༢༠༡༨ ཟླ་ ༦ ཚེས་ ༡༢ རེས་གཟའ་མིག་དམར།
༄༅། །ཕྱི་ལོ་ ༢༠༡༨ ཟླ་ ༦ ཚེས་ ༡༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡུ་རོབ་གླིང་ཆེན་ནང་གི་བྷལ་ཊིག་ Baltic མངའ་ཁུལ་ཡིན་པ་ལི་ཐུ་ཝེ་ནི་ཡའི་ Lithuania རྒྱལ་ས་ཝིལ་ན་སིར་ Vilnius ༸ཞབས་སོར་བདེ་བར་འཁོད་འདུག
མགོན་པོ་གང་ཉིད་མཆོག་ཝིལ་ན་སིར་གནམ་ཐང་དུ་༸ཞབས་སོར་བདེ་བར་འཁོད་སྐབས་རྒྱ་གར་གཞུང་ཚབ་པ་སྐུ་ཞབས་རཱཇེནྡྲ་ཀུ་མཱར་ཅོ་དེ་རི་ Rajinder Kumar Chaudhary མཆོག་དང་། བོད་ཁང་འགན་འཛིན་སྐུ་ཞབས་ཝི་དུ་ན་སི་ Vytis Vidunas ལགས་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག
དེ་ཡང་ཁུལ་དེར་རྟེན་གཞི་བྱས་པའི་གཞུང་འབྲེལ་མིན་པའི་ཚོགས་པ་བོད་ཁང་ནས་ཇི་ལྟར་གདན་ཞུའི་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་མགོན་པོ་གང་ཉིད་མཆོག་གིས་ཕྱི་ཚེས་ ༡༣ ནས་ཉིན་གྲངས་གསུམ་རིང་ཁུལ་དེར་ཆོས་ཕྱོགས་ཀྱི་མཛད་འཕྲིན་རྒྱ་ཆེ་བསྐྱང་གནང་མཛད་རྒྱུ་དང་། མཛད་འཕྲིན་གྱི་ཐོག་མར་ཕྱི་ཚེས་ ༡༣ ཉིན་གྱི་སྔ་དྲོ་བཞུགས་གནས་གསོལ་མགྲོན་ཁང་དུ་གསར་འགོད་ལྷན་ཚོགས་ཤིག་བསྐྱང་གནང་མཛད་རྒྱུ་དང་། ཐེངས་འདིར་༸གོང་ས་མཆོག་ཡུལ་དེར་ཆིབས་སྒྱུར་བསྐྱངས་ཐེངས་བཞི་པ་ཆགས་འདུག
ཆིབས་སྒྱུར་ཐོག་མ་ཕྱི་ལོ་ ༡༩༩༡ ལོར་བསྐྱངས་རྗེས་ཕྱི་ལོ་ ༢༠༠༡ དང་༢༠༡༣ བཅས་སུ་ཆིབས་སྒྱུར་བསྐྱངས་པར་བརྟེན་ཐེངས་འདིར་ཆིབས་སྒྱུར་བསྐྱངས་ཐེངས་བཞི་པ་ཆགས་འདུག ཨིན་ཡུལ་སྐུ་ཚབ་དོན་ཁང་ནས་ཆིབས་སྒྱུར་དང་འབྲེལ་བའི་གསར་འགོད་གསལ་བསྒྲགས་སྤེལ་བ་ལྟར་ན། ཐེངས་འདིར་༸གོང་ས་མཆོག་ལི་ཐུ་ཝེ་ནི་ཡ་རྒྱལ་ཁབ་ནང་༸ཞབས་སོར་འཁོད་པ་ནི་ཡུལ་དེ་ཉིད་རང་བཙན་ཐོབ་ནས་ལོ་ངོ་བརྒྱ་ཐམ་པ་འཁོར་བའི་དུས་ཆེན་སྲུང་བརྩི་ཞུ་རྒྱུའི་སྐབས་དང་འཁེལ་ཡོད་འདུག
ཡུལ་དེའི་གསར་ཤོག་ཁག་གི་ནང་ཆིབས་སྒྱུར་སྐོར་གྱི་གནས་ཚུལ་ཐོན་པ།
