ཕྱི་ལོ་ ༢༠༡༨ ཟླ་ ༧ ཚེས་༢༠ རེས་གཟའ་པ་སངས།

༄༅། །ཕྱི་ལོ་ ༢༠༡༨ ཟླ་ ༧ ཚེས་ ༡༢ ཉིན་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཨོ་སི་ཊི་རི་ཡ་Austria ནས་ཨིན་ཡུལ་དུ་ཕེབས་འབྱོར་གནང་ཡོད།    དེ་ཡང་བཀའ་བློན་མཆོག་ཟླ་འདིི་ཕྱི་ཚེས་ ༡༢ ནས་ ༡༨ བར་ཨིན་ཡུལ་གྱི་གནད་ཡོད་མི་སྣ་ཁག་གཅིག་དང་མཇལ་འཕྲད་དང་། ནང་པའི་ཆོས་ཚོགས་ཁག་སོགས་ལ་འཚམས་གཟིགས་གནང་ཡོད། 

བཀའ་བློན་མཆོག་གིས་ཨིན་ཡུལ་བོད་ཀྱི་ཐེབས་རྩ་ཁང་གི་འཛིན་སྐྱོང་སྟངས་འཛིན་འོག་ཡོད་པའི་ལོན་ཌོན་བོད་ཀྱི་སྐད་ཡིག་དང་རིག་གཞུང་སློབ་གྲྭའི་བོད་ཀྱི་སྐད་ཡིག་དང་སྒྲ་སྙན་གྱི་འཛིན་གྲྭར་གཟིགས་ཞིབ་ཀྱིས་སློབ་ཕྲུག་དང་། ཕ་མ། དགེ་རྒན་རྣམས་ལ་སློབ་ཕྲུག་རྣམས་ཀྱིས་འཛིན་གྲྭའི་བྱེད་སྒོར་མཉམ་ཞུགས་གནང་ཕྱོགས་དང་། སྒྲ་སྙན་གཏོང་འདོད་སོགས་མཐོང་བར་ཧ་ཅང་དགའ་ཚོར་ཆེན་པོ་བྱུང་སྐོར་དང་། དེ་བཞིན་བོད་ཀྱི་རིག་གཞུང་དང་སྐད་ཡིག་གི་གལ་གནད་རང་བཞིན་དང་།  ཕ་མ་དང་སློབ་ཕྲུག་རྣམས་ནས་བོད་ཀྱི་སྐད་ཡིག་སྦྱང་བརྩོན་སླད་འབད་བརྩོན་ཤུགས་ཆེ་ཙམ་གནང་དགོས་པའི་སྐོར་གསུང་བཤད་གནང་། ཨིན་ཡུལ་བོད་ཀྱི་སྐད་ཡིག་དང་རིག་གཞུང་སློབ་གྲྭར་སློབ་ཕྲུག་ལོ་ ༦ ནས་ ༡༦ བར་ཁྱོན་སློབ་ཕྲུག་ ༤༠ དང་། དགེ་རྒན་གྲངས་གསུམ། ཕ་མའི་འཐུས་མི་བཞི་བཅས་ཡོད།

བཀའ་བློན་མཆོག་གིས་ཨིན་ཡུལ་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་བོད་རིགས་རྣམས་དང་ཟུར་དུ་ཐུག་འཕྲད་ཀྱིས་བཀའ་བློན་མཆོག་ཐེངས་འདིར་འཚམས་གཟིགས་སུ་ཕེབས་པའི་དགོས་དམིགས་དང་། བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་ལས་དོན་གནང་ཕྱོགས།  བོད་ཀྱི་ཐུན་མིན་རིག་གཞུང་ཉར་ཚགས་བྱེད་དགོས་རྒྱུ་གལ་ཆེན་པོ་ཡིན་སྐོར་སོགས་ཀྱི་གསུང་བཤད་གནང་ཡོད་པ་མ་ཟད།  བོད་མིའི་སྒྲིག་འཛུགས་ཀྱི་ལངས་ཕྱོགས་གཉིས་སྨན་དབུ་མའི་ལམ་གྱི་སྲིད་བྱུས་སྐོར་དང་། བོད་རྒྱ་གྲོས་མོལ་གྱི་གནས་སྟངས་སྐོར་མང་ཚོགས་ཀྱི་དྲི་བར་ལན་འདེབས་གནང་ཡོད།

 ཕྱི་ཚེས་ ༡༧ ཉིན་ཨིན་ཡུལ་གྲོས་ཚོགས་འཐུས་མི་སྐུ་ཞབས་ Tim Loughton ལགས་ཀྱིས་གཙོ་སྐྱོང་དང་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག་ཚོགས་འདུ་ཞིག་བསྐོང་ཚོགས་གནང་ཡོད། སྐབས་དེར་བཀའ་བློན་མཆོག་གིས་ད་ལྟའི་སྤྱི་ཚོགས་ནང་དུ་ནང་པའི་ལྟ་གྲུབ་ཀྱི་དགོས་མཁོ་ཇི་ཙམ་ཆགས་ཡོད་པའི་སྐོར་ངོ་སྤྲོད་གནང་བ་མ་ཟད། ཨིན་ཡུལ་གྲོས་ཚོགས་འཐུས་མི་དང་། མི་མང་རྣམས་ནས་ད་བར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་ལྷན་མུ་མཐུད་རྒྱབ་སྐྱོར་་ཡོང་བའི་འབོད་སྐུལ་ཞུས། 

དེ་ནས་བཀའ་བློན་མཆོག་ཕྱི་རྒྱལ་དང་རྒྱལ་འབྲེལ་མཐུན་ཚོགས་ལས་ཁུངས་ Foreign & Commonwealth Office ཀྱི་གནད་ཡོད་མི་སྣ་དང་།   དེ་བཞིན་ཝེ་སི་མིན་སི་ཊར་ཨེ་བྷེ་ཡི་ Westminster Abbey སྙན་གྲགས་ཆེ་བའི་ཡི་ཤུའི་མཆོད་ཁང་གི་སྐུ་ཚབ་མཇལ་འཕྲད་གནང་འདུག

ཕྱོགས་མཚུངས་བཀའ་བློན་མཆོག་ཨིན་ཡུལ་དུ་ཡོད་པའི་བོད་བརྒྱུད་ནང་བསྟན་གྱི་ཆོས་ཚོགས་ཁག་ལ་འཚམས་གཟིགས་སུ་ཕེབས་ཏེ་བོད་རིགས་གཙོ་བོར་གྱུར་པའི་ཧི་མ་ལ་ཡ་རི་རྒྱུད་ཀྱི་མི་རིགས་རྣམས་ནས་སྤྱི་ནོར་༸གོང་ས་་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་དཔལ་ནཱ་ལེནྡྲའི་ཆོས་བརྒྱུད་ལ་སློབ་སྦྱོང་བྱེད་དགོས་པའི་སྐོར་གསུང་བཤད་གཟབ་རྒྱས་གནང་ཡོད་པ་མ་ཟད། བོད་ཀྱི་ངལ་སེལ་ཚོགས་པ་དང་། offices of Free Tibet ལས་ཁུངས་བཅས་སུ་འཚམས་གཟིགས་ཕེབས་ཡོད་པ་བཅས།།