༢༠༡༨ ཟླ་ ༦ ཚེས་ ༡༩ རེས་གཟའ་མིག་དམར།
༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཨ་རིའི་ནང་ཡོད་པའི་ཀ་ནེག་ཀྲཊ་Connecticutབོད་རིགས་སྤྱི་མཐུན་ཚོགས་པས་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དང་། བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་མགྲོན་འབོད་ཞུས་ནས་འཇིགས་བྲལ་གློག་བརྙན་བཟོ་འགྲེམས་གནང་མཁན་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཀྱི་བྱས་རྗེས་ལ་རྗེས་སུ་ཡི་རངས་ཞུས་འདུག
དེ་ཡང་རེས་གཟའ་སྤེན་པའི་དགོང་མོ་དཔལ་རྒྱལ་བ་ཀརྨ་པ་རིན་པོ་ཆེ་མཆོག་ཚོགས་ཁང་དུ་ཕེབས་འབྱོར་མཚམས་བྱང་ཨ་རི་སྐུ་ཚབ་དོན་གཅོད་ངོ་ལས་དང་། ཆབ་སྲིད་བཙོན་ཟུར་དོན་གྲུབ་དབང་ཆེན་ལགས། ས་གནས་བོད་རིགས་སེར་སྐྱ་མང་ཚོགས་ནས་སྲོལ་རྒྱུན་གྱི་ལམ་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཤིང་། བོད་རྒྱལ་ཁབ་ཆེན་པོའི་རྒྱལ་གླུ་ཕུལ་བ་དང་འབྲེལ་མཛད་སྒོ་དབུ་འཛུགས་གནང་།
ས་གནས་སྤྱི་མཐུན་ཚོགས་པའི་ཚོགས་གཙོ་བསོད་ནམས་ཚེ་རིང་ལགས་ཀྱིས། བོད་མི་གཞོན་སྐྱེས་ཚོ་མ་འོངས་བོད་ཀྱི་བདག་པོ་ཡིན་པར་བརྟེན། ཀ་ནེག་ཀྲཊ་སུ་ཡོད་པའི་བྱིས་པ་དང་། གཞོན་སྐྱེས་མི་རབས་ཚོའི་རྒྱུད་ལ་བོད་ཀྱི་ཐུན་མོང་མ་ཡིན་པའི་ཆོས་དང་། རིག་གཞུང་གི་བག་ཆགས་འཇོག་ཐུབ་ཆེད་སྤྱི་མཐུན་ཚོགས་པ་དང་། ཕ་མ། ས་གནས་མང་ཚོགས་བཅས་ནས་འབད་བརྩོན་གང་ཡོང་ཞུ་བཞིན་ཡོད་པ་སོགས་ས་གནས་ཀྱི་གནས་སྟངས་དང་ལས་བསྡོམས་སྙིང་བསྡུས་ངོ་སྤྲོད་ཞུས་པ་མ་ཟད། འདི་ལོ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལུགས་དགུང་ཀེག་སྔ་བསུའི་དུས་ཚོད་ཡིན་པར་བརྟེན། དཔལ་རྒྱལ་བ་ཀརྨ་པ་རིན་པོ་མཆོག་གིས་དབུས་རིས་མེད་ཆོས་བརྒྱུད་ཁག་གི་བླ་སྤྲུལ་དགེ་བཤེས་རྣམ་པས་༸གོང་ས་༸སྐྱབས་མགོན་ཆེན་པོ་མཆོག་སྔོན་གྱི་ཐུགས་སྐྱེད་དམ་བཅའ་ལྟར་༸སྐུ་ཚེ་༸ཞབས་པད་ཡུན་རིང་བརྟན་ཞིང་། རླབས་ཆེན་ཐུགས་ཀྱི་བཞེད་དགོངས་མཐའ་དག་འགེགས་མེད་ལྷུན་གྱིས་འགྲུབ་པའི་ཐུགས་སྨོན་སྐྱབས་འཇུག་གནང་སྐྱོང་ཡོང་བ་གདུང་ཤུགས་དྲག་པོས་གསོལ་འདེབས་ཞུས།
