ཕྱི་ལོ་ ༢༠༡༨ ཟླ་ ༦ ཚེས་ ༢༦ རེས་གཟའ་མིག་དམར།

༄༅། །ཕྱི་ལོ་ ༢༠༡༨ ཟླ་ ༦ ཚེས་ ༢༦ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་ཕྱི་ལོ་ ༢༠༡༨ ཟླ་ ༦ ཚེས་ ༢༦ ནས་ཟླ་ ༧ ཚེས་ ༤ བར་བཞུགས་སྒར་རྡ་སའི་ཉེ་འགྲམ་དུ་རྟེན་གཞི་བྱས་པའི་འཛིན་སྐྱོང་སྦྱོང་བརྡར་ཁང་དུ་བོད་མིའི་སྒྲིག་འཛུགས་ཀྱི་རྩིས་ཞིབ་པ་རྣམས་ལ་རྩིས་ཞིབ་པའི་ལས་དོན་བྱེད་ཕྱོགས་དང་འབྲེལ་བའི་དམིགས་བསལ་ཟབ་སྦྱོང་ཞིག་ཚོགས་སོང་།

དེ་ཡང་ཟབ་སྦྱོང་དབུ་འབྱེད་ཀྱི་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་། འདེམས་བསྐོ་ལྷན་ཁང་གི་ཚོགས་གཙོ་ཤོ་ཟུར་བསོད་ནམས་ཆོས་འཕེལ་ལགས། རྩིས་ཞིབ་སྤྱི་ཁྱབ་པ་ཨརྱ་པདྨ་དགྲ་འདུལ་ལགས། འདེམས་ལྷན་དྲུང་ཆེ་འཇིགས་མེད་ཚེ་རིང་ལགས། ཟབ་ཁྲིད་པ་སྐུ་ཞབས་སཏྱ་ཀུ་མར་ M.Sathya Kumar ལགས། རྩིས་ཞིབ་དྲུང་ཚབ་ལྷུན་གྲུབ་སྒང་བཀྲ་ཤིས་སྟོབས་རྒྱལ་ལགས། དེ་བཞིན་ཟབ་སྦྱོང་ནང་མཉམ་ཞུགས་བྱེད་མཁན་བོད་མིའི་སྒྲིག་འཛུགས་ཀྱི་དབུས་རྩིས་ཞིབ་ལས་ཁུངས་ནས་ལས་བྱེད་གྲངས་ ༢༢ དང་། བལ་ཡུལ་རྩིས་ཞིབ་ལས་ཁུངས་ནས་ལས་བྱེད་གྲངས་ ༤ ། ལྷོ་ཕྱོགས་རྩིས་ཞིབ་ལས་ཁུངས་ནས་ལས་བྱེད་གྲངས་ ༧ ། བདེ་སྐྱིད་གླིང་རྩིས་ཞིབ་ལས་ཁུངས་ནས་ལས་བྱེད་གྲངས་ ༡༡ བཅས་ཁྱོན་ལས་བྱེད་གྲངས་ ༤༤ བཅས་ལྷན་འཛོམས་ཀྱི་ཐོག་མར་སྐུ་མགྲོན་གཙོ་བོ་མཆོག་གིས་སྣང་གསལ་ཞལ་ཕྱེ་གནང་སྟེ་ཟབ་སྦྱོང་དབུ་འབྱེད་གནང་བ་དང་སྦྲགས། ཟབ་སྦྱོང་ནང་མཉམ་ཞུགས་པ་རྣམས་ནས་རང་ཉིད་སྐོར་ངོ་སྤྲོད་གནང་།

དེ་ནས་འདེམས་ལྷན་དྲུང་ཆེས་ཟབ་སྦྱོང་སྐོར་ངོ་སྤྲོད་གསུང་བཤད་གནང་རྗེས་སྤྱི་ཁྱབ་རྩིས་ཞིབ་པས་རྩིས་དང་འབྲེལ་བའི་གསུང་བཤད་གནང་། དེ་རྗེས་འདེམས་ལྷན་ཚོགས་གཙོས་ཟབ་སྦྱོང་གི་དགོས་དམིགས་སྐོར་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་འཚམས་འདྲི་དང་འབྲེལ་གསུང་བཤད་གནང་དོན།