གསར་འགོད་ལྷན་ཚོགས་བསྐྱངས་ཟིན་མཚམས་༸གོང་ས་མཆོག་རྒྱལ་སའི་མཐོ་སློབ་ University of Vilnius ནང་ཆིབས་སྒྱུར་བསྐྱང་ནས་དགེ་ལས་སློབ་ཕྲུག་གཙོ་བོར་གྱུར་བའི་མང་ཚོགས་བཅས་ལ། དེང་དུས་ཤེས་ཡོན་ལམ་ལུགས་ནང་མིའི་རིན་ཐང་། ཞེས་པའི་བརྗོད་གཞིའི་ཐོག་བཀའ་སློབ་དང་དྲི་བ་རྣམས་ལ་བཀའ་ལན་སྩལ་གནང་མཛད་རྒྱུ་ཡིན་འདུག་པ་དང་།
ཡུལ་དེའི་གསར་ཤོག་ཁག་གི་ནང་ཆིབས་སྒྱུར་སྐོར་གྱི་གནས་ཚུལ་ཐོན་པ།
དེ་རྗེས་༸གོང་ས་མཆོག་བོད་ཀྱི་ས་ཚིགས་ Tibet Square ཞེས་པ་དེར་ཆིབས་སྒྱུར་བཀའ་དྲིན་བསྐྱང་ནས་རྒྱལ་ཁབ་དེར་རང་བཙན་ཐོབ་ནས་ལོ་ངོ་བརྒྱ་འཁོར་བའི་དུས་དྲན་མཛད་སྒོའི་རྟེན་འབྲེལ་མཚོན་ཆེད་ཤིང་སྣ་འདེབས་འཛུགས་མཛད་རྒྱུ་དང་། ས་ཚིགས་དེ་ནི་ཕྱི་ལོ་ ༢༠༡༧ ཟླ་ ༦ ནང་ཝིལ་ན་སི་གྲོང་སྡེའི་སྤྱི་ཁྱབ་པ་སྐུ་ཞབས་Mr Remigijus Šimašius མཆོག་གིས་དབུ་འབྱེད་གནང་ཡོད་འདུག
ཕྱོགས་མཚུངས་ཡུལ་དེའི་རྩོམ་པ་པོ་གྲགས་ཅན་དང་། བོད་དོན་སྐོར་དེབ་འགའ་ཤས་བྲིས་མྱོང་མཁན་སྐུ་ཞབས་ཨུར་གྷ་ཨི་ཝ་ནོ་སི་ཀེཌ་ Jurga Ivanauskaite དམ་པ་ཁོང་གིས་ཕྱོགས་སྒྲིག་གནང་བའི་བོད་དོན་པར་རིས་འགྲེམས་སྟོན། ༼ བོད་ཀྱི་དངོས་ཡོད་གནས་སྟངས་ཕྱོགས་གཞན་ཞིག ༽ Tibet – A Different Reality ཞེས་པ་དེར་ཆིབས་སྒྱུར་བཀའ་དྲིན་བསྐྱང་གནང་མཛད་རྒྱུ་དང་།
ཕྱི་ཚེས་ ༡༤ ཉིན་གྱི་སྔ་དྲོར་ཡུལ་དེའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མི་རྣམས་དང་བོད་དོན་རྒྱབ་སྐྱོར་བ་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་ཞུ་རྒྱུ་མ་ཟད། དེ་ཉིན་༸གོང་ས་མཆོག་གིས་མང་ཚོགས་ལ། བདེ་སྐྱིད་ཀྱི་ཐབས་ལམ། ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་དང་། དེ་རྗེས་ཆིབས་སྒྱུར་གོ་སྒྲིག་ཚོགས་ཆུང་གི་ཚོགས་མི་རྣམས་དང་ལྷན་ཉིན་གུང་ལྗགས་སྨིན་ལྷན་བཞེས་མཛད་རྗེས་ཕྱི་ཚེས་ ༡༥ ཉིན་ལ་ཏི་ཝི་ཡའི་རྒྱལ་ས་རི་གར་ Rigaཆིབས་༸ཞལ་སྒྱུར་གནང་མཛད་རྒྱུ་ཡིན་འདུག་པ་བཅས།།
