ཕྱི་ལ་ ༢༠༡༨ ཟླ་ ༦ ཚེས་ ༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༨ ཟླ་ ༦ ཚེས་ ༦ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་གངས་སྐྱིད་ཐང་སྟེང་ཁང་རྩེག་གསར་པའི་རྩེ་ཐོག་ཚོགས་ཁང་དུ་དཔལ་ལྡན་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གི་མདུན་དུ་འདེམས་ཐོན་བྱུང་བའི་རྩིས་ཞིབ་སྤྱི་ཁྱབ་པ་ཨརྱ་པདྨ་དགྲ་འདུལ་ལགས་ཀྱི་ལས་ཁུར་དམ་འབུལ་གྱི་མཛད་སྒོ་ཞིག་ཚོགས་ཡོད།
དེ་ཡང་སྔ་དྲོ་ཆུ་ཚོད་ ༩།༢༥ ཐོག་ཁྲིམས་ཞིབ་པ་ཆེ་བ་མཆོག་དང་། ཁྲིམས་ཞིབ་པ་གཞན་རྣམ་གཉིས་མཆོག སྲིད་སྐྱོང་མཆོག སྤྱི་འཐུས་ཚོགས་གཞོན་མཆོག བཀའ་བློན་རྣམ་པ། རང་དབང་ཅན་གྱི་སྡེ་ཚན་ཁག་གི་ཚོགས་གཙོ་དང་ཚོགས་མི། སྤྱི་འཐུས་རྒྱུན་ལས། ལས་ཁུངས་ཁག་གི་དྲུང་ཆེ། འདེམས་ཐོན་བྱུང་བའི་རྩིས་ཞིབ་སྤྱི་ཁྱབ་པ་བཅས་ཚང་འཛོམས་ཀྱིས་ཐོག་མར་གནས་ཆུང་སྒྲ་དབྱངས་གླིང་གི་དགེ་འདུན་བཞི་གྲས་ཤིས་བརྗོད་གསུང་འདོན་གནང་།
དེ་ནས་དཔལ་ལྡན་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་གྲུབ་མཚམས་འདེམས་ཐོན་བྱུང་བའི་སྤྱི་ཁྱབ་པ་ཨརྱ་པདྨ་དགྲ་འདུལ་ལགས་ཀྱིས་རིམ་བཞིན་རྟེན་གསུམ་འདེགས་འབུལ་ཞུས་ཏེ་དཔལ་ལྡན་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གི་མདུན་དུ་ལས་ཁུར་དམ་འབུལ་ཞུས་མཚམས། དམ་འབུལ་མ་དེབ་ཏུ་མཚན་རྟགས་བཀོད་ཡོད།
དེ་རྗེས་སྐུ་མགྲོན་རྣམ་པར་གྲོ་སོ་ཕྱེ་མར་དང་ཆང་ཕུད་འདེགས་འབུལ་གྱིས་རྟེན་འབྱུང་གསོལ་ཇ་འབྲས་སིལ་འདེགས་འབུལ་ཞུ་བ་དང་སྦྲགས། མཛད་གཙོ་རྣམ་པས་རིམ་བཞིན་རྩིས་ཞིབ་སྤྱི་ཁྱབ་པ་ཨརྱ་པདྨ་དགྲ་འདུལ་ལགས་སུ་རྟེན་འབྱུང་མགུལ་དར་བསྒྲོན་ཏེ་དམ་འབུལ་མཛད་སྒོ་གྲོལ། །
