༢༠༡༨ ཟླ་ ༦ ཚེས་ ༢༢ རེས་གཟའ་པ་སངས།

༄༅། །བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དབུ་དཀར་ཚང་སྐལ་རྡོར་ལགས་ཟླ་འདིའི་ཕྱི་ཚེས་ ༡༨ ནས་ ༢༡ བར་ཉིན་གྲངས་བཞིའི་རིང་ཨ་རིར་ཕེབས་སྟེ། ཨ་རིའི་གཞུང་གི་རོགས་ཚོགས་ཆེ་ཁག་ USAID, NED, DRL, PRM, ECA སོགས་ཀྱི་གནད་ཡོད་མི་སྣ་ཁག་གཅིག་དང་མཇལ་འཕྲད་ཀྱིས་བོད་མིའི་སྒྲིག་འཛུགས་ཀྱི་ལས་གཞི་ཁག་གི་སྐོར་ངོ་སྤྲོད་དང་། ལྷག་པར་ད་ལྟ་འགྲོ་བཞིན་པའི་གལ་ཆེའི་ལས་གཞི་ཁག་གི་གནས་སྟངས་ངོ་སྤྲོད་ཞུས་འདུག་པ་མ་ཟད། ཨ་རི་གཞུང་ནས་བོད་དང་བོད་མིར་མུ་མཐུད་རོགས་རམ་ཡོང་སླད་གཞུང་གི་འཛིན་སྐྱོང་དང་ཁྲིམས་བཟོའི་འབྲེལ་ཡོད་ལས་བྱེད་ཁག་གཅིག་ཀྱང་མཇལ་འཕྲད་གནང་འདུག ལས་རིམ་འདི་ཉིད་བྱང་ཨ་རི་སྐུ་ཚབ་དོན་ཁང་ནས་གོ་སྒྲིག་གནང་འདུག་པ་དང་སྐབས་དེར་བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་། དོན་ཁང་གི་ཨ་རིའི་སྲིད་གཞུང་གི་འབྲེལ་མཐུད་པ་བསྟན་འཛིན་དཔལ་སྐྱིད་ལགས་རྣམ་གཉིས་ཀྱང་ཕེབས་འདུག་པ་བཅས།།