ཕྱི་ལོ་ ༢༠༡༨ ཟླ་ ༦ ཚེས་ ༢ རེས་གཟའ་སྤེན་པ།

༄༅། །འདི་གར་ཌལ་ཧོར་ཕུན་ཚོགས་གླིང་བོད་མིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༡༨ ཟླ་ ༦ ཚེས་ ༡ རེས་གཟའ་པ་སངས་ཉིན་གྱི་དགོང་མོ་ཆུ་ཚོད་ ༨ ཐོག་ཧི་མཱ་ཅལ་མངའ་སྡེ་སྤྱི་ཁྱབ་བློན་ཆེན་སྐུ་ཞབས་ཇེ་རཱམ་ཋཱ་ཀུར་  Shri Jai Ram Thakur མཆོག་གིས་གཙོས་ཧི་མཱ་ཅལ་མངའ་སྡེའི་བཟའ་འབྲུ་བློན་ཆེན་སྐུ་ཞབས་ཀི་ཤན་ཀ་པུར་ Kishan Kapoor མཆོག ཧི་མཱ་ཅལ་མངའ་སྡེའི་གྲོས་ཚོགས་ཀྱི་ཚོགས་གཞོན་སྐུ་ཞབས་ཧན་སི་རཇ་མཆོག དེ་བཞིན་ས་གནས་ཀྱི་སྦི་ཇེ་པིའི་ཆབ་སྲིད་ཚོགས་པའི་འགན་འཛིན།   ཌལ་ཧོར་གྲོང་སྡེ་ལས་ཁུངས་ཀྱི་ཚོགས་གཙོ་བཅས་མངའ་སྡེ་གཞུང་གི་མགྲོན་ཁང་ Circuit House དུ་ཕེབས་སྐབས་ཌལ་ཧོར་ཕུན་ཚོགས་གླིང་བོད་མིའི་ས་གནས་འགོ་འཛིན་གྱིས་གཙོས་ས་གནས་ཀྱི་གནད་ཡོད་མི་སྣ་དང་མི་མང་བཅས་ཆེད་བཅར་གྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

སྐབས་དེར་ས་གནས་འགོ་འཛིན་ལས་ཁུངས་ནས་ཧི་མཱ་ཅལ་མངའ་སྡེ་སྤྱི་ཁྱབ་བློན་ཆེན་མཆོག་གིས་གཙོས་སྐུ་མགྲོན་རྣམས་ལ་ཐུགས་རྗེ་ཆེ་ཞུའི་ཕྱག་རྟགས་དང་། ཌལ་ཧོར་ལག་ཤེས་བཟོ་གྲྭ་ནས་སྤྱི་ཁྱབ་བློན་ཆེན་མཆོག་ལ་རུམ་གདན་ཞིག་ཕྱག་རྟགས་སུ་ཕུལ་ཡོད་པ་མ་ཟད།

ས་གནས་འགོ་འཛིན་གྱིས་གཞིས་ཆགས་དང་བཟོ་གྲྭའི་བདེ་སྡུག་ཡིག་ངག་གཉིས་ཐོག་ནས་སྙན་སེང་ཞུས་གྲུབ་མཚམས་ཌལ་ཧོར་གཏན་སློབ་ཀྱི་སློབ་ཕྲུག་རྣམས་ཀྱིས་གཡག་དང་སེང་གེ་གི་འཁྲབ་སྟོན་ཞིག་གཟིགས་འབུལ་ཞུས་པར་རྒྱ་གར་གྱི་དཔན་རིགས་ཁག་གཅིག་དང་ཡུལ་མི་རྣམས་ཀྱིས་བསྔགས་བརྗོད་ཀྱང་གནང་ཡོད་པ་བཅས། །