༢༠༡༨ ཟླ་ ༨ ཚེས་ ༩ རེས་གཟའ་སྤེན་པ།

༄༅། །ཕྱི་ལོ་ ༢༠༡༨ ཟླ་ ༦ ཚེས་ ༩ རེས་གཟའ་སྤེན་པའི་སྔ་དྲོ་ཆུ་ཚོད་ ༩ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རི་དང་ཨོ་གླིང་། ཡུ་རོབ། རྒྱ་གར་སོགས་ཕྱི་རྒྱལ་ཡུལ་གྲུ་ཁག་ནས་ཡུལ་སྐོར་སྤྲོ་འཆམ་པ་ ༣༠༠༠ ཙམ་ལ་ཐོག་མར་སྐུ་པར་ལྷན་སྒྲོན་མཛད་རྗེས་ཐེག་ཆེན་ཆོས་གླིང་གཙུག་ལག་ཁང་གི་གསུང་རའི་ནང་བཀའ་སློབ་སྩལ་འཁྱུག་ཙམ་སྩལ་བསྟུན་གཙོ་ཆེར་དྲི་བ་རྣམས་ལ་བཀའ་ལན་སྩལ་དོན། 

ཁྱེད་རང་ཚོ་ཕལ་ཆེ་བ་ཁ་སང་ཁ་ཉིན་བཀའ་ཆོས་བྱེད་སར་ཡོད་རེད། དེར་བརྟེན་ངོས་ལ་དེ་རིང་འདིར་དམིགས་བསལ་ཞུ་རྒྱུ་གང་ཡང་མེད། གཙོ་བོ་ཁྱེད་རང་ཚོར་དྲི་བ་ཡོད་ན་ངོས་ཀྱིས་ལན་བརྒྱག་ཆོག  རྩོད་པ་བྱེད་ནའང་འགྲིག  འོན་ཀྱང་ཨིན་སྐད་དང་ཧིན་ཐོག་ནས་རྩོད་པ་བྱ་རྒྱུ་སྐད་ཀྱིས་འདང་རྒྱུ་མ་རེད་མ་གཏོགས་གཞན་ང་ཚོ་ཕན་ཚུན་རྩོད་པ་བྱེད་ཆོག  དཔལ་ནཱ་ལེནྡཱི་རིག་ལམ་ཐོག་ནས་དཔྱད་པ་བྱ་རྒྱུ་དེ་དག་ཧ་ལས་པ་རེད་འདུག ཅེས་བཀའ་སློབ་སྩལ་རྗེས་དྲི་བ་རྣམས་ལ་བཀའ་ལན་སྩལ།

སྐབས་དེར་མཇལ་བཅར་བ་རྣམས་ཀྱིས་དེང་དུས་སེམས་ཁམས་རིག་པ་དང་ནང་ཆོས་ཟུང་འབྲེལ་ཡོང་ཐུབ་མིན་སྐོར་དྲི་བར་བཀའ་ལན་སྩལ་དོན། སེམས་ཁམས་རིག་པའི་རྣམ་གཞག་ཐོག་ནས་བརྗོད་ན་རྒྱ་གར་གནའ་རབས་སྲོལ་རྒྱུན་ནང་གཏན་ལ་ཕབ་པའི་སེམས་ཁམས་རིག་པའི་རྣམ་གཞག་གི་འགྲོ་སྟངས་དེ་དག་ཧ་ཅང་ཕྱུག་པོ་འདུག འོན་ཀྱང་བློ་ཕམ་པ་ཞིག་ལ་དེང་རབས་རྒྱ་གར་སྤྱི་ཚོགས་ནང་ལེགས་བཤད་དེ་དག་ཧ་ཅང་ཉམས་ཆག་སོང་ནས་དོ་སྣང་བྱེད་མཁན་དཀོན་པོ་རེད་འདུག

དེར་བརྟེན་ངོས་ཀྱིས་རྒྱ་གར་གནའ་རབས་དཔལ་མགོན་འཕགས་པ་ཀླུ་སྒྲུབ་དང་དབྱིག་གཉེན། ཕྱོགས་གླང་ཆོས་གྲགས། མཁན་ཆེན་ཞི་བ་འཚོ་ལ་སོགས་པའི་ལེགས་བཤད་དེ་དག་ཉམས་པ་སླར་གསོ་ཡོང་ཐབས་བྱེད་བཞིན་ཡོད། ཅེས་བཀའ་སློབ་སྩལ་བ་མ་ཟད། དེང་དུས་རྒྱ་གར་གྱི་ཤེས་ཡོན་ལམ་ལུགས་དེ་དག་ཨིན་ཇིས་གཏན་ལ་ཕབ་ཅིང་། ཤེས་ཡོན་གྱི་དགོས་དམིགས་གཙོ་བོ་ཕྱི་དངོས་པོའི་མཐུན་རྐྱེན་དོན་གཉེར་བྱ་རྒྱུ་ཡིན་པ་དང་། གལ་ཏེ་རྒྱ་གར་རང་བཙན་ཐོབ་འཕྲལ་ཤེས་ཡོན་ལམ་ལུགས་ནང་རྒྱ་གར་རང་གི་གནའ་བོའི་སེམས་ཁམས་རིག་པའི་རྣམ་གཞག་དེ་དག་གཞག་ཐུབ་ཡོད་ཚེ་མིའི་བསམ་བློ་གཏོང་སྟངས་དང་མི་ཚེའི་ནང་གི་བསམ་བློ་དང་འབྲེལ་བའི་དཀའ་ངལ་རྣམས་ལ་གདོང་ལེན་བྱ་རྒྱུར་ཧ་ཅང་ཁྱད་པར་ཆེན་པོ་ཡོང་ཐུབ་རྒྱུ་རེད་བསམ་པ་དྲན་བཞིན་ཡོད་ཀྱང་དེ་ལྟར་བྱུང་མ་ཐུབ་པར་ཐུགས་ཕམ་མཛད།