སྤྱིར་ཕྲན་ལ་རྩིས་དང་འབྲེལ་བའི་དམིགས་བསལ་ཉམས་མྱོང་གང་ཡང་མེད། སྐབས་གསུམ་རིང་སྤྱི་འཐུས་བྱེད་སྐབས་སྔོན་རྩིས་ཚོད་དཔག་ཚོགས་ཆུང་དང་མང་ཚོགས་རྩིས་ཁྲ་ཚོགས་ཆུང་ནང་ཕྲན་བུ་བསྡད་པའི་ཉམས་མྱོང་དང་། དེ་སྔ་རྩིས་ཞིབ་ལས་ཁུངས་སུ་རྩིས་ཞིབ་བྱེད་མཁན་ཞིག་གི་ཚོགས་གཙོ་སྐབས་གསུམ་རིང་བསྟུད་མར་བྱས་པ་མ་གཏོགས་དེ་ལས་གཞན་པའི་རྩིས་ཞིབ་སྐོར་ལ་ངས་གང་ཡང་ཤེས་ཀྱི་མ་རེད། འོན་ཀྱང་དེ་རིང་འདིར་སྐུ་མགྲོན་གཙོ་བོར་ཡོང་དགོས་རེད་ཅེས་འདེམས་བསྐོ་ལྷན་ཁང་ནས་གསུང་སྟབས་ས་བཅད་མ་སྟོང་ཙམ་གྱི་སྐད་ཆ་བཤད་རྒྱུའི་འབད་བརྩོན་ཞུ་རྒྱུ་ཡིན། 

སྤྱིར་བཙན་བྱོལ་བོད་མིའི་བཅའ་ཁྲིམས་ལེའུ་བཅུ་གཅིག་དང་དོན་ཚན་བརྒྱ་དང་བཅོ་ལྔ་ཡོད་པའི་ནང་ནས་ལེའུ་བརྒྱད་པ་ནི། འོས་བསྡུའི་ལས་དོན་སྐོར་དང་། ལེའུ་དགུ་པ་ལས་བྱེད་འདེམས་བསྐོའི་ལས་དོན་སྐོར། ལེའུ་བཅུ་པ་རྩིས་ཞིབ་ལས་དོན་སྐོར་གསུང་གི་ཡོད་པ་རེད། རང་དབང་ཅན་གྱི་ལས་ཁུངས་གསུམ་ནི་མང་གཙོ་ཀ་བ་གསུམ་ཕར་ཕུད་པའི་རྗེས་ལ་བཅའ་ཁྲིམས་ནས་བཏོན་པའི་སྒྲིག་འཛུགས་ཧ་ཅང་གལ་ཆེན་པོ་ཞིག་དང་། དེ་སྔ་ཡིན་ན་དེ་དག་གི་འགན་འཛིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐད་བསྐོ་ལམ་ལུགས་ཡོད།

བར་སྐབས་ནས་འགྱུར་བ་ཕྱིན་ཏེ་བཅའ་ཁྲིམས་ཀྱི་ལམ་སྟོན་ཐོག་ནས་མཛད་གཙོ་རྣམ་པས་ཚོགས་ཆུང་བཙུགས་ནས་ཚོགས་ཆུང་གི་ཚོགས་མིས་འཆར་འབུལ་བྱས་ནས་སྤྱི་འཐུས་ལྷན་ཚོགས་སུ་འོས་བསྡུ་བྱས་ཏེ་བསྐོ་གཞག་དང་། གལ་ཏེ་གྲོས་ཚོགས་མ་འཚོགས་པའི་སྐབས་བསྐོ་གཞག་བྱེད་དགོས་བྱུང་ཚེ་སྤྱི་འཐུས་རྒྱུན་ལས་ནས་བསྐོ་གཞག་བྱེད་ཀྱི་ཡོད་སྟབས་རང་དབང་ཅན་གྱི་ལས་ཁུངས་གསུམ་ནི་ལས་ཀའི་ངོ་བོ་ཐོག་ནས་རང་དབང་ཐོན་ཐུབ་པ་དང་། བཅའ་ཁྲིམས་ནང་དམིགས་བསལ་ཆ་རྐྱེན་ཡོད་པའི་ལས་ཁུངས་ཤིག་ཡིན། གཞན་འཛིན་སྐྱོང་། ཁྲིམས་བཟོ། ཁྲིམས་ཞིབ་ལས་གཞན་པའི་ལྷན་ཁང་མེད།

