ཕྱི་ལོ་ ༢༠༡༨ ཟླ་ ༧ ཚེས་ ༢ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཐེ་ཝན་བོད་ཀྱི་སྐུ་ཚབ་དོན་ཁང་ནས་ཕྱི་ཟླ་ ༧ ཚེས་ ༡ ཉིན་གྱི་སྔ་དྲོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༣ ལ་ཕེབས་པའི་སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་པ་དང་། དེ་ཉིན་གྱི་ཕྱི་དྲོར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་དབུ་བརྙེས་ནས་ལོ་ ༢༠ ཧྲིལ་པོ་འཁོར་བའི་དུས་ཚིགས་བཅས་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་མཛད་སྒོ་དབུ་འཛུགས་ཀྱི་ཐོག་མར་སྐུ་མགྲོན་རྣམ་པས་སྤོས་སྣེ་དང་བཅས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིའི་ཐོག་གདན་ཞུ་རྗེས། སྐྱབས་རྗེ་ཤར་པ་ཆོས་རྗེ་རིན་པོ་ཆེ་མཆོག་གིས་༸གོང་ས་མཆོག་གི་མཛད་པ་འཕྲིན་ལས་ངོ་སྤྲོད་གནང་བ་དང་། ཐེ་ཝན་སྐུ་ཚབ་དོན་ཁང་འགན་འཛིན་ལྷན་ཚོགས་ཀྱི་ཚོགས་མི་ལྕམ་ཧོང་རུས་རའོ་ལགས་ཀྱིས་འདས་པའི་ལོ་ ༢༠ རིང་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་གི་བརྒྱུད་རིམ་ངོ་སྤྲོད་གནང་།
དེ་ནས་སྐུ་མགྲོན་གྱི་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་ཐེ་ཝན་མི་མང་ལ་འཚམས་འདྲི་དང་འབྲེལ། ༸གོང་ས་མཆོག་རྒྱ་གར་དུ་སྐྱབས་བཅོལ་དུ་ཕེབས་རྗེས། བཙན་བྱོལ་གཞུང་མང་རྣམས་མང་གཙོའི་ལམ་དུ་འཁྲིད་གནང་མཛད་དེ་མཐར་སྲིད་དབང་ཡོངས་རྫོགས་མི་མང་གིས་འོས་འདེམས་གནང་བའི་སྲིད་སྐྱོང་ལ་དབང་ཆ་ཆ་ཚང་རྩིས་སྤྲོད་གནང་བའི་བརྒྱུད་རིམ་སྙིང་བསྡུས་ངོ་སྤྲོད་གནང་།
དེ་རྗེས་བོད་མི་རྣམས་ལ་དེང་སྐབས་སྐད་འཕྲིན་སོགས་ནང་བདེན་པ་མིན་པའི་གནས་ཚུལ་གང་མང་ཞིག་བརྒྱུད་སྐུལ་བྱེད་བཞིན་ཡོད་པས། ཚང་མས་ཐུགས་སྣང་ཆེན་པོ་གནང་སྟེ་གནས་ཚུལ་བདེན་པ་དང་རྫུན་མ་གང་ཡིན་ཤེས་རྟོགས་ཐུབ་པ་བྱ་རྒྱུ་གལ་ཆེན་པོ་ཡིན། ཕྱི་ལ་ཡོད་པའི་བོད་མི་རྣམས་མཐུན་ལམ་རྡོག་རྩ་གཅིག་སྒྲིལ་དགོས་པ་སོགས་ཀྱི་ལམ་སྟོན་གསུང་བཤད་གནང་། མཐར་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་ཚོགས་ཞུགས་ཡོངས་ནས་༸རྒྱལ་བའི་ཞབས་བརྟན་གྱི་སྨོན་ལམ་གསུང་འདོན་དང་། ༸རྒྱལ་བའི་བཞུགས་ཁྲི་རིན་པོ་ཆེར་མཇལ་དར་ཕུལ་རྗེས། ཉིན་གུང་དཀར་སྐྱོང་གི་གསོལ་ཚིགས་གྲ་རྒྱས་ཕུལ།
ཉིན་རྒྱབ་ཆུ་ཚོད་ ༢ ཐོག་ཐེ་ཝན་དོན་གཅོད་ལས་ཁུངས་དབུ་བརྙེས་ནས་ལོ་ ༢༠ འཁོར་བའི་ཐུགས་རྗེ་ཆེ་ཞུའི་གཞས་སྣ་འཁྲབ་སྟོན་གྱི་ཐོག་མར་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ངོ་སྤྲོད་འཚམས་སྦྱོར་གྱི་གསུང་བཤད་དང་། ཐེ་སྡོད་བོད་རིགས་ཚོགས་པའི་ཚོགས་གཙོ་བཀྲ་ཤིས་ཚེ་རིང་ལགས་ཀྱིས་གསུང་བཤད་གྲུབ་རྗེས། བོད་ཀྱི་ཟློས་གར་ཚོགས་པས་འཁྲབ་སྟོན་བརྒྱད་དང་། དེ་མིན་ཐེ་ཝན་མི་མང་དང་ཐེ་སྡོད་བོད་མི་ནས་ཞབས་གཞས་ཁག་ལྔ་ཙམ་གཟིགས་འབུལ་ཞུས།
མཐའ་མ་ཐེངས་འདིའི་བོད་ཀྱི་ཟློས་གར་ཚོགས་པ་ཐེ་ཝན་ནང་འཁྲབ་སྟོན་གདན་ཞུའི་འགྲོ་གྲོན་ཐེ་ཝན་རིག་གཞུང་ལྷན་ཁང་ནས་གནང་བ་ཕུད། དེ་མིན་ཐེ་ཝན་ནང་ཆགས་པའི་དགའ་ལྡན་ཤར་རྩེ་ནང་ཆོས་སློབ་གཉེར་ཁང་སོགས་བོད་བརྒྱུད་ནང་བསྟན་གྱི་ཆོས་ཚོགས་ཁག་ ༡༣ ཙམ་ནས་ཞལ་འདེབས་གནང་བར་ཐུགས་རྗེ་ཆེ་ཞུ་ཆེད་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་ལེགས་སོའི་མཇལ་དར་གནང་ནས་མཛད་སྒོ་ལེགས་པར་མཇུག་འགྲིལ་བ་བཅས།།
