ཕྱི་ལོ་ ༢༠༡༨ ཟླ་ ༦ ཚེས་ ༢༩ རེས་གཟའ་པ་སངས།
༄༅། །ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཟླ་རེའི་ཚོགས་འདུ་མཐའ་མ་དེ་ཉིད་ཟླ་འདིའི་ཕྱི་ཚེས་ ༢༧ ཉིན་འགོ་འཛུགས་གནང་འདུག
དེ་ཡང་ཚོགས་འདུ་གཙོ་སྐྱོང་གནང་མཁན་ཡུ་རོབ་གྲོས་ཚོགས་འཐུས་མི་སྐུ་ཞབས་ཐོ་མ་སི་མན་ལགས་ཡིན་པ་དང་། ཚོགས་འདུར་མཉམ་ཞུགས་གནང་མཁན་ཡུ་རོབ་གྲོས་ཚོགས་འཐུས་མི་སྐུ་ཞབས་ས་བྷ་སོ་ཀོ་ལགས་དང་། སྐུ་ཞབས་ཁྲིར་མོ་སོ་ལགས། སྐུ་ཞབས་ཀེ་ལམ་ལགས། གྲོས་ཚོགས་འཐུས་མིའི་ཕྱག་རོགས་ཁག་གཅིག རྒྱལ་སྤྱིའི་བོད་དོན་ལས་འགུལ་ཁང་དང་ UNPO གྱི་སྐུ་ཚབ། དེ་བཞིན་སྦར་སིལ་སྐུ་ཚབ་དོན་གཅོད་ཁང་གི་ལས་བྱེད་བཅས་ཡོད་འདུག
ཚོགས་འདུའི་ཐོག་གྲོས་ཚོགས་འཐུས་མི་རྣམ་པས་ཉེ་ལམ་བཞུགས་སྒར་རྡ་རམ་ས་ལར་འཚམས་གཟིགས་གནང་བའི་མྱོང་ཚོར་དང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་མཇལ་འཕྲད་གནང་བའི་སྐོར། བཞུགས་སྒར་དུ་གཞུང་འབྲེལ་མ་ཡིན་པའི་ཚོགས་པ་ཁག་དང་བོད་མིའི་སློབ་གྲྭ་ཁག་ལ་འཚམས་གཟིགས་གནང་བའི་མྱོང་ཚོར་སྐོར་གསུང་གནང་བ་མ་ཟད། ལྷག་པར་ཡུ་རོབ་ཉིན་མོར་གྲོས་ཚོགས་འཐུས་མི་རྣམ་པར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁ་ཐོབ་པ་སོགས་ཀྱི་སྐོར་གསུང་གནང་འདུག
ཚོགས་འདུའི་གྲོས་གཞི་གཞན་ཞིག་ནི་ཚོགས་ལ་ཉེ་བའི་ཡུ་རོབ་སྤྱི་མཐུན་ཚོགས་པ་དང་རྒྱ་ནག་གི་འགྲོ་བ་མིའི་ཐོབ་ཐང་ལྷན་ཚོགས་དང་། དེ་བཞིན་ཟླ་བ་རྗེས་མར་ཡུ་རོབ་སྤྱི་མཐུན་ཚོགས་པ་དང་རྒྱ་ནག་དབར་གྱི་ཚོགས་ཆེན་བཅས་དང་འབྲེལ། ཡུ་རོབ་སྤྱི་མཐུན་ཚོགས་པས་ལས་སྣེ་ཚོ་ཐབས་ལམ་གང་གི་ཐོག་ནས་བོད་དོན་ལ་རྒྱབ་སྐྱོར་གནང་རྒྱུའི་བློ་འགུགས་ཐབས་ཐོག་ལ་གོ་བསྡུར་སྦྱང་བཤད་གནང་འདུག
སྐབས་དེར་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Meccaci ལགས་ཀྱིས་རྒྱ་ནག་གིས་བོད་ནང་ཕྱི་རྒྱལ་མི་རིགས་དང་། ལྷག་པར་མཉམ་འབྲེལ་རྒྱལ་ཚོགས་ཀྱི་སྐུ་ཚབ་དང་། གསར་འགོད་པ་སོགས་འགྲོ་བསྐྱོད་ཆོག་པའི་ཆོག་མཆན་མ་སྤྲད་པར་བཞག་པ་སོགས་ཀྱི་ཐོག་བཀག་སྡོམ་དང་དམ་བསྒྲགས་བྱེད་བཞིན་པའི་གནད་དོན་གྱི་སྙན་ཐོ་ཞིག་སྤྱན་འབུལ་ཞུས་པ་དང་སྦྲགས་། ཡུ་རོབ་གྲོས་ཚོགས་འཐུས་མི་རྣམས་ལ་རྒྱ་ནག་གཞུང་གིས་བོད་ནང་དམ་བསྒྲགས་བྱས་པ་ལྟར་དེ་མཚུངས་ཀྱིས་རྒྱ་ནག་་ལ་ཕར་དམ་བསྒྲགས་གནང་རྒྱུ་ཡིན་སྐོར་གསུང་གནང་འདུག་པ་བཅས། །
