ཕྱི་ལོ་ ༢༠༡༨ ཟླ་ ༦ ཚེས་ ༢༩ རེས་གཟའ་པ་སངས།
༄༅། །ཕྱི་ལོ་ ༢༠༡༨ ཟླ་ ༦ ཚེས་ ༢༧ ཉིན་གྱི་ཕྱི་དྲོ་ཆུ་ཚོད་ ༤།༣༠ ཐོག་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྡ་ས་གངས་སྐྱིད་གཉའ་ཁྲི་ཚོགས་ཁང་ཝ་ར་ཎ་སིའི་ས་ར་ནཐ་ནང་རྟེན་གཞི་བྱས་པའི་ཨེ་ལི་སི་ལས་འཆར་ Alice Project school སློབ་གྲྭའི་དགེ་རྒན་དང་སློབ་ཕྲུག་བཅས་ཁྱོན་མི་གྲངས་ ༦༨ ལ་གསུང་བཤད་གནང་དོན། མི་ཚེའི་ནང་ལམ་ལྷོང་ཡོང་བར་ངེས་པར་དུ་ཆུང་དུས་དཀའ་ལས་རྒྱག་དགོས། སྤྱི་ཚོགས་ནང་དཀའ་ངལ་ཆེ་ཕྲ་ཆུང་གསུམ་གང་འདྲ་ཞིག་འཕྲད་ཀྱང་དེར་གདོང་ལེན་གྱིས་སློབ་སྦྱོང་ལ་དོ་སྣང་དང་འབད་བརྩོན་བྱེད་ན་མ་འོངས་པར་ཕན་ཐོགས་ཡོང་གི་རེད། གལ་ཏེ་དཀའ་ངལ་ལ་མ་འཛེམས་པར་བརྩོན་འགྲུས་བྱེད་ཐུབ་ན་མི་ཚེ་ལམ་ལྷོང་ལྡན་པ་ཞིག་དང་དོན་དང་ལྡན་པ་ཞིག་ཡོང་གི་རེད།
ང་ཚོ་གྲོང་གསེབ་དང་གྲོང་ཁྱེར་ཇི་འདྲ་ཞིག་ནས་ཡོང་བ་ཡིན་ནའང་ཚང་མ་མི་ཡིན་པ་གཅིག་པ་རེད། དེར་བརྟེན་ང་ཚོ་མི་ཚང་དབུལ་པོ་ཡིན་བསམས་ནས་ནམ་ཡང་བློ་ཞུམ་མི་རུང་། ང་ཚོར་མངོན་འདོད་ཡོད་པ་གཅིག་མཚུངས་ཡིན་སྟབས། མངོན་འདོད་དེ་དོན་ལ་ཁྱོལ་ཆེད་ཐོབ་ཐང་དང་གོ་སྐབས་གཅིག་མཚུངས་ཡོད། ལམ་ལྷོང་ཡོང་དང་མ་ཡོང་ཟེར་བ་དེ་གཙོ་བོ་སོ་སོའི་བསམ་བློ་གཏོང་ཕྱོགས་ལ་རག་ལུས་ཡོད། གལ་ཏེ་ང་མི་ཚང་ཉམ་ཆུང་ནས་ཡིན། ཕ་མ་སྐྱོ་པོ་ཡིན་པ་དང་ཡང་ན་གྲོང་གསེབ་ནས་ཡིན་སྟབས་ངས་གང་ཡང་འཇོན་གྱི་མ་རེད་བསམས་ནས་བློ་ཞུམ་ནས་བསྡད་ན། ཐོག་མ་ཉིད་ནས་ཕམ་ཁ་ཁུར་བར་བརྟེན་ནམ་ཡང་ལམ་ལྷོང་ཡོང་མི་ཐུབ།
དེར་བརྟེན་ཐོག་མ་ཉིད་ནས་ངས་འབྱོན། ངས་ཐུབ་བསམས་པའི་སྙིང་སྟོབས་ལྡན་དགོས། སྙིང་སྟོབས་དེ་འདྲ་ཞིག་ཡིད་ལ་བཅངས་ནས་ཉིན་ཚན་དུས་དྲུག་ཏུ་དཀའ་ལས་རྒྱག་ན་མ་སྒྲུབ་པའི་བྱ་བ་གཅིག་ཀྱང་ཕལ་ཆེར་མེད། རིམ་བཞིན་བསམ་བློ་གཏོང་སྟངས་དེ་ང་ཚོའི་མི་ཚེའི་ནང་གོམས་པ་ཡིན་ན་རང་ཉིད་ཡར་ཆེན་པོ་ཆགས་སྐབས་ལས་དོན་ཚང་མའི་ཐོག་གདེང་ཚོད་གཅིག་རང་བཞིན་གྱི་བསླེབས་རྒྱུ་རེད། དེར་བརྟེན་རང་ཉིད་ལམ་ལྷོང་ལྡན་པ་ཞིག་བཟོ་དང་མི་བཟོ་སོ་སོའི་ལག་ཏུ་ཡོད། ཅེས་གསུངས་རྗེས་སྲིད་སྐྱོང་མཆོག་གིས་རང་ཉིད་ཀྱང་རྒྱ་གར་བྱང་ཤར་ས་ཁུལ་ནས་ཁྱིམ་ཚང་ཉམ་ཆུང་ཞིག་གི་བུ་ཡིན་པ་དང་། དེ་རྗེས་རིམ་བཞིན་སློབ་སྦྱོང་ཐོག་དཀའ་ལས་བརྒྱབ་ནས་ད་ལྟ་བོད་མིའི་སྲིད་སྐྱོང་ཆགས་ཐུབ་ཡོད་སྐོར་སོགས་ཀྱི་གསུང་བཤད་གནང་།
སྤྱིར་ཨེ་ལི་སི་ལས་འཆར་ Alice Project དེ་བཞིན་ཐོག་མར་ལས་འཆར་འགན་འཛིན་ Valentino Giacomin ལགས་ཀྱིས་ཕྱི་ལོ་ ༡༩༩༤ ལོར་ཝཱ་རཱ་ཎ་སིར་དབུ་འཛུགས་གནང་ཞིང་། ཁོང་གིས་ཨི་ཊ་ལིའི་གཞུང་གི་སློབ་གྲྭ་གསུམ་ལ་ཉམས་ཞིབ་གནང་རྗེས་ལས་འཆར་འདི་དབུ་འཛུགས་གནང་འདུག ཐོག་མའི་ཆར་སློབ་ཕྲུག་ ༧༥ དང་དགེ་རྒན་བཞི་ལས་མེད། འོན་ཀྱང་ད་ཆ་ལས་འཆར་དེའི་འོག་རྒྱ་གར་ས་གནས་འདྲ་མིན་ནང་འགྲོ་བ་མིའི་ཀུན་ཁྱབ་བཟང་སྤྱོད་ཀྱི་ལྟ་གྲུབ་གཞི་རྩར་འཛིན་ནས་སློབ་ཕྲུག་སྟོང་ཕྲག་བརྒལ་བར་གནའ་དེང་ཟུང་འབྲེལ་གྱི་ཤེས་ཡོན་ལས་འགུལ་སྤེལ་མུས་ཡིན་འདུག ལྷག་པར་ཕྱི་ལོ་ ༢༠༠༡ ལོར་བྷི་ཧཱར་མངའ་སྡེའི་བྷུ་དྷ་གྷ་ཡར་སློབ་གྲྭ་གསར་པ་ཞིག་བཙུགས་ཡོད་འདུག །