འདི་གསུམ་ཧ་ཅང་དམིགས་བསལ་ཆགས་སྟབས་འདི་དགོངས་པར་བཅང་དགོས་རྒྱུ་ཧ་ཅང་གལ་ཆེན་པོ་ཡིན་པ་ག་དུས་ཡིན་ནའང་སེམས་ལ་གཞག་རོགས་། བཅའ་ཁྲིམས་དོན་ཚན་ ༡༠༦ དང་ ༡༠༧  ནང་རྩིས་ཞིབ་ལས་ཁུངས་དང་སྒྲིག་འཛུགས་སྐོར་བཤད་ཡོད། དོན་ཚན་  ༡༠༨  ནི་རྣམ་པ་ཚོའི་འགན་དབང་སྐོར་བཤད་ཡོད། འགན་དབང་ཟེར་ན་གང་རེད། བཅའ་ཁྲིམས་ནང་རྩིས་ཞིབ་ལས་ཁུངས་ཕུད་པའི་ལས་ཁུངས་ཚང་མའི་རྩིས་ཁྲ་རྩིས་ཞིབ་བྱེད་དགོས་པ་དང་། རྩིས་ཞིབ་བྱེད་རྒྱུ་དེ་ཡང་དུས་ཐོག་ཚར་དགོས་པ་དེ་དག་རྩིས་ཞིབ་ཀྱི་འགན་རེད། སྐབས་རེ་རྩིས་ཞིབ་ལས་ཁུངས་སུ་ལས་བྱེད་མི་འདང་བའི་དཀའ་ངལ་གསུང་གི་རེད། བརྒྱ་ཆ་བརྒྱ་བདེན་པ་ཡིན་པ་ངས་ཤེས་ཀྱི་ཡོད། 

རྩིས་ཞིབ་ཀྱི་ལས་འགན་ནི་རྩིས་ཞིབ་སྤུས་དག་པོ་གནང་དགོས་པ་དང་། གཉིས་པ་ནི་བོད་མི་མང་སྤྱི་འཐུས་ལྷན་ཚོགས་ཀྱི་གཏན་ལ་ཕབ་པའི་རྩིས་དང་འབྲེལ་བའི་སྒྲིག་གཞི་ཁག་ལ་གཞི་བཅོལ་བའི་ཐོག་ནས་རྩིས་ཞིབ་བྱེད་རྒྱུ་དེ་རེད། ལས་ཀར་ལྟོས་ནས་རྩིས་ཞིབ་བྱེད་དགོས། དེ་བཞིན་སྒྲིག་གཞི་ཁག་གཞི་ལ་བཞག་ནས་རྩིས་ཞིབ་བྱེད་དགོས། གསུམ་པ་ནི། རྣམ་པ་ཚོ་རྩིས་ཞིབ་བྱེད་པའི་སྐབས་སུ་ལས་དོན་སྙན་ཐོ་ཆ་ཚང་འབྲེལ་ཡོད་ལས་ཁུངས་དང་། ངོ་བཤུས་བཀའ་ཤག་དང་དཔལ་འབྱོར་ལས་ཁུངས། ཚོགས་དྲུང་ལས་ཁུངས་ལ་འབུལ་རྒྱུ་དེ་དག་ཚང་མ་བཅའ་ཁྲིམས་ནས་བཀུར་བའི་ལས་འགན་གལ་ཆེན་པོ་ཞིག་དང་། བཅའ་ཁྲིམས་ནང་གསལ་བའི་ལས་འགན་ཡིན་སྟབས། རྩིས་ཞིབ་ཀྱི་ལས་ཀ་ནི་ཧ་ཅང་གལ་ཆེན་པོ་ཡིན་པ་སེམས་ལ་བཞག་ནས་ཕྱག་ལས་གནང་དགོས་རྒྱུ་གལ་ཆེན་པོ་རེད་དྲན་གྱི་འདུག

དེ་བཞིན་བཅའ་ཁྲིམས་ཀྱི་ཆ་རྐྱེན་འོག་བཟོས་པའི་རྩིས་ཞིབ་ཀྱི་སྒྲིག་གཞིའི་ནང་དོན་ཚན་བཅུ་ལས་མེད། ལྟ་དུས་སྟབས་བདེ་བོ་ལྟ་བུ་ཡོད། ཞིབ་ཚགས་པོ་ཕྱིན་ན་ག་འདྲ་ལས་ཀ་བྱེད་དགོས་པ་གོང་དུ་བཅའ་ཁྲིམས་དོན་ཚན་ཁག་ལུང་དྲངས་པའི་ནང་འགན་དབང་སོགས་ཆ་ཚང་ཞིབ་ཚགས་པོ་ཡོད། དེ་དག་གཞི་ལ་བཞག་ནས་ཕྱག་ལས་གནང་བ་ཡིན་ན། དཀའ་ངལ་གང་ཡང་མེད། 