དེ་བཞིན་འགྲོ་བ་མི་རིགས་གཅིག་གྱུར་གྱི་འདུ་ཤེས་འཛིན་དགོས་པ་ཧ་ཅང་གལ་ཆེ་ཚུལ་དང་། རྒྱལ་ཁབ་དང་མི་རིགས། ཆོས་ལུགས་མི་འདྲ་བ་ཡོད་པ་དེ་དག་རིམ་པ་གཉིས་པའི་གནས་སྟངས་ཡིན་པ་ལས་གཞི་རྩའི་ང་ཚོ་ཚང་མ་འགྲོ་བ་མི་རིགས་གཅིག་གྱུར་ཡིན་སྟབས། ལུས་སེམས་དང་སེམས་ཚོར་གང་གི་ཆ་ནས་ང་ཚོ་ཚང་མས་བདེ་བ་འདོད་ཅིང་སྡུག་བསྔལ་མི་འདོད་པ་གཅིག་མཚུངས་ཡིན་སྐོར་དང་། མགོན་པོ་གང་ཉིད་མཆོག་གིས་ཡུ་རོབ་སྤྱི་མཐུན་ཚོགས་པའི་སྒྲིག་འཛུགས་ལ་ཡི་རང་བསྔགས་བརྗོད་ཧ་ཅང་ཞུ་བཞིན་པ་ནི། སྒྲིག་འཛུགས་དེ་ལ་བརྟེན་ནས་འཛམ་གླིང་དམག་ཆེན་གཉིས་པའི་རྗེས་ཡུ་རོབ་ནང་ལོ་ངོ་ བཅུ་ཕྲག་མང་པོའི་རིང་ཞི་བདེ་འཆམ་མཐུན་བསྐྲུན་ཐུབ་པ་དང་། དེ་སྔ་དམག་ཆེན་གཉིས་པའི་སྐབས་རྒྱལ་ཁབས་དང་མི་རིགས་ཕན་ཚུན་དཔེར་ན་ཨིན་ཇི་དང་འཇར་མན། ཕ་རན་སི་སོགས་ཕན་ཚུན་དགྲ་ཟླར་བརྩི་བཞིན་ཡོད་ཀྱང་རིམ་བཞིན་ཡུ་རོབ་སྤྱི་མཐུན་ཚོགས་པའི་སྒྲིག་འཛུགས་སོགས་བཙུགས་པའི་ཉེར་ལེན་ལ་བརྟེན་ནས་ད་ཆ་མི་རིགས་ཕན་ཚུན་གཅིག་གིས་གཅིག་ལ་གཉེན་དུ་བརྩི་ནས་སྤྱི་ཚོགས་ཁྱོན་ཡོངས་སུ་ཞི་བདེ་བརྟན་ལྷིང་ཐུབ་པར་བརྟེན། དེ་སྔ་རྒྱ་གར་ནང་གི་ལས་འགུལ་བ་གྲགས་ཅན་སྐུ་ཞབས་ཝོ་ནོ་བྷ་བྷ་ཝེ་ Vinoba Bhave ཁོང་གིས་ཨེ་ཤི་ཡའི་ཁྱོན་དུའང་ཡུ་རོབ་སྤྱི་མཐུན་ཚོགས་པ་ལྟ་བུའི་མཉམ་འབྲེལ་སྒྲིག་འཛུགས་༼ རྒྱ་གར་དང་པ་ཀི་སི་ཐན། ཨབ་གྷ་ནི་སི་ཐན། འབར་མ། ཤྲི་ལངྐ་སོགས་༽ ཤིག་འཛུགས་རྒྱུའི་དགོངས་བཞེས་གནང་ཡོད་པ་

དེར་༸གོང་ས་མཆོག་གིས་བསྔགས་བརྗོད་མཛད་བཞིན་ཡོད་པ་མ་ཟད། གལ་ཏེ་དེ་ལྟར་བྱུང་ཐུབ་ཡོད་ཚེ་ད་ལྟ་ཨབ་གྷ་ནི་སི་ཐན་སོགས་ནང་དམག་འཁྲུག་གི་དཀའ་ངལ་འཕྲད་བཞིན་པ་དེ་དག་ཕལ་ཆེར་ཡོང་རྒྱུ་མ་རེད་ཅེས་བཀའ་ལན་སྩལ། དེ་བཞིན་རྒྱ་གར་དང་པ་ཀི་སི་ཐན་གཉིས་ཁ་བྲལ་བར་རྒྱལ་ཁབ་གཅིག་ངང་གནས་ཐབས་ཆེད་རྒྱ་གར་གྱི་སྲིད་བློན་ཆེས་ཐོག་མ་གནང་རྒྱུའི་གོ་སྐབས་དེ་མོ་མཧཱ་མཌ་ཨ་ལི་ཇིན་ན་Jinna མཆོག་ལ་ཕུལ་དགོས་པའི་དགོངས་འཆར་མེས་པོ་དམ་པ་གཱན་དྷིས་བཏོན་ཡོད་ཀྱང་དེ་མ་བྱུང་བ་ཡིན་སྐོར་སོགས་བཀའ་ལན་སྩལ།