༢༠༡༨ ཟླ་ ༦ ཚེས་ ༡༥ རེས་གཟའ་པ་སངས།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༨ ཟླ་ ༦ ཚེས་ ༡༢ ནས་ ༡༤ བར་ཡུ་རོབ་ལི་ཐུ་ཝི་ཡའི་Lithuania རྒྱལ་ས་ཝིལ་ནི་སི་ Vilnius ནང་མཛད་འཕྲིན་རྒྱ་ཆེ་བསྐྱངས་རྗེས་ཕྱི་ཚེས་ ༡༥ ཉིན་ལ་ཏི་ཝི་ཡའི་ Latvia རྒྱལ་ས་རི་གར་ Riga ༸ཞབས་སོར་འཁོད་གནང་མཛད་རྒྱུ་དང་། ཕྱི་ཚེས་ ༡༦ དང་ ༡༧ བཅས་ཉིན་གཉིས་རིང་ཁུལ་དེར་རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པ་དང་། དེ་བཞིན་རྡོ་རྗེ་གཅོད་པའི་ཆོས་འབྲེལ་བསྐྱང་གཏན་འཁེལ་འདུག

ཕྱི་ཚེས་ ༡༨ ཉིན་གྱི་སྔ་དྲོ་༸གོང་ས་མཆོག་གིས་སི་ཀོན་ཏོ་ཚོགས་ཁང་ཆེན་མོའི་ Skonto Hall ནང་སྤྱན་རས་གཟིགས་དང་འཇམ་དཔལ་དབྱངས་ཀྱི་རྗེས་གནང་སྩལ་རྒྱུ་ཡིན་འདུག   ཐེངས་འདིར་ཆོས་འབྲེལ་གོ་སྒྲིག་ཞུ་མཁན་ལ་ཏི་ཝི་ཡའི་ Latvia བོད་སྐྱོབ་ཐེབས་རྩ་ཁང་ Save Tibet Latvia དང་།  རུ་སུའི་རྒྱལ་ས་མོ་སི་ཁོར་རྟེན་གཞི་བྱས་པའི་བོད་སྐྱོབ་ཐེབས་རྩ་ཁང་ Save Tibet Foundation (Moscow)  དེ་བཞིན་རུ་སོག་སྐུ་ཚབ་དོན་གཅོད་ལས་ཁུངས་བཅས་ཡིན་འདུག  

དེ་ཡང་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་༸གོང་ས་མཆོག་ཁུལ་དེར་ཆིབས་སྒྱུར་སྐོར་གསུང་དོན།  ཐེངས་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདི་ཁུལ་ཆིབས་སྒྱུར་བཀའ་དྲིན་བསྐྱངས་པར་བརྟེན་རུ་སུའི་མང་ཚོགས་སྤྱི་དང་།  བྷལ་ཊིག་མངའ་ཁུལ་ Baltic States གྱི་དད་ལྡན་མང་ཚོགས་རྣམས་ལ་ཆོས་འབྲེལ་གྱི་གོ་སྐབས་ཐོབ་པར་བརྟེན་ང་ཚོའི་སེམས་ནང་དགའ་ཚོར་ཧ་ཅང་སྐྱེ་བཞིན་འདུག   རུ་སུའི་དད་ལྡན་མང་ཚོགས་རྣམས་ལ་ཆོས་འབྲེལ་ཐེངས་བཞི་པ་ཆགས་ཡོད་པ་དང་།  ལྷག་པར་ཆོས་འབྲེལ་ཙམ་མ་ཟད་སྤྱན་རས་གཟིགས་དང་འཇམ་དཔལ་དབྱངས་ཀྱི་རྗེས་གནང་བཀའ་དྲིན་ཆེ་གནང་མཛད་རྒྱུ་ཡིན་སྟབས་ཧ་ཅང་སྐལ་བ་བཟང་པོ་རེད།  རྡོ་རྗེ་གཅོད་པར་མཚོན་ན་ཁལ་མུཀ་ Kalmykia དང་ཐུ་ཝ། Tuvans བྷུར་ཡ་ཏི་ Buryats བཅས་སུ་ནང་པའི་དད་ལྡན་མང་ཚོགས་རྣམས་ཀྱིས་ཧ་ཅང་རྩ་ཆེན་པོར་རྩི་བཞིན་ཡོད།   དེར་བརྟེན་ཐེངས་འདིར་རྡོ་རྗེ་གཅོད་པའི་བཀའ་ཆོས་དེའང་༸གོང་ས་༸སྐྱབས་མགོན་ཆེན་པོའི་སྐུ་མདུན་ནས་ཞུ་རྒྱུའི་གོ་སྐབས་བྱུང་བ་འདི་ནི་ཆེས་བསོད་ནམས་ཀྱི་བགོ་སྐལ་ཞིག་ཡིན་པར་ང་ཚོ་ཐུན་མོང་ནས་ངོས་འཛིན་ཞུ་བཞིན་ཡོད། ཅེས་གསུངས། ༸གོང་ས་༸སྐྱབས་མགོན་ཆེན་པོ་མཆོག་ཕྱི་ཟླ་ ༦ ཚེས་ ༡༩ ཉིན་རྒྱ་གར་དུ་ཆིབས་༸ཞལ་སྒྱུར་གཏན་འཁེལ་ཡོད་པ་བཅས། །