༢༠༡༨ ཟླ་ ༦ ཚེས་ ༢༧ རེས་གཟའ་ལྷག་པ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ ༢༠༡༨ ཟླ་ ༦ ཚེས་ ༢༧ ཉིན་བཏང་གནས་ནང་འཁོད་དོན། དཔལ་ལྡན་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་སྤྱི་ཟླ་ ༦ ཚེས་ ༢༤ མཚན་མོར་ཐེ་ཝན་དུ་ཕེབས་འབྱོར་བྱུང་ཞིང་ཐེ་ཝན་བོད་ཀྱི་སྐུ་ཚབ་དོན་གཅོད་དང་། ས་གནས་བོད་རིགས་ཚོགས་པའི་ཚོགས་གཙོ། དེ་བཞིན་ས་གནས་བོད་ཀྱི་གཞོན་ནུའི་རྒྱུན་ལས་བཅས་གནམ་ཐང་དུ་ཕེབས་བསུར་བཅར་འདུག
ཕྱི་ཚེས་ ༢༧ ཉིན་གཙོ་བོ་ཐེ་ཝན་འཕྲོད་བསྟེན་ལས་ཁུངས་ཐེ་པེ་སྨན་ཁང་གི་འགན་འཛིན་སྐུ་ཞབས་ཞུའུ་ལགས་དང་། ཐེ་ཝན་རྒྱལ་སྤྱིའི་སྨན་བཅོས་འཕྲོད་བསྟེན་མི་སྣ་གསོ་སྐྱོང་སྡེ་ཚན་གྱི་སློབ་སྟོན་པ་སྨན་པ་སྐུ་ཞབས་ལིན་ལགས། སྨན་ཞབས་སྡེ་ཚན་གྱི་འགན་འཛིན་སྲས་མོ་ཞུའུ་ལགས། སྦྱོང་བརྡར་སྡེ་ཚན་གྱི་འགན་འཛིན་སྲས་མོ་ཅཱང་ལགས་སོགས་མཇལ་འཕྲད་དང་བཞུགས་མོལ་ཚོགས་འདུ་གནང་། ཐེ་པེ་སྨན་ཁང་གི་འགན་འཛིན་མཆོག་ནས་ཐོག་མར་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་སྨན་ཁང་སྐོར་ངོ་སྤྲོད་གནང་རྗེས། བཀའ་བློན་ཆོས་སྐྱོང་དབང་ཕྱུག་མཆོག་ནས་བཙན་བྱོལ་ནང་གི་འཕྲོད་བསྟེན་སྐོར་ངོ་སྤྲོད་དང་། འདས་པའི་ལོ་མང་རིང་བཙན་བྱོལ་བོད་མིའི་སྨན་པ་དང་སྨན་ཞབས་ཁག་གཅིག་ལ་སྦྱོང་བརྡར་སྤྲད་གནང་བར་ཐུགས་རྗེ་ཆེ་ཞུས་པ་དང་མུ་མཐུད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་སོགས་ཞུས། གཞན་ཡང་བཀའ་བློན་མཆོག་དེ་ཉིན་ཐེ་ཝན་ནང་ཡོད་པའི་བོད་པའི་ཆོས་ཚོགས་ཁག་གཅིག་ནང་འཚམས་གཟིགས་གནང་།
ཕྱི་ཚེས་ ༢༦ ཉིན་ཐེ་ཝན་སེམས་བཟང་མཆིན་ནད་སྨན་བཅོས་ཐེབས་རྩ་ཁང་གི་འགན་འཛིན་དང་། ཆེད་ལས་སྨན་པ་བཅས་དང་མཇལ་འཕྲད་ཀྱིས་བཙན་བྱོལ་བོད་མིའི་ཁྲོད་མཆིན་ནད་དཀའ་ངལ་དང་འབྲེལ་བའི་སྐོར་ལ་བཀའ་བསྡུར་གནང་། དགོང་དྲོ་ཐེ་ཝན་དགའ་ལྡན་ཤར་རྩེ་ནང་ཆོས་སློབ་གཉེར་ཁང་གིས་གོ་སྒྲིག་གནང་བའི་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུ་བའི་མཚན་ཚོགས་སུ་མཉམ་ཞུགས་གནང་ཡོད། ཕྱི་ཚེས་ ༢༧ སྔ་དྲོ་ཐེ་ཝན་གྲོས་ཚོགས་འཐུས་མི་སྐུ་ཞབས་ Freddy Lim ལགས་དང་མཇལ་འཕྲད་གནང་སྟེ་བོད་དོན་ཐོག་ལོ་མང་རིང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་། བོད་མི་སློབ་ཕྲུག་ཐེ་ཝན་དུ་སློབ་སྦྱོང་དང་སྦྱོང་བརྡར་སོགས་ཀྱི་སྐོར་བཀའ་མོལ་ཞུས། ཉིན་གུང་ཐེ་ཝན་བྱམས་བརྩེ་འཚོ་བྱེད་ཚོགས་པའི་འགན་འཛིན་དང་ཚོགས་མི་ཁག་གཅིག་དང་མཇལ་འཕྲད་གནང་སྟེ་འདས་པའི་དུས་ཡུན་རིང་བཙན་བྱོལ་བོད་མིའི་སྤྱི་ཚོགས་ནང་འཕྲོད་བསྟེན་ཐོག་མི་རྒྱུ་གཉིས་ཀྱི་རྒྱབ་སྐྱོར་གནང་བ་ཚོགས་པའི་མིང་དང་དོན་མཚུངས་པ་ཞིག་བྱུང་ཡོད་པར་བསྔགས་བརྗོད་དང་། ལྷག་པར་ ༢༠༡༧ ལོར་འཕགས་ཡུལ་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་སྐབས་ཐེ་ཝན་བྱམས་བརྩེ་འཚོ་བྱེད་ཚོགས་པ་ནས་མཐུན་འགྱུར་གནང་ཡོད་བར་དཔལ་ལྡན་སྲིད་སྐྱོང་མཆོག་དང་བཀའ་ཤག་གི་ཚབ་ཞུས་ཏེ་ཐུགས་རྗེ་ཆེ་ཞུའི་ཕྱག་རྟགས་ཕུལ།
གྲོས་ཚོགས་འཐུས་མི་ Freddy Limདང་ལྷན།
འཕྲོད་བསྟེན་བཀའ་བློན་མཆོག་ནས་ཐེངས་འདིར་སྨན་པ་ཁག་མཉམ་མཇལ་འཕྲད་དང་བཞུགས་མོལ་ལྷན་ཚོགས་སྐབས་འདས་པའི༷་དུས་རིམ་ནང་བོད་མི་ལ་གློ་ནད་ཀྱི་དཀའ་ངལ་འཕྲད་པ་དང་གདོང་ལེན་གནང་བའི་བརྒྱུད་རིམ་མདོར་བསྡུས་ངོ་སྤྲོད་དང་། ད་ཆ་བཙན་བྱོལ་བོད་མིའི་སྤྱི་ཚོགས་ནང་མཆིན་ནད་ཀྱི་དཀའ་ངལ་འཕྲད་བཞིན་ཡོད་པ་དེར་གདོང་ལེན་བྱ་རྒྱུར་འཕྲོད་བསྟེན་ལས་ཁུངས་ཀྱི་ལས་འགན་གཙོ་བོ་ཞིག་ཆགས་ཡོད་སྐོ་དང་།
སྤྱི་ལོ་གྱ་གྲངས་ནང་ཐེ་ཝན་མཆིན་ནད་ཀྱི་དཀའ་ངལ་འཕྲད་པ་ནས་ད་ཆ་དཀའ་ངལ་དེ་ལས་ཡོངས་སུ་ཐར་ཟིན་སྟབས་ཉམས་མྱོང་དང་ཤེས་བྱ་ཕུན་སུམ་ཚོགས་པོ་ཡོད་པས་བོད་མི་ཚོར་ནད་གཞི་དེའི་ཐོག་ལམ་སྟོན་དང་མཐུན་འགྱུར་གནང་ཐབས་སྐོར་ལ་བགྲོ་གླེང་བྱུང་ཞིང་། སེམས་འཚབ་བྱེད་དགོས་པའི་གནད་དོན་ཐོག་སྨན་ཁང་དང་སྨན་པ་ཚོས་གང་ཐུབ་ཀྱི་མཐུན་འགྱུར་དང་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད་པ་བཅས།།
