༢༠༡༨ ཟླ་ ༥ ཚེས་ ༡ རེས་གཟའ་མིག་དམར།
༄༅། །ཕྱི་ལོ་ ༢༠༡༨ ཟླ་ ༤ ཚེས་ ༢༧ ནས་ ༢༨ བར་བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་ཚན་པས་ཨ་རིའི་མི་ནི་སོ་ཊ་ Minnesota མངའ་སྡེའི་རྒྱལ་ས་མིན་ཡ་ན་པོ་ལི་སི་ Minneapolis ས་གནས་བོད་རིགས་རྣམས་ལ་པར་རིས་འགྲེམས་སྟོན་གནང་འདུག འགྲེམས་སྟོན་གྱི