༢༠༡༨ ཟླ་ ༦ ཚེས་ ༢༡ རེས་གཟའ་ཕུར་བུ།
༄༅།།འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༦ ཚེས་ ༢༡ ཉིན་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་ཕྱི་ལོ་ ༢༠༡༨ ལོའི་བོད་ཀྱི་རིག་གཞུང་དང་སྒྱུ་རྩལ་མ་དངུལ་གྱི་མཐའ་མའི་འདེམས་སྒྲུག་ཆེད་སྙན་འབུལ་བ་རྣམས་ཀྱི་ངོ་གཏུགས་འདྲི་གླེང་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་འདེམས་སྒྲུག་ཚོགས་ཆུང་གིས་རྡ་ས་ཉེ་འཁྲིས་སུ་གནས་སྡོད་སྙན་འབུལ་བ་རྣམས་ཀྱི་ངོ་གཏུགས་འདྲི་གླེང་གནང་ཡོད་པ་དང་། སང་ཉིན་ཕྱི་ཚེས་ ༢༢ ཉིན་ཕྱོགས་མཐའ་ཁག་ཏུ་ཡོད་པའི་སྙན་འབུལ་བ་རྣམས་ལ་བརྙན་པར་ (video calling) བརྒྱུད་དྲི་བ་དྲིས་ལན་གནང་རྒྱུ་དང་།
ཐེངས་འདིར་ལས་འཆར་སྙན་འབུལ་བ་ཁྱོན་གྲངས་ ༢༦ བྱུང་ཡོད་པ་དང་། ལས་གཞི་འདིའི་ཆེད་ཚོགས་མི་ལྔ་ལས་གྲུབ་པའི་འདེམས་སྒྲུག་ཚོགས་ཆུང་ཞིག་ཆེད་འཛུགས་གནང་ཡོད་པ་རྣམས་ནི།
༡༽ བསྟན་འཛིན་ལུང་རྟོགས། ༼ཆོས་རིག་དྲུང་ཆེ།༽
༢༽ ཚེ་རིང་དབྱངས་སྐྱིད། ༼ཕྱི་དྲིལ་དྲུང་འཕར།༽
༣། ཐུབ་བསྟན་ཡར་འཕེལ། ༼རྣམ་གྲྭ་ཤེས་ཡོན་ལྷན་ཚོགས་ཀྱི་འགན་འཛིན།༽
༤། བློ་བཟང་བསམ་གཏན། ༼བོད་ཀྱི་ཟློས་གར་ཚོགས་པའི་འཁྲབ་སྟོན་འགན་འཛིན།༽
༥། བསྟན་འཛིན་ནོར་བུ། ༼ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ལྷ་བྲིས་དགེ་རྒན།༽ བཅས་ཡིན།
སྤྱིར་བོད་ཀྱི་རིག་གཞུང་དང་སྒྱུ་རྩལ་མ་དངུལ་གྱི་ལས་འཆར་ནི་བོད་ཀྱི་སྲོལ་རྒྱུན་རིག་གཞུང་དང་། དེང་རབས་བོད་ཀྱི་བཟོ་རིག་སྒྱུ་རྩལ་རྒྱུན་འཛིན་དང་གོང་སྤེལ་སླད། བོད་ཀྱི་རིག་གཞུང་དང་། སྐད་ཡིག སྒྱུ་རྩལ་ཁོ་ནའི་ལས་འཆར་ཐོག་ཞབས་འདེགས་ཞུ་མཁན་ནམ་ལས་འཆར་འདྲ་མིན་སྤེལ་མཁན་ཚོགས་སྒེར་ཁག་ལ་རོགས་དངུལ་ཧིན་སྒོར་ཁྲི་ལྔ་ནས་འབུམ་གསུམ་བར་རམ་འདེགས་ཞུ་ཕྱིར་དམིགས་པ་ཞིག་ཡིན། མཐའ་མའི་འདེམས་སྒྲུག་ཟིན་པའི་མི་འགྲོ་རྣམས་ལ་ཕྱི་ལོ་ ༢༠༡༨ ཟླ་ ༧ ཚེས་ ༡༥ འགྱངས་མེད་བརྡ་ལན་གཏོང་རྒྱུ་ཡིན་པ་བཅས།
