ཕྱི་ལོ་ ༢༠༡༨ ཟླ་ ༧ ཚེས་ ༡༧ རེས་གཟའ་མིག་དམར།
༄༅། །འདི་གར་སྦར་སིལ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་སྦེལ་ཇེམ་ཁུལ་དུ་གཞུང་འབྲེལ་ལས་འཆར་ཁག་ལེགས་པར་གྲུབ་རྗེས་ཕྱི་ལོ་ ༢༠༡༨ ཟླ་ ༧ ཚེས་ ༡༥ སྔ་དྲོར་ཧོ་ལེནཌ་དུ་ཕེབས་ཐོན་གནང་། ཉིན་རྒྱབ་ཆུ་ཚོད་ ༢ པའི་ཐོག་ཧོ་ལེནཌ་གནས་སྡོད་བོད་མི་རྣམས་ཚོགས་བསྐོང་གིས་བོད་རིགས་ཚོགས་པའི་ཚོགས་གཙོ་བློ་བཟང་ཆོས་དར་ལགས་ཀྱིས་ལས་བསྡོམས་སྙན་སྒྲོན་གནང་རྗེས།
དཔལ་འབྱོར་བཀའ་བློན་མཆོག་གིས་མི་མང་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྙིང་བཅངས་ཀྱིས་དངོས་སུ་ལག་ལེན་ཐུབ་པ་དགོས་རྒྱུ་དང་། མགོན་པོ་མཆོག་གི་ད་རེས་འཁྲུངས་སྐར་སྐབས་བཀའ་སློབ་གནང་བ་དེ་དག་ཚང་མས་སེམས་ནང་འཇགས་དགོས། ཁོང་གི་སྐུ་དྲིན་ནམ་ཡང་མ་བརྗེད་པར་ཡང་ནས་ཡང་དུ་དྲན་གསོ་ཞུ་རྒྱུ་གལ་ཆེ་ཡིན་སྐོར་དང་། བོད་མིའི་སྒྲིག་འཛུགས་ཀྱི་ལངས་ཕྱོགས་གཉིས་སྨན་དབུ་མའི་ལམ་གྱི་སྲིད་བྱུས་འོག་བོད་རྒྱའི་དཀའ་རྙོག་སེལ་ཐབས། སྤྱི་ཚོགས་སྲ་བརྟན་ཡོང་ཐབས་ལ་དམིགས་ཏེ་བཀའ་ཤག་གི་ལྔ་དང་ལྔ་བཅུའི་སྤྱི་ཡོངས་ཀྱི་འཆར་སྣང་དང་། ད་ལྟ་འགྲོ་བཞིན་པའི་འཛིན་སྐྱོང་གི་ལས་དོན་གལ་ཆེ་ཁག་ངོ་སྤྲོད་གནང་ཡོད། དེ་བཞིན་བོད་མིའི་ནང་ཁུལ་མཐུན་ལམ་རྡོག་རྩ་ཆིག་སྒྲིལ་དང་མཐུན་སྒྲིལ། སྐད་ཡིག་མི་ཉམས་རྒྱུན་འཛིན་བཅས་ལ་ཐུགས་སྣང་སྔར་ལྷག་ཆེ་བཞེས་དགོས་རྒྱུ་ནི་ཆབ་སྲིད་ཀྱི་གནད་འགག་ཞིག་ཡིན་པར་ཚང་མས་རང་དོན་རང་གཅེས་དགོས་རྒྱུ་གལ་ཆེའི་སྐོར། འདི་ག་ཧོ་ལེནཌ་ནང་བོད་རིགས་ཚོགས་པ་མ་གཏོགས་གཞན་ཚོགས་པ་སྐྱིད་སྡུག་གང་ཡང་མེད་པ་དེ་ནི་བསྔགས་བརྗོད་ཀྱི་རང་བཞིན་ཡིན་པ་དང་། སྤྱི་ཚོགས་དྲ་ལམ་བདེ་སྤྱོད་ཚད་ལྡན་དགོས་སྐོར་བཅས་ཀྱི་ཐོག་གསུང་བཤད་གནང་། དེ་བཞིན་བོད་མི་ཚོས་དང་བླངས་དཔྱ་དངུལ་དུས་ཐོག་ཏུ་འབུལ་དགོས་པའི་དགོས་པ་དང་དམིགས་ཡུལ་བཅས་ཞིབ་ཕྲ་ངོ་སྤྲོད་དང་ལྷག་པར་བོད་མི་ཡོངས་ལ་བཅའ་ཁྲིམས་ནས་བཀུར་བའི་ལས་འགན་སོགས་གསལ་བཤད་མཐིལ་ཕྱིན་གནང་།
གོང་ཚེས་ཉིན་གྱི་ཕྱི་དྲོ་ཆུ་ཚོད་ ༨ བར་དང་། ཕྱི་ཚེས་ ༡༦ ཉིན་བཅས་སོ་སོར་ཁུལ་འདིའི་བོད་མི་མང་ཚོགས་ཀྱི་དང་བླངས་དཔྱ་དངུལ་ལག་དེབ་དང་འབྲེལ་བའི་དཀའ་སེལ་གནང་སླད་མི་མང་གི་བདེ་སྡུག་སྙན་གསན་ཞུས་ཁག་ལ་གསན་བཞེས་ཀྱིས་མི་གྲངས་ ༡༠༠ ལྷག་དཀའ་སེལ་ཐུབ་པ་བྱུང་་ཡོད། གཞན་ཡང་རྒྱལ་སྤྱིའི་བོད་དོན་ལས་འགུལ་ཁང་གི་ངེས་སྟོན་པ་ཚེ་རིང་བྱམས་པ་ལགས་ཀྱི་གཙོས་ལས་བྱེད་ཁག་ཅིག་དང་མཇལ་འཕྲད་ཀྱིས་བོད་དོན་སྐོར་བཀའ་བསྡུར་གནང་ཡོད་པ་རེད།
ཐེངས་འདིར་དཔྱ་དངུལ་ལག་དེབ་དཀའ་སེལ་དང་འབྲེལ་བའི་ལས་འགུལ་འདིའི་ཆེད་དཔལ་འབྱོར་ལས་ཁུངས་ཀྱི་གྲངས་ཐོ་ཚན་པའི་འགན་འཛིན་སྐལ་བཟང་ཆོས་སྒྲོན་ལགས་དང་། སྦེལ་ཇམ་དོན་ཁང་གི་རྩིས་པ་བསྟན་འཛིན་ལེགས་བཤད་ལགས་ཀྱང་ལྷན་བཅར་ཞུས་ཡོད་པ་རེད། ཕྱི་ཚེས་ ༡༧ ཞོགས་པ་ཨེམ་སར་ཊམ་ནས་སེ་སྤན་རྒྱལ་ས་སྦར་སི་ལོ་ནར་ཕེབས་ཐོན་གྱིས་ཉིན་གཉིས་རིང་དེ་ཁུལ་བོད་མི་ཚོ་མཇལ་འཕྲད་གནང་རྒྱུ་ཡིན་འདུག་བཅས།།