དེ་རྗེས་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཀྱིས་གསུང་བཤད་གནང་སྐབས། འཇིགས་བྲལ་གློག་བརྙན་བཟོ་དགོས་པའི་ཐོག་མའི་དམིགས་ཡུལ་དང་། དེའི་རྐྱེན་གྱིས་བཙོན་ཁང་དུ་ལོ་དྲུག་བཞུགས་དགོས་བྱུང་བའི་གནས་སྟངས། དེ་རྗེས་བཙོན་གྲོལ་ཐོབ་རྗེས་དམ་བསྒྲགས་སུན་གཙེར་འོག་དཀའ་སྡུག་ཇི་ཙམ་མྱངས་པའི་བརྒྱུད་རིམ་དངོས་རྣམས་མང་ཚོགས་ལ་ངོ་སྤྲོད་གནང་། སྐབས་དེར་བྱང་ཨ་རི་སྐུ་ཚབ་དོན་གཅོད་ཀྱིས་གསུང་བཤད་གནང་སྐབས། རིང་མིན་ཟླ་བ་འདིའི་ནང་སྒྲུབ་བརྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དགུང་གྲངས་ ༣༣ ལ་ཕེབས་པའི་འཁྲུངས་སྐར་འཁེལ་བར་བཀྲ་ཤིས་བདེ་ལེགས་ཀྱི་འཚམས་འདྲི་ཞུས་པ་དང་སྦྲགས། བོད་མི་ཚང་མས་ནང་ཁུལ་དམ་ཚིག་ཟོང་ཁ་ཆིག་སྒྲིལ་དགོས་གལ་སྐོར་དང་། ན་གཞོན་ལོ་ཆུང་ཚོ་དང་ཕ་མ་ཚོས་མཉམ་རུབ་ཐོག་ནས་བོད་ཀྱི་ཐུན་མིན་སྐད་དང་ཡི་གེར་དོ་སྣང་མི་ལྷོད་པ་གནང་དགོས་རྒྱུ་དང་།
ལྷག་པར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས་ཀྱི་བཀའ་དྲིན་དྲན་དགོས་པའི་སྐོར་གསུང་པ་མ་ཟད། ཀ་ནེག་ཀྲཊ་བོད་རིགས་སྤྱི་མཐུན་ཚོགས་པས་རྒྱལ་གཅེས་པ་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཀྱི་ཆེད་དུ་ས་གནས་སུ་མགྲོན་འབོད་གནང་ནས་ཁོང་གི་བྱས་རྗེས་ལ་ཆེ་བསྟོད་གནང་བ་དེ་ནི་ཧ་ཅང་འོས་ཤིང་འཚམ་པ་ཞིག་ཡིན་སྐོར་དང་། ཐེངས་འདིར་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དབུ་བཞུགས་ཐོག་ཆེ་བསྟོད་ཀྱི་མཛད་སྒོ་གོ་སྒྲིག་གནང་ཐུབ་པ་དེ་ཧ་ཅང་ཡག་པོ་བྱུང་འདུག་སྐོར་ལེགས་གསོ་བསྔགས་བརྗོད་གནང་།
དེ་རྗེས་ས་གནས་སྤྱི་མཐུན་ཚོགས་པའི་ཚོགས་གཙོ་བསོད་ནམས་ཚེ་རིང་ལགས་ཀྱིས། ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཀྱིས་བོད་མིའི་མངོན་འདོད་མཚོན་པར་བྱེད་པའི་གློག་བརྙན་ ༼འཇིགས་བྲལ།༽ བཟོས་པ་དེས་རྒྱལ་སྤྱིའི་ཁྱོན་དུ་དྲིལ་བསྒྲགས་ཤུགས་ཆེ་བྱུང་བར་བརྟེན་རྒྱ་ནག་གཞུང་གིས་ཕྱི་ལོ་ ༢༠༠༨ ཟླ་ ༣ ཚེས་ ༢༦ ཉིན་དོན་གྲུབ་དབང་ཆེན་ལགས་མཚོ་སྔོན་ནས་འཛིན་བཟུང་བྱས་ཏེ་ལོ་དྲུག་བཙོན་འཇུག་བྱས་ཤིང་། བཙོན་ཁང་དུ་བཞུགས་རིང་དཀའ་སྡུག་སྣ་ཚོགས་མྱངས་དགོས་བྱུང་ཡོད་པ་མ་ཟད། བཙོན་ནས་གློད་བཀྲོལ་ཐོབ་རྗེས་སུའང་རྒྱ་ནག་གཞུང་གིས་ཁོང་ལ་དམ་བསྒྲགས་སུན་གཙེར་མུ་མཐུད་བཟོས་ཀྱང་། ཁོང་གིས་འཇིགས་ཞུམ་སྤུ་ཙམ་མེད་པའི་སྙིང་སྟོབས་དང་། འགྱུར་བ་མེད་པའི་ལྷག་བསམ་རྒྱུན་སྐྱོང་གནང་བར་ཡི་རངས་བསྔགས་བརྗོད་དང་ཆེ་བསྟོད་ཞུ་ཆེད་ཐེངས་འདིར་ཀ་ནེག་ཀྲཊ་ས་ཁུལ་གྱི་བོད་རིགས་ཡོངས་ནས་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དང་། བྱང་ཨ་རི་སྐུ་ཚབ་དོན་གཅོད་དབུ་བཞུགས་ཀྱི་འདུ་འཛོམས་སྒོའི་ཐོག་དོན་གྲུབ་དབང་ཆེན་ལགས་ལ་ཆེ་བསྟོད་ཀྱི་གཟེངས་རྟགས་ཕུལ་སྐོར་ངོ་སྤྲོད་གནང་གྲུབ་མཚམས། དཔལ་རྒྱལ་བ་ཀརྨ་པ་རིན་པོ་ཆེ་མཆོག་གི་ཕྱག་ནས་དོན་གྲུབ་དབང་ཆེན་ལགས་སུ་ཆེ་བསྟོད་ཀྱི་གཟེངས་རྟགས་ཕུལ།
དོན་གྲུབ་དབང་ཆེན་ལགས།
དེ་ཡང་ཀ་ནེག་ཀྲཊ་བོད་རིགས་སྤྱི་མཐུན་ཚོགས་པས་ཇི་ལྟར་གསོལ་འདེབས་ཞུས་པ་བཞིན། དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་སྐབས་དེར་འཇམ་དཔལ་དབྱངས་ཀྱི་རྗེས་གནང་གནང་གྲུབ་བསྟུན་གསུང་བཤད་གནང་བའི་སྙིང་པོར། དོན་གྲུབ་དབང་ཆེན་ལགས་ཀྱི་འཇིགས་བྲལ་གློག་བརྙན་སྐོར་དང་། ན་ནིང་ཁོང་ཨ་རི་རང་དབང་ལུང་པར་ནང་མི་མཉམ་འཛོམས་བྱུང་སྐོར་དེ་སྔ་ནས་གསན་ཡོད་ཅིང་། དེ་རིང་ཁོང་ལ་ཆེ་བསྟོད་ཞུ་རྒྱུའི་མཛད་སྒོར་དངོས་སུ་ཁོང་ཐུབ་པར་ཧ་ཅང་ཐུགས་མཉེས་པོ་བྱུང་སྐོར་གསུང་པ་དང་ཆབས་ཅིག བོད་མི་ཚང་མས་བོད་ཀྱི་སྐད་དང་ཡི་གེར་ངེས་པར་དུ་དོ་སྣང་བྱེད་དགོས་པ་དང་། དཀའ་ངལ་ཇི་འདྲ་ཞིག་འཕྲད་མིན་ལ་མ་ལྟོས་པར་བོད་མི་ནང་ཁུལ་ཆིག་སྒྲིལ་དགོས་པ་ནི་གལ་ཆེའི་ནང་གི་དོན་ཆེར་རྩི་དགོས་སྐོར་དང་། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་ནས་དུས་སུ་བཀའ་སློབ་ལམ་སྟོན་སྩལ་བ་རྣམས་བོད་མི་ཚང་མས་རང་གི་སྙིང་ལ་བཅངས་ནས་དོན་དངོས་མི་ཚེའི་འཚོ་བའི་ཁྲོད་ལག་བསྟར་དོན་འཁྱོལ་ཡོང་ཐབས་གནང་དགོས་སྐོར་གསུངས།
དེ་རྗེས་ཀ་ནེག་ཀྲཊ་བོད་རིགས་སྤྱི་མཐུན་ཚོགས་པའི་རིག་གཞུང་སློབ་གྲྭའི་སློབ་ཕྲུག་ཡོངས་ནས་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དང་། སྐུ་མགྲོན་ཡོངས་ལ། “ཀརྨ་པ་ཆེན་པོའི་འཁྲུངས་རབས་དད་པའི་གསོས་སྨན་” ཞེས་པའི་བསྟོད་གླུ་དང་། སྲོལ་རྒྱུན་འཁྲབ་གཞས་གཟིགས་འབུལ་ཞུས་ཤིང་། དགོང་དྲོ་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་དབུས་ཕྱི་ནང་གི་སྐུ་མགྲོན་ཡོངས་ལ་ཐུགས་རྗེ་ཆེ་ཞུའི་གསོལ་ཚིགས་ཤིག་ཀྱང་འདེགས་འབུལ་ཞུས་པ་བཅས། །
