༢༠༡༨ ཟླ་ ༦ ཚེས་ ༢༧ རེས་གཟའ་ལྷག་པ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ ༢༠༡༨ ཟླ་ ༦ ཚེས་ ༢༧ ཉིན་བཏང་གནས་ནང་འཁོད་དོན། སྤྱི་ཟླ་ ༦ ཚེས་ ༢༦ དགོང་དྲོ་ཐེ་ཝན་དགའ་ལྡན་ཤར་རྩེ་ནང་ཆོས་སློབ་གཉེར་ཁང་གིས་གོ་སྒྲིག་གནང་བའི་ ༼སྤྱན་རས་གཟིགས་ཀྱི་ཞི་བདེའི་མཚན་ཚོགས་༽ ཞེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༣ ལ་ཕེབས་པའི་༸སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་འདུག
དེ་ཡང་དགོང་དྲོ་ཆུ་ཚོད་ ༦།༣༠ཐོག་མཚན་ཚོགས་དབུ་འཛུགས་གནང་སྐབས་ཐོག་མར་རྟེན་འབྲེལ་མཚོན་ཆེད་བོད་ཀྱི་ཟློས་གར་ཚོགས་པས་སྲོལ་རྒྱུན་ཡར་ཀླུང་བཀྲ་ཤིས་ཞོལ་པ་གཟིགས་འབུལ་གནང་། དེ་རྗེས་དྲ་རྒྱའི་བརྙན་པར་ཐད་གཏོང་བརྒྱུད་༸གོང་ས་མཆོག་ནས་ཚོགས་ཞུགས་ཐེ་ཝན་མི་མང་རྣམས་ལ་འཚམས་འདྲི་དང་བཀའ་སློབ་སྩལ་བའི་བརྙན་འཕྲིན་མཇལ་སྐབས་དད་ལྡན་མང་ཚོགས་རྣམས་ཀྱིས་ལག་གཉིས་ཐལ་མོ་སྦྱར་བཞིན་པའི་ངང་༸གོང་ས་༸སྐྱབས་མགོན་ཆེན་པོ་མཆོག་ལ་༸སྐུའི་འཁྲུངས་སྐར་ལ་འཚམས་འདྲི་བཀྲ་ཤིས་བདེ་ལེགས་ཞུས།
མཛད་སྒོའི་ཐོག་༸གོང་ས་མཆོག་གི་མཚན་ཐོག་ནས་ཐེ་ཝན་ལྷོ་ཕྱོགས་ནན་ཐའོ་རྫོང་མེ་གསོད་ལས་ཁུངས་ལ་ཛ་དྲག་མྱུར་སྐྱོབ་སྣུམ་འཁོར་ཞལ་འདེབས་ཕུལ་བ་དང་། རྫོང་དཔོན་གཞོན་པས་དཀའ་ངལ་ཆེ་བའི་ས་གནས་ནས་རེ་སྐུལ་ཞུས་པ་ལྟར་ཛ་དྲག་མྱུར་སྐྱོབ་སྣུམ་འཁོར་ཞལ་འདེབས་གནང་བར་ཐུགས་རྗེ་ཆེ་ཞུས། སྣུམ་འཁོར་དེས་དངོས་ཡོད་ས་གནས་ཀྱི་ཛ་དྲག་མྱུར་སྐྱོབ་ལ་ཕན་ཐོགས་ཡོང་ངེས་པའི་གསུང་བཤད་གནང་བསྟུན། སྐུ་མགྲོན་གཙོ་བོ་ཐེ་ཝན་བོད་ཀྱི་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་མཚན་ཚོགས་གོ་སྒྲིག་གནང་མཁན་ཐེ་ཝན་དགའ་ལྡན་ཤར་རྩེ་ནང་ཆོས་སློབ་གཉེར་ཁང་ནས་ད་བར་མཚན་ཚོགས་ཐེངས་དགུ་གོ་སྒྲིག་ཞུས་ཟིན་པ་དང་། ད་ཐེངས་མཚན་ཚོགས་ཐེངས་བཅུ་པ་ཡིན་པ་མ་ཟད། ལོ་རེ་བཞིན་གཞི་རྒྱ་ཆེ་རུ་འགྲོ་བཞིན་ཡོད་སྐོར། ལོ་ལྟར་མཚན་ཚོགས་གོ་སྒྲིག་ཞུ་རྒྱུ་ཕུད་རྒྱུན་དུ་བོད་མིར་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུས།
དེ་རྗེས་གཞན་ཡང་ཤར་པ་ཆོས་རྗེ་རིན་པོ་ཆེ་མཆོག་དང་། དགའ་ལྡན་ཤར་རྩེ་གྲྭ་ཚང་གི་མཁན་ཟུར་རིན་པོ་ཆེ་མཆོག་ནས་ཐུགས་རྗེ་ཆེ་ཞུའི་གསུང་བཤད་གྲུབ་རྗེས། བོད་ཀྱི་ཟློས་གར་ཚོགས་པས་དྲུག་བཅུའི་དབྱངས་ལྡན་དང་། ཆོལ་གསུམ་མི་རིགས་ཀྱི་འཁྲབ་གཞས་གསང་གསུམ་གྱི་མཛད་འཕྲིན། རྔོན་པ་རིགས་ལྔ་བཅས་བོད་ལུགས་འཁྲབ་སྟོན་གྲུབ་རྗེས། ཐེ་ཝན་གྱི་ཞབས་གཞས་སྣ་མང་གཟིགས་འབུལ་གནང་།
མཚན་ཚོགས་གོ་སྒྲིག་གནང་མཁན་གྱིས། བོད་མི་རྣམས་བཙན་བྱོལ་དུ་གྱར་ནས་ལོ་དྲུག་ཅུ་འཁོར་བ་དང་། ཐེ་ཝན་བོད་ཀྱི་སྐུ་ཚབ་དོན་གཅོད་དབུ་བརྙེས་ནས་ལོ་ ༢༠ འཁོར་བ། དགའ་ལྡན་ཤར་རྩེ་ནང་ཆོས་སློབ་གཉེར་ཁང་གིས་གོ་སྒྲིག་གནང་བའི་སྤྱན་རས་གཟིགས་ཀྱི་ཞི་བདེའི་མཚན་ཚོགས་གཉེར་ནས་ལོ་བཅུ་འཁོར་བ་བཅས་དམིགས་བསལ་དུས་ཚིགས་གསུམ་འཛོམས་ཀྱི་ངོ་སྤྲོད་དང་། ཕྱི་རྒྱལ་མི་རིགས་ཀྱིས་བཙན་བྱོལ་བོད་མིའི་སྤྱི་ཚོགས་ལ་སྨན་པའི་ལག་དེབ་སྔོན་པོ་ Blue Book ངོ་སྤྲོད་དང་མུ་མཐུད་རྒྱབ་སྐྱོར་དགོས་པའི་འབོད་སྐུལ་ཡང་གནང་བ་བཅས།།
