༢༠༡༨ ཟླ་ ༧ ཚེས་ ༦ རེས་གཟའ་པ་སངས།
༄༅། །འདི་ག་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་ངག་དབང་ཐོགས་མེད་ཀྱིས་ས་གནས་ནས་བཏང་གནས་ནང་འཁོད་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༣ བཞེས་པའི་༸སྐུའི་འཁྲུངས་སྐར་དུས་ཆེན་ཉིན་ལ་དྭགས་སླེ་བྱང་སེར་སྐྱ་མང་ཚོགས་རྣམས་ཀྱིས་ཞི་བའི་ཚལ་ཕོ་བྲང་གི་མདུན་ཐང་དུ་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུ་སྐབས་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་མཚོན་སླད་རིན་ཆེན་གསེར་དངུལ་ལས་གྲུབ་པའི་ཆོས་ཀྱི་འཁོར་ལོ་ཞིག་གཟེངས་རྟགས་སུ་འབུལ་ལམ་ཞུ་རྒྱུ་ཡིན་འདུག དེ་ཡང་ལ་དྭགས་བྱང་ཐང་འབྲེལ་མཐུད་པ་དོན་གྲུབ་རྒྱལ་པོ་ལགས་ཀྱིས་ཐེངས་འདིར་གཟེངས་རྟགས་སྐོར་འགྲེལ་བརྗོད་གནང་དོན་ལྟར་ན། ཕྱི་ཟླ་ ༦ ཚེས་ ༢ ཉིན་ལ་སྤྱི་དབུ་བཞུགས་ཐོག་གཟེངས་རྟགས་གོ་སྒྲིག་ཚོགས་ཆུང་ཞིག་བཙུགས་པ་དང་། ཚོགས་ཆུང་ནང་ཚོགས་མི་བརྒྱད་དང་མང་གཙོའི་ཀ་བ་གསུམ་གྱི་སྐུ་ཚབ་དང་བརྒྱ་དཔོན་འགའ་ཤས་ཡོད། བྱང་ཐང་ས་ཁུལ་ཐག་རིང་བར་བརྟེན་བྱང་ཐང་གི་འགོ་པ་རྣམས་ཚོགས་ཆུང་ནང་དངོས་སུ་མེད་ཀྱང་བྱང་ཐང་འབྲེལ་མཐུད་པས་འགན་ཁུར་ཞུས་ཡོད། ཆོས་ཀྱི་འཁོར་ལོའི་མཚོན་དོན་བཅས་ཀྱི་ཐོག་ལམ་སྟོན་གནང་མཁན་རུ་ཐོག་མཁན་རིན་པོ་ཆེ་མཆོག་བརྒྱུད་གདན་ས་གསུམ་གྱི་དགེ་བཤེས་ཁག་ནས་ཕྱག་རོགས་གནང་ཡོད། རྒྱུ་རིན་ཆེན་གསེར་དངུལ་ལས་གྲུབ་པའི་གཟེངས་རྟགས་འདིར་དངུལ་ཀི་ལོ་ ༢ དང་གསེར་ཏོ་ལ་བཅུ་གཅིག་དང་ཕྱེད་ཀ་ཡོད་སྐོར་གསུངས།
ཆོས་ཀྱི་འཁོར་ལོའི་མཚོན་དོན་མདོར་བསྡུས།
༄༅། །རྒྱ༷ལ་ཀུན་སྙིང་རྗེའི་རང་གཟུགས་སྤྱན་རས་གཟིགས། །རྒྱ༷ལ་བསྟན་ཡོངས་ཀྱི་མངའ་བདག་༸གོང་ས་མཆོག །རྒྱ༷ལ་བའི་དབང་པོ་ཞི་བདེའི་དེད་དཔོན་ལ། །གུས་པས་འདུད་དོ་བརྩེ་བས་རྗེས་སུ་ཟུངས། །ཞེས་སྐྱབས་ཡུལ་ཁྱད་པར་ཅན་ལ་མཆོད་པར་བརྗོད་ཅིང་གསོལ་བ་འདེབས་པའི་ཚིག་གི་མེ་ཏོག་པུཎྜ་རི་ཀས་སྔོན་བསུས་ནས་གང་ཞུ་བར་བྱ་བ་ནི། ཇི་སྐད་དུ། འཇམ་མགོན་བླ་མ་ཙོང་ཁ་པ་ཆེན་པོའི་གསུང་ལས།
འཛམ་བུ་ཆུ་བོ་གསེར་ལས་ལེགས་བྱས་ཤིང་།།རྩིབས་སྟོང་ལྡན་པས་དཔག་ཚད་ལྔ་བརྒྱ་པ། །ཞེས་སོགས་དང་།
སློབ་དཔོན་དབྱིག་གཉེན་གྱིས། ཆོས་ཀྱི་འཁོར་ལོ་མཐོང་བའི་ལམ། །མྱུར་བར་འགྲོ་སོགས་རྩིབས་སོགས་
