༢༠༡༨ ཟླ་ ༦ ཚེས་ ༢༢ རེས་གཟའ་པ་སངས།

༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་རྡ་ས་དབུས་སྣེ་ལེན་འབྲེལ་མཐུད་ཁང་དུ་ཕྱི་ལོ་ ༢༠༡༨ ་་་་༢༠༡༩ ལོའི་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་བརྒྱུད་རིམ་བར་མའི་བསྐྱར་ཞིབ་དང་སྨན་གྲོན་ཐོབ་ཆ་ཞུ་ཕྱོགས་སྐོར་ཟབ་སྦྱོང་ཞིག་གོ་སྒྲིག་གནང་འདུག

དེ་ཡང་ཕྱི་ཚེས་ ༡༨ ཉིན་ཟབ་སྦྱོང་དབུ་འབྱེད་ཀྱི་མཛད་སྒོར་སྐུ་མགྲོན་གཙོ་བོ་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་། དྲུང་ཆེ་ཆུ་སྐྱ་སྦྲ་གཉིས་ཚེ་རྒྱལ་ལགས། དྲུང་འཕར་ཡེ་ཤེས་དབང་མོ། ཟུང་དྲུང་བྱམས་པ་ཕུན་ཚོགས་ལགས། འབྲེལ་ཡོད་ལས་བྱེད་མི་འགྱུར་གཡུ་སྒྲོན་ལགས། ས་གནས་ཁག་ ༡༦ ནས་སྨན་བཅོས་ལྟ་སྐྱོང་ལས་གཞིའི་འབྲེལ་ཡོད་ལས་བྱེད་བཅས་ལྷན་འཛོམས་ཐོག་སྐུ་མགྲོན་གཙོ་བོ་འཕྲོད་བསྟེན་བཀའ་བློན་མཆོག་གིས་སྨན་བཅོས་ལྟ་སྐྱོང་གི་ལས་གཞི་ཡུན་གནས་ཐུབ་ཐབས་སུ་ཚོགས་མི་རྣམས་ལ་སྨན་བཅོས་ཀྱི་རིམ་པ་གཉིས་པ་དང་གསུམ་པའི་མཐུན་རྐྱེན་དང་གལ་གནད་སོགས་ཀྱི་སྐོར་གསུང་བཤད་གནང་ཡོད།

ཐེངས་འདིའི་ཟབ་སྦྱོང་གི་དགོས་དམིགས་གཙོ་བོ་ནི། ཕྱི་ལོ་ ༢༠༡༨ ་་་༢༠༡༩ ལོའི་སྨན་བཅོས་ལྟ་སྐྱོང་ལས་གཞིའི་གོ་རྟོགས་སྤེལ་ཕྱོགས་སྐོར་དང་། ཚོགས་མི་མིང་ཐོ་དེབ་འགོད་གནང་ཕྱོགས་ཀྱི་གནས་སྟངས་སྐོར། དེ་བཞིན་དཀའ་ངལ་ལ་གདོང་ལེན་ཇི་ལྟར་གནང་དགོས་སོགས་ཀྱི་སྐོར་ལ་བསྐྱར་ཞིབ་བྱ་རྒྱུ་དེ་ཡིན་པ་རེད། 

ཐེངས་འདིའི་ཟབ་སྦྱོང་ལ་མཐུན་འགྱུར་རོགས་རམ་གནང་མཁན་ཨ་རིའི་རོགས་ཚོགས་ USAID ཡིན་འདུག་པ་བཅས།།