ཕྱི་ལོ་ ༢༠༡༨ ཟླ་ ༦ ཚེས་ ༢༦ རེས་གཟའ་མིག་དམར།

༄༅། །ཕྱི་ལོ་ ༢༠༡༨ ཟླ་ ༦ ཚེས་ ༡༩ ཉིན་སྦེལ་ཇམ་གྱི་རྒྱལ་ས་སྦར་སེལ་ནང་སྦར་སེལ་སྐུ་ཚབ་དོན་ཁང་ནས་པར་སྐྲུན་གནང་བའི་བོད་ཀྱི་རྒྱལ་དར་སྒྲེང་འཛུགས་གནང་བར་ཡུ་རོབ་ལ་ཐུགས་རྗེ་ཆེ་ཞུ་ “Thank You Europe – For Hoisting the Tibetan Flag” ཞེས་པའི་པར་རིས་ཅན་གྱི་དཔེ་དེབ་དབུ་འབྱེད་གནང་ཡོད།

དེ་ཡང་ཤོག་གྲངས་ ༡༠༤ ཡོད་པའི་པར་རིས་ཅན་གྱི་དཔེ་དེབ་འདི་ཉིད་འདོན་སྤེལ་གནང་དགོས་དོན་ནི། ཡུ་རོབ་ཁུལ་གྱི་གྲོང་སྡེ་དང་གྲོང་ཁྱེར་ ༢༠༠༠ ཙམ་གྱི་ནང་མི་སྒེར་དང་། ཚོགས་སྡེ། གྲོང་སྡེ་ལས་ཁུངས་སོགས་ནས་བོད་དོན་ལ་གདུང་སེམས་མཉམ་སྐྱེ་མཚོན་སླད་བོད་ཀྱི་རྒྱལ་དར་སྒྲེང་འཛུགས་ཞུས་པ་མ་ཟད། རྒྱ་ནག་གིས་དབང་སྒྱུར་རྐྱེན་པས་བོད་ནང་རྒྱལ་དར་སྒྲེང་འཛུགས་ཞུ་རྒྱུར་བཀག་སྡོམ་བྱས་ཡོད་ནའང་གོང་ཞུས་རང་དབང་ལུང་པའི་ནང་ས་གནས་སོ་སོའི་ལས་ཟུར་རྣམ་པའི་སྣེ་ཁྲིད་འོག་འདས་པའི་ལོ་བཅུ་ཕྲག་གསུམ་ལྷག་ནས་བཟུང་བོད་ཀྱི་རྒྱལ་དར་ལ་བརྩི་འཁུར་གྱིས་སྒྲེང་འཛུགས་ཞུས་བར་བཀའ་དྲིན་རྗེས་དྲན་ཞུ་སླད་ཡིན་འདུག

དཔེ་དེབ་དེའི་ནང་བོད་ཀྱི་རྒྱལ་དར་སྒྲེང་འཛུགས་ཞུས་པའི་ཡུ་རོབ་གྲོང་སྡེ་སོ་སོའི་པར་རིས་ས་ཁྲ་དང་བཅས་པ་ཨང་རྟགས་བརྒྱབ་ནས་འབུར་བཏོན་བྱས་ཡོད་འདུག
དཔེ་དེབ་ཀྱི་ནང་དོན་ལེའུ་ཞིག་ལ་རྒྱ་ནག་གཞུང་ནས་བོད་ནང་བོད་ཀྱི་རྒྱལ་དར་བཀག་སྡོམ་བྱས་པ་མ་ཟད། རྒྱལ་དེར་སྒྲེང་འཛུགས་ཀྱི་ལས་འགུལ་སྤེལ་མཁན་བོད་མི་མང་པོ་འཇིན་བཟུང་གིས་སྡུག་སྦྱོང་མནར་གཅོད་ཤུགས་ཆེ་བཏང་ཡོད་སྐོར་གསལ་བཏོན་གནང་ཡོད་པ་བཅས།།