས་གཞི་དབུ་འཛུགས་ཀྱིས་ཐོག་མར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་དཔར་མཐོང་གྲོལ་རིན་པོ་ཆེ་བཞུགས་ཁྲིར་གདན་ཞུ་དང། དེ་རྗེས་སྐུ་མགྲོན་གཙོ་བོ་མཆོག་ནས་མཎྜལ་རྟེན་གསུམ་འདེགས་འབུལ་གྱིས་རིམ་བཞིན་སྐུ་མགྲོན་དང་གནད་ཡོད་མི་སྣ་རྣམ་པས་སྐུ་དཔར་རིན་པོ་ཆེར་མཇལ་ཞུ་གྲུབ་མཚམས། ཕ་རན་སི་བོད་རིགས་ཚོགས་པའི་ཚོགས་གཙོ་རྒན་སྤེན་པ་ཚེ་རིང་ལགས་ནས་དུས་ཆེན་དང་འབྲེལ་བའི་གསུང་བཤད་གནང་། དེ་ནས་སྐུ་ཚབ་དོན་གཅོད་བཀྲིས་ཕུན་ཚོགས་ལགས་ནས་༸གོང་ས་མཆོག་གི་༸སྐུའི་གསང་བ་གསུམ་དང་ཐུགས་འགན་དམ་བཅའ་ཁག་སོགས་ངོ་སྤྲོད་གནང།
དེ་ནས་དམིགས་བསལ་སྐུ་མགྲོན་ཕ་རན་སི་གྲོས་ཚོགས་གོང་མའི་འཐུས་མི་སྐུ་ཞབས་ Andre Gattolin མཆོག་ནས་༸གོང་ས་མཆོག་ནི་བོད་མི་ཙམ་མ་ཚད་འཛམ་གླིང་སྤྱིའི་དབུ་འཁྲིད་གལ་ཆེ་ཞིག་ཡིན་པ་དང་ཁོང་སྐུ་ཚེ་ཡུན་དུ་རྟན་དགོས་པའི་སྨོན་འདུན་དང་། ལྷག་པར་ཕ་རན་སིར་གནས་འཁོད་བོད་མི་ཚོས་ཕ་རན་སིར་ཐུགས་རྗེ་ཆེ་ཞུ་ཞེས་གླུ་གཞས་གཟིགས་འབུལ་ཞུས་པར་དགའ་ཚོར་གྱིས་ཕ་རན་སི་ངོས་ནས་༸གོང་ས་མཆོིག་དང་གང་ཉིད་ཀྱི་ཆབ་འབངས་བོད་མི་ཚོར་ཡང་སྙིང་དབུས་ནས་ཐུགས་རྗེ་ཆེ་ཞུ་དང།
ཁོང་ནས་བོད་དོན་ཐོག་མུ་མཐུད་ཐུགས་འཁུར་བཞེས་རྒྱུ་སོགས་ཀྱི་གསུང་བཤད་གནང་། དེ་ནས་དེ་ཉིན་གྱི་སྐུ་མགྲོན་གཙོ་བོ་དཔལྡན་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་ནས་མཛད་སྒོར་ཕེབས་པའི་སྐུ་མགྲོན་རྣམ་པ་དང་ཕྱི་ནང་མི་མང་ཡོངས་ལ་བཀའ་ཤག་གི་ངོས་ནས་འཚམས་ཞུ་དང་དཔལྡན་བཀའ་ཤག་གི་ཡོངས་ཁྱབ་གསུང་བཤད་སྙན་སྒྲོན་གནང་མཚམས་༸གོང་ས་མཆོག་གི་སྐུ་དྲིན་དྲན་གསོ་ཞུ་དགོས་པ་དང་མགོན་པོ་མཆོག་གི་བཀའ་སློབ་སྙིང་བཅངས་ཀྱིས་ལག་བསྟར་ཞུ་ཕྱོགས། གཉིས་སྨན་དབུ་མའི་ལམ་གྱི་སྲིད་བྱུས་འོག་བོད་རྒྱའི་དཀའ་རྙོག་སེལ་ཐབས། བཀའ་ཤག་གི་ལྔ་དང་ལྔ་བཅུའི་སྤྱི་ཡོངས་ཀྱི་འཆར་སྣང་དང་ད་ལྟ་འགྲོ་དང་འགྲོ་བཞིན་པའི་འཛིན་སྐྱོང་གི་ལས་དོན་གལ་ཆེ་ཁག་ངོ་སྤྲོད་གནང་། དེ་བཞིན་བོད་མིའི་ནང་ཁུལ་མཐུན་ལམ་རྡོག་རྩ་ཆིག་སྒྲིལ་དང།
བོད་མི་ཚོས་རང་གི་སྐད་ཡིག་རིག་གཞུང་བཅས་པ་མི་ཉམས་གོང་འཕེལ་དགོས་པ། སྤྱི་ཚོགས་དྲ་ལམ་བདེ་སྤྱོད་ཚད་ལྡན་དགོས་སྐོར་བཅས་ཀྱི་ཐོག་བཀའ་སློབ་གནང་། དེ་རྗེས་སྐུ་མགྲོན་གཙོ་བོ་མཆོག་ནས་བོད་རིགས་ཚོགས་པའི་རྒྱུན་ལས་གོང་མ་རྣམས་ལ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་གནང་བའི་ཕྱག་འཁྱེར་ཁག་གསོལ་སྩལ་གནང་བསྟུན། སྐུ་མགྲོན་གཙོ་བོ་མཆོག་ནས་གལ་ཆེའི་སྐུ་མགྲོན་རྣམ་པར་ཐུགས་རྗེ་ཆེ་ཞུའི་བརྙན་འཕྲིན་གྱི་འོད་སྡེར་འབུལ་ལམ་ཞུས་ཏེ་འཁྲུངས་སྐར་གྱི་མཛད་སྒོ་དངོས་གཞི་ལེགས་གྲུབ་བྱུང་བ་དང། ཉིན་རྒྱབ་བོད་ཆོལ་གསུམ་ཁྱོན་ཡོངས་ཀྱི་གཞས་སྣ་ཁག་འདི་ཁུལ་ཡོད་པའི་ཚོགས་སྐྱིད་ཁག་ནས་གཟིགས་འབུལ་དང
ཕྱི་དྲོ་དཔལ་ལྡན་དཔལ་འབྱོར་བཀའ་བློན་མཆོག་ནས་སླར་ཡར་མང་ཚོགས་འདུ་འཛོིམས་ཐོག་བཙན་བྱོལ་བོད་མིའི་བཅའ་ཁྲིམས་དང་ཁྲིམས་ཡིག་ཁག་གི་དགོངས་དོན་བོད་མི་ཡོངས་ནས་དང་བླངས་དཔྱ་དངུལ་དུས་ཐོག་སྒྲུབ་འབུལ་དགོས་པའི་དགོས་པ་དང་དམིགས་ཡུལ་བཅས་པ་ཞིབ་ཕྲ་ངོ་སྤྲོད་དང་ལྷག་པར་བོད་མི་ཡོངས་ལ་བཅའ་ཁྲིམས་ནས་བཀུར་བའི་ལས་འགན་སོགས་གསལ་བཤད་མཐིལ་ཕྱིན་གནང་། དེ་རྗེས་བོད་རིགས་ཚོགས་པའི་རྒྱན་ཤོག་རྒྱན་དཀྲུག་དང་བྱ་དགའ་ཐོབ་མཁན་རྣམས་ལ་དཔལ་འབྱོར་བཀའ་བློན་མཆོིག་ནས་བྱ་དགའ་གསོལ་སྩལ་གནང་བ་དང་བསྟུན། དེར་འཛོམས་རྒན་གཞོན་དར་གསུམ་ལྷན་འཛོམས་ཐོག་སྒོར་གཞས་ལ་རོལ་ཏེ་དེ་ཉིན་རྒྱལ་བའི་འཁྲུངས་སྐར་གྱི་མཛད་སྒོ་ཐོག་མཐའ་བར་གསུམ་དུ་ལེགས་གྲུབ་ངང་མཇུགས་སྒྲིལ་བྱུང་། ད་རེས་ཀྱི་འཁྲུངས་སྐར་མཛད་སྒོའི་ཐོག་དག་པོ་རིན་པོ་ཆེས་དབུས་རིས་མེད་ཆོས་བརྒྱུད་ཁག་གི་སྐུ་ཚབ་བླ་མ་ཁག་གི་གཙོས་ཕྱི་ནང་མང་ཚོགས་ ༣༠༠༠ བརྒལ་བ་མཉམ་བཞུགས་གནང་ཡོད།
དེ་རྗེས་ཕན་རན་སི་དོན་ཁང་དུ་འདི་ཟླའི་ཚེས་ ༩ ནས་ ༡༢ བར་དང་བླངས་དཔྱ་དངུལ་ལག་དེབ་བཟོ་ཕྱོགས་དང་འབྲེལ་བའི་དཀའ་སེལ་སླད་ཉིན་བཞིའི་རིང་ལས་འགུལ་བརྩམས་པར་བོད་མི་ཁྱོན་ ༡༦༠ ཡི་དཀའ་ངལ་སེལ་ཐུབ་པ་དང་། ཕྱི་ཚེས་ ༡༣ ཞོགས་པ་ཕ་རན་སི་རྒྱལ་ས་པེ་རི་སི་ནས་སྦེལ་ཇམ་རྒྱལ་ས་སྦར་སིལ་ཕྱོགས་སུ་ཕེབས་ཐོན་གནང་ཡོད། ད་རེས་དཔལྡན་བཀའ་བློན་མཆག་གི་ལྷན་དུ་དཔལ་འབྱོར་ལས་ཁུངས་གྲངས་ཐོ་ཚན་པའི་འགན་འཛིན་དྲུང་ལས་སྐལ་བཟང་ཆོས་སྒྲོན་ལགས་ཀྱང་ལྷན་བཅར་ཞུས་གནང་ཡོད་པ་རེད།
