ཕྱི་ལོ་ ༢༠༡༨ ཟླ་ ༧ ཚེས་ ༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༨ ཟླ་ ༧ ཚེས་ ༦ ཉིན་ཕ་རན་སིའི་གྲོས་ཚོགས་ France’s National Assembly འོག་མའི་འཐུས་མི་ལྕམ་སྐུ་ཨེ་ལི་ཛེ་བྷེ་ཐི་ Ms Elizabeth Toutut མཆོག་གིས་གོ་སྒྲིག་གནང་སྟེ་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་བརྒྱད་ཅུ་གྱ་གསུམ་ལ་ཕེབས་པའི་སྐུའི་འཁྲུངས་སྐར་དུས་ཆེན་ཁྱད་པར་ཅན་དེ་བཞིན་ཕ་རན་སིའི་གྲོས་ཚོགས་འོག་མའི་ནང་སྲུང་བརྩི་གཟབ་རྒྱས་ཞུས་ཡོད་པ་དང་། སྐབས་དེར་མཛད་སྒོའི་ཐོག་ཕ་རན་སིའི་གྲོས་ཚོགས་གོང་འོག་གཉིས་ཀྱི་འཐུས་མི་ཁག་གཅིག་དང་། ཕྱི་རྒྱལ་སྐུ་ཚབ་རྣམ་པ། བོད་དོན་རྒྱབ་སྐྱོར་ཚོགས་པའི་སྐུ་ཚབ་རྣམ་པ། དེ་བཞིན་གཞུང་འབྲེལ་མ་ཡིན་པའི་སྐུ་ཚབ་རྣམ་པ་སོགས་ཕེབས་ཡོད།
དེ་ཡང་ལྕམ་སྐུ་ཨེ་ལི་ཛེ་བྷེ་ཐི་མཆོག་གིས་མཛད་སྒོ་དབུ་འཛུགས་ཀྱིས་ད་ལྟའི་བོད་ནང་གི་ཛ་དྲག་གི་གནས་སྟངས་སྤྱི་དང་། ལྷག་པར་བོད་ཀྱི་སྐད་ཡིག་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་ལགས་ཀྱིས་གཙོས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་དང་། དེ་བཞིན་བོད་མི་ ༡༥༠ ལྷག་གིས་བོད་བསྟན་པ་ཆབ་སྲིད་དོན་དུ་རང་གི་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་མཁན་བོད་ཀྱི་རྒྱལ་གཅེས་པ་རྣམས་ང་ཚོས་ཡིད་ལ་ལྷང་ངེར་དྲན་བཞིན་ཡོད་པས་ནམ་ཡང་བརྗེད་མི་སྲིད། ཅེས་དང་། ཕ་རན་སི་གཞུང་མང་གཉིས་ནས་མུ་མཐུད་བོད་ཀྱི་བདེན་དོན་ལ་རྒྱབ་སྐྱོར་ཞུ་རྒྱུ་ཡིན། ཞེས་གསུང་། ཕྱོགས་མཚུངས་འཛམ་གླིང་ཞི་བདེའི་དེད་དཔོན། བོད་ཀྱི་བླ་ན་མེད་པའི་དབུ་ཁྲིད། སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་པའི་བཀྲ་ཤིས་སྨོན་འདུན་ཞུ་རྒྱུ་ཡིན། ཞེས་གསུངས།
དེ་རྗེས་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་བོད་པ་ཚོར་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལྟ་བུ་དབུ་ཁྲིད་ཅིག་ཡོད་པ་ནི་བོད་མི་སྤྱི་བོ་གནམ་བསྟན་ཡོངས་རྫོགས་ཀྱི་བསོད་ནམས་རེད། ཅེས་དང་།
མགོན་པོ་གང་ཉིད་མཆོག་སྐུ་ན་ཕྲ་བའི་དུས་ནས་བོད་འབངས་ཡོངས་ལ་བྱམས་བརྩེས་བསྐྱངས་དང་སྐྱོང་མུས་ཡིན་པས། བོད་མི་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་རྗེས་དྲན་དང་བཀའ་གསུང་ཅི་སྒྲུབ་ཞུ་དགོས་པའི་འབོད་སྐུལ་ཞུ་རྒྱུ་ཡིན་སྐོར་དང་།
ཕྱོགས་མཚུངས་དུས་ཚོད་གཉེན་འཕྲང་ཅན་གྱི་སྐབས་འདིར་ཕ་རན་སི་གཞུང་མང་གཉིས་ནས་ལྷག་བསམ་ཟོལ་མེད་ཀྱིས་བོད་དོན་ཆེད་རྒྱབ་སྐྱོར་གནང་བར་བརྟེན་ཕྱི་ལོ་ ༢༠༡༨ ལོ་འདི་བཞིན་ཕ་རན་སི་གཞུང་མང་གཉིས་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་རྒྱུ་ཡིན། ཞེས་གསུངས།
དཔའ་འབྱོར་བཀའ་བློན་ཀརྨ་ཡེ་ཤེས་མཆོག་དང་སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་རྣམ་གཉིས་ནས་
ཕ་རན་སིའི་གྲོས་ཚོགས་འོག་མའི་འཐུས་མི་ལྕམ་སྐུ་ཞབས་ཨེ་ལི་ཛེ་བྷེ་ཐི་མཆོག་གིས་གསུང་བཤད་གཟབ་རྒྱས་གནང་བར་ཐུགས་རྗེ་ཆེ་ཞུ་གནང་།
སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ཕ་རན་སི་འབྲེལ་མཐུད་པ་རྣམ་རྒྱལ་བསམ་གྲུབ་ལགས་རྣམ་གཉིས་ནས་བོད་ཀྱི་རྒྱལ་དར་སྒྲེང་འཛུགས་གནང་བར་ཡུ་རོབ་གཞུང་མང་གཉིས་ལ་ཐུགས་རྗེ་ཆེ་ཞུ་ Thank You Europe – for hosting the Tibetan Flag ། ཞེས་པའི་དཔེ་དེབ་གཅིག་དང་ཕ་རན་གཞུང་མང་གཉིས་ལ་ཐུགས་རྗེ་ཆེ་ཞུ་ Merci La France – Thank You France ཞེས་པའི་བརྙན་ཐུང་ཞིག་བཅས་དབུ་འབྱེད་གནང་ཡོད། །