དོན་ཚན་གཞན་ཞིག་ནི། རྩིས་ཞིབ་ཀྱི་སྒྲིག་གཞི་དོན་ཚན་བདུན་པའི་ནང་ལངས་ཕྱོགས་དོན་ཚན་བདུན་གཏན་འབེབས་གནང་ཡོད་པ་རེད། སྒྲིག་གཞི་དོན་ཚན་དེ་དག་ཀློག་པ་ཡིན་ན་རྣམ་དཔྱོད་གསར་པ་དང་ཁྲིམས་ཀྱི་རྒྱབ་རྟེན་ཤེས་རྒྱུར་ཧ་ཅང་ཕན་ཐོགས་ཡོད། བཅའ་ཁྲིམས་གཙོ་བོར་གྱུར་པའི་རྩིས་ཞིབ་ལས་དོན་གྱི་སྒྲིག་གཞི་དང་། དེ་བཞིན་དཔར་འབྱོར་དང་འབྲེལ་བའི་སྒྲིག་གཞི་ཁག་ཁ་ཤས་ཡོད་པ་དེ་དག་གཟིགས་ནས་གནང་བ་ཡིན་ན། ཕྱག་ལས་གནང་རྒྱུར་དཀའ་ངལ་གང་ཡང་འཕྲད་ཀྱི་མ་རེད་བསམ་གྱི་འདུག 

རྣམ་པ་ཚོས་དོ་སྣང་བྱེད་དགོས་པ་ཞིག་ལ། རྩིས་ཞིབ་བྱེད་སྐབས་སྔོན་རྩིས་བཀའ་བཀའ་ཁྲོལ་ཡོད་མེད་དང་བར་བརྒལ་བཀའ་ཁྲོལ་ཡོད་མེད་ཙམ་མ་ཡིན་པར། གཙོ་བོ་ལས་ཀ་དེ་དམིགས་སར་ཕན་ཐོགས་འདུག་མི་འདུག་གཟིགས་དགོས་པ་གལ་ཆེན་པོ་རེད།
གང་ཟག་ལ་མི་རྟོན་ཆོས་ལ་རྟོན། ཚིག་ལ་མི་རྟོན་དོན་ལ་རྟོན་ཞེས་དོན་ལ་བལྟས་ནས་རྩིས་ཞིབ་གནང་རྒྱུ་དེ་ཧ་ཅང་གལ་ཆེན་པོ་རེད། སྐབས་རེ་རྩིས་ཞིབ་བྱེད་སྐབས་མགོ་བདེ་དྲན་འཕྲུལ་རིགས་ཐར་འགྲོ་བ་དང་མི་ཉམ་ཆུང་ལྷག་བསམ་ཅན་འགའ་ཞིག་གིས་ཚིག་ངན་འཁྱེར་དགོས་པ་དེ་འདྲ་ཡོང་གི་ཡོད། དེར་བརྟེན་རྣམ་པ་ཚོས་རྩིས་ཞིབ་བྱེད་སྐབས་དེ་འདྲིའི་རིགས་མ་ཡོང་བ་བྱེད་དགོས། དེ་འདྲ་གནང་བ་ཡིན་ན་དྲང་པོ་རྩ་བ་ནས་མ་རེད། མ་འོངས་པར་མགོ་བདེ་དྲན་འཕྲུལ་རིགས་མ་ཡོང་བ་བྱེད་དགོས། དེ་བཞིན་རྩིས་ཞིབ་ལས་ཀ་དུས་ཐོག་ཚར་དགོས་པ་ཧ་ཅང་གལ་ཆེན་པོ་རེད། ཁྱེད་རྣམ་པས་རྩིས་ཞིབ་གནང་སྐབས་རྒྱ་གར་དང་བལ་ཡུལ་གྱི་ཡུལ་ཁྲིམས་ལའང་བརྩི་དགོས། དེ་བཞིན་རྒྱ་གར་གྱི་དངོས་ཟོག་དང་ཞབས་ཞུའི་ཁྲལ་ Goods and Services Tax (GST) ཡང་ཡང་འགྱུར་བ་འགྲོ་གི་ཡོད་པ་བཞིན། དེ་ཚོའི་སྐོར་ལའང་རྣམ་པ་ཚོས་ཟབ་སྦྱོང་ཁག་གི་ནང་མཉམ་ཞུགས་གནང་སྟེ་སོ་སོས་མཁྱེན་པ་དེ་ཕན་ཚུན་དབར་གོ་རྟོགས་སྤེལ་རེས་གནང་ཐུབ་ན་ཡག་པོ་ཡོད།

མཐའ་དོན་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ཞབས་པད་བསྐལ་བརྒྱར་བརྟན་པ་དང་རྣམ་པ་ཚོའི་ཟབ་སྦྱོང་གང་ལེགས་ཡོང་བའི་སྨོན་འདུན་ཞུ་རྒྱུ་ཡིན། ཞེས་གསུང་བཤད་གནང་།

འཇུག་ཏུ་ལས་བྱེད་འདེམས་ལྷན་གྱི་རྩིས་པས་ཐུགས་རྗེ་ཆེ་ཞུའི་གསུང་བཤད་གནང་སྟེ་དབུ་འབྱེད་མཛད་སྒོ་ལེགས་པར་གྲུབ་ཡོད་པ་བཅས། །