༄༅།།འདི་གར་ཨོ་སི་ཀྲི་ལི་ཡ་སྐུ་ཚབ་དོན་གཅོད་ལས་ཁུ
དེ་ཡང་ཨོ་གླིང་གྲོས་ཚོགས་སུ་ཆོས་ལུགས་འདྲ་མིན་གྱི་གནས་ཚུལ་དང་། ཆོས་དད་རང་དབང་སྐོར་ཉན་ཞིབ་གནང་རྒྱུའི་ལམ་སྲོལ་ཡོད་པ་ལྟར། འདི་ག་ཨོ་སི་ཀྲི་ལི་ཡ་བོད་ཀྱི་སྐུ་ཚབ་དོན་གཅོད་ལས་ཁུངས་ནས་ད་ལོའི་ཕྱི་ཟླ་ ༢ པའི་ནང་ཨོ་གླིང་གྲོས་ཚོགས་སུ་བོད་ནང་ཆོས་དད་རང་དབང་སྐོར་གྱི་སྙན་ཐོ་ཕུལ་བ་དང་། སྙན་ཐོའི་ནང་རྒྱ་དམར་གཞུང་གིས་བོད་ནང་གསེར་རྟ་བླ་རུང་སྒར་དང་། ཡ་ཆེན་སྒར་ལ་གཏོར་སྐྱོན་ཅི་ཆེར་བཏང་སྟེ་གྲྭ་པ་དང་ཨ་ནེ་ཕྱིར་ཕུད་བྱས་སྟངས་ཡ་ང་བའི་གནས་ཚུལ་སོགས་འཁོད་ཡོད་པ་མ་ཟད། རྒྱ་ནག་གི་རྩ་ཁྲིམས་སུ་ཆོས་དད་རང་དབང་ཡོད་ཅེས་འཛམ་གླིང་མགོ་བསྐོར་གཏོང་བྱའི་དོན་ཚན་འཁོད་ཡོད་ཀྱང་། དོན་དངོས་སུ་ལག་བསྟར་བྱས་སྐབས་བོད་བརྒྱུད་ནང་བསྟན་དོ་དམ་སྲོལ་ཡིག་ཅེས་པ་དང་། སྤྲུལ་སྐུ་ཡང་སྲིད་ངོས་འཛིན་བྱེད་ཕྱོགས་ཀྱི་སྒྲིག་གཞི་སོགས་ཁྲིམས་སྒྲིག་འདྲ་མིན་བཟོས་ཏེ་ཆོས་དད་རང་དབང་རྩ་བ་ཉིད་ནས་མེད་པའི་སྲིད་བྱུས་འདྲ་མིན་གསལ་འཁོད་བྱས་ཡོད།
དེ་རིང་གི་ཉན་ཞིབ་ནང་སྐུ་ཚབ་དོན་གཅོད་ཀྱིས་གསུངས་དོན། བོད་མིར་མཚོན་ན་ཆོས་ལུགས་ནི་ང་ཚོའི་འཚོ་བ་དང་རིག་གཞུང་། གོམས་གཤིས་ཀྱི་ཆ་ཤས་སུ་ཆགས་ཟིན་ཡང་། རྒྱ་ནག་གཞུང་ནས་དེ་དག་ཡོངས་སུ་གཏོར་ཐབས་བྱས་ཏེ་ད་ལོའི་ས་ག་ཟླ་བའི་དུས་ཆེན་སྐབས་བོད་མི་ཁྱིམ་ཚང་ཚ་མར་བརྡ་ཐོ་བཏང་སྟེ། ས་ག་ཟླ་བའི་དུས་དྲན་ནང་མཉམ་ཞུགས་མི་ཆོག་པའི་བཀའ་བཏང་ཡོད་ཅེས་དང་།
ད་ཐེངས་ཀྱི་ཉན་ཞིབ་སྐབས་སྐུ་ཚབ་དོན་གཅོད་ཀྱིས་ཨོ་གླིང་གཞུང་ལ་རེ་འབོད་ཞུ་དོན།
༡༽ ཨོ་གླིང་གཞུང་ནས་རྒྱ་ནག་དང་འབྲེལ་བ་གནང་སྐབས་༸པཎ་ཆེན་ཆུང་སྲིད་རིན་པོ་ཆེ་དང་ཁོང་གི་ཡབ་ཡུམ་གྱི་གནས་ཚུལ་སྐོར་དོགས་འདྲི་གནང་ཐུབ་པ།
༢༽ རང་དབང་ལྡན་པའི་སྐུ་ཚབ་ཚོགས་ཆུང་ཞིག་བོད་ལ་གཏོང་ཐབས་གནང་སྟེ་བོད་ནང་གི་དགོན་སྡེ་ཁག་ལ་གཏོར་སྐྱོན་དང་གྲྭ་བཙུན་ཕྱིར་འབུད་ཀྱི་གནས་ཚུལ་ལ་བསྐྱར་ཞིབ་ཡོང་ཐབས།
༣༽ རྒྱ་དམར་གཞུང་ནས་རང་ལུས་མེར་སྲེག་གཏོང་མཁན་དང་དེ་དག་གི་ནང་མི་སྤུན་མཆེད་བཅས་པར་ནག་ཉེས་འགེལ་བའི་རྩུབ་སྤྱོད་ཚབ་ཏུ་བོད་ནང་རང་ལུས་མེར་སྲེག་བྱུང་དགོས་པའི་རྩ་བའི་རྐྱེན་རྩ་ལ་ཞིབ་འཇུག་གནང་དགོས་པ།
༤༽ འཛམ་གླིང་མི་མང་སྤྱི་དང་། ལྷག་པར་བོད་ནང་ཡོད་པའི་བོད་མི་ཚོར་ཨོ་སི་ཀྲི་ལི་ཡ་འགྲོ་བ་མིའི་ཐོབ་ཐང་དང་ཞི་བདེ། འཚེ་མེད་ཞི་བའི་རྒྱབ་ཏུ་ཡོད་པའི་བརྡ་ལན་ནན་གཏོང་དགོས་པ་མ་ཟད། ཨོ་གླིང་གཞུང་གི་འགྲོ་བ་མིའི་ཐོབ་ཐང་ཐོག་བཞེངས་ཕྱོགས་ཇི་ཡིན་ཁ་གསལ་བསྒྲགས་གནང་དགོས་པ་བཅས་ཀྱི་སྐོར་རེ་འབོད་ཞུས་གནང་ཡོད།
དེ་རིང་གི་ཉན་ཞིབ་སྐབས་སྐུ་ཚབ་དོན་གཅོད་དང་ལྷན་དུ་དོན་ཁང་གི་ལས་བྱེད་གཞན་གཉིས་དང་། ཨོ་སི་ཀྲི་ལི་རྒྱལ་ཡོངས་བོད་རིགས་ཚོགས་པའི་ཚོགས་གཙོ་དངོས་གྲུབ་རྒྱལ་མཚན་ལགས་ཆེད་བཅར་ཞུས་ཡོད་པ་བཅས།།
