ཕྱི་ལོ་ ༢༠༡༨ ཟླ་ ༧ ཚེས་ ༩ རེས་གཟའ་ཟླ་བ།

༄༅། །ཕྱི་ལོ་ ༢༠༡༨ ཟླ་ ༧ ཚེས་ ༦ རེས་གཟའ་པ་སངས་ཉིན་ཨ་རིའི་རྒྱལ་ས་ཝ་ཤིང་ཊོན་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་ཨ་རིའི་སི་ཨེ་ཊལ་ (Seattle) གྲོང་ཁྱེར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༣ ཕེབས་པའི་༸སྐུའི་འཁྲུངས་སྐར་དུས་སྟོན་གྱི་སྐུ་མགྲོན་གཙོ་བོར་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཕེབས་གནང་ཡོད། 

དེ་ཡང་གོང་ཚེས་ཉིན་གྱི་སྔ་དྲོར་ཨ་རིའི་རྒྱལ་ས་ཝ་ཤིང་ཊོན་མངའ་སྡེའི་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚུལ་ཁྲིམས་རྡོ་རྗེ་ལགས་དང་། ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། ཨ་རིའི་ཝ་ཤིང་ཊོན་མངའ་སྡེའི་སྐུ་ཚབ་སྐུ་ཞབས་པི་ཊར་སན་ Strom Peterson ལགས། ས་གནས་བོད་རིགས་བཅས་ཚང་འཛོམས་ཐོག་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུ་དགོས་དོན་ནི་མགོན་པོ་གང་ཉིད་མཆོག་གིས་བཀའ་སློབ་ལམ་སྟོན་སྩལ་བ་དེ་དག་དངོས་སུ་ལག་བསྟར་ཞུས་སླད་དང་། ཕྱོགས་མཚུངས་བོད་པའི་ན་གཞོན་རྣམས་ལ་རང་གི་སྐད་ཡིག་སློབ་ཁྲིད་གནང་དགོས་རྒྱུ་གལ་ཆེན་པོ་ཡིན་སྐོར་སོགས་ཀྱི་གསུང་བཤད་གནང་།

དེ་ནས་ཨ་རིའི་ཝ་ཤིང་ཊོན་མངའ་སྡེའི་སྐུ་ཚབ་སྐུ་ཞབས་པི་ཊར་སན་ Strom Peterson ལགས་ཀྱིས་ཨ་རིའི་སི་ཨེ་ཊལ་ (Seattle) གྲོང་ཁྱེར་དུ་བོད་རིགས་སྤྱི་མཐུན་ཚོགས་པའི་རིག་གཞུང་བསྟི་གནས་ཁང་འཛུགས་སྐྲུན་སླད་རྒྱབ་སྐྱོར་གང་ཐུབ་བྱེད་རྒྱུ་ཡིན་པའི་ཁས་ལེན་གནང་འདུག

དེ་ཉིན་གྱི་དགོང་དྲོ་མཛད་སྒོར་ས་གནས་བོད་རིགས་རྣམས་ཚང་འཛོམས་ཐོག་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་གི་དམིགས་ཡུལ་དང་ཐབས་བྱུས་སོགས་ཀྱི་སྐོར་གསུང་བཤང་གནང་ཡོད་པ་མ་ཟད། ས་གནས་མང་ཚོགས་ཀྱིས་དྲི་བར་ལན་འདེབས་ཀྱང་གནང་ཡོད།

སྐབས་དེར་ཝ་ཤིང་ཊོན་མངའ་སྡེའི་བོད་རིགས་སྤྱི་མཐུན་ཚོགས་པ་དང་། ནུབ་བྱང་བོད་ཀྱི་རིག་གཞུང་ཚོགས་པ། ཨུ་ཏ་བོད་རིགས་སྤྱི་མཐུན་ཆོགས་པ་བཅས་ཀྱིས་བོད་ཀྱི་རིག་གཞུང་འཁྲབ་སྟོན་དང་། རིག་རྩལ་འགྲན་སྡུར་ཞིག་གོ་སྒྲིག་གནང་ཡོད། སྐུ་ཚབ་དོན་གཅོད་མཆོག་གིས་རིག་གཞུང་འཁྲབ་སྟོན་གྱི་མགྲན་སྡུར་ཐོག་ཨང་རིམ་ཐོབ་པ་རྣམས་ལ་བྱ་དགའ་དང་ལག་འཁྱེར་གནང་ཡོད།  མཛད་སྒོར་ཨ་རི་དང་ཁེ་ན་ཌ་ཁུལ་གྱི་བོད་རིགས་ཁྱོན་མི་གྲངས་ ༥༠༠ ཙམ་ཕེབས་ཡོད།

ཕྱོགས་མཚུངས་དེ་ཉིན་སྐུ་ཚབ་དོན་གཅོད་ཀྱིས་གྲོང་ཁྱེར་དུ་རྟེན་གཞིས་བྱས་པའི་ས་སྐྱའི་དགོན་པར་འཚམས་གཟིགས་སུ་ཕེབས་ཡོད།
སྐབས་དེར་སྐུ་ཚབ་དོན་དང་ལྷན་དྲུང་ཡིག་ཚེ་རིང་བཀྲ་ཤིས་ལགས་ལྷན་བཅར་ཞུས་ཡོད་པ་བཅས།།