ཕྱི་ལོ་ ༢༠༡༨ ཟླ་ ༦ ཚེས་ ༢༢ རེས་གཟའ་པ་སངས།
༄༅། །ལྷོ་ཨ་ཕི་རི་ཀའི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་ལྷོ་ཨ་ཕི་རི་ཀའི་གྲོང་ཁྱེར་ཨི་སོ་ཕོར་ Ixopo ཞེས་པའི་ནང་རྟེན་གཞི་བྱས་པའི་ནང་པའི་ཆོས་ཚོགས་སུ་ཟླ་འདིའི་ཕྱི་ཚེས་ ༡༥ ནས་ ༡༧ བར་ཉིན་གྲངས་གསུམ་རིང་བསྐོང་ཚོགས་གནང་བའི་ཚོགས་འདུའི་ཐོག་བོད་དོན་སྐོར་གསུང་བཤད་གནང་འདུག
སྐབས་དེར་ཚོགས་ཞུགས་པ་མི་གྲངས་ ༤༠ ལྷག་ལ་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་དང་། བོད་དོན་རྒྱབ་སྐྱོར་བ་ཀ་ལ་སི་ཝི་སལ་སི་ Klasie Wessels ལགས་རྣམ་གཉིས་ཀྱིས་རྒྱ་ནག་གཞུང་གིས་བོད་ས་ཡོངས་རྫོགས་དྲག་པོའི་བཙན་བཟུང་བྱས་པ་ནས་བཟུང་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ཇེ་ཞན་ཇེ་སྡུག་དང་། ཁོར་ཡུག་གཏོར་བཤིག་མུ་མཐུད་བྱེད་བཞིན་པ་སོགས་ཀྱི་སྐོར་ངོ་སྤྲོད་གནང་འདུག་པ་མ་ཟད། རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་འོག་སྡུག་སྦྱོང་མནར་གཅོད་མྱངས་དང་མྱོང་བའི་བོད་པའི་མི་སྣ་གལ་ཆེ་ཁག་དང་། དེ་བཞིན་བོད་མི་ཆབ་སྲིད་བཙོན་པའི་སྐོར་ལ་ངོ་སྤྲོད་སོགས་གནང་འདུག
ཚོགས་བཅར་བའི་ཁྲོད་བོད་མི་རྣམས་ད་བར་དེ་ལྟ་བུའི་དཀའ་ངལ་འཕྲད་ཀྱང་གཞན་ལ་གནོད་སེམས་མེད་པར་བཟང་པོའི་རང་གཤིས་དམ་འཛིན་བྱེད་བཞིན་པའི་ཚོར་བ་སྐྱེས་པ་མ་ཟད་སེམས་འགུལ་ཤུགས་ཆེ་འཐེབ་འདུག་པ་བཅས།།
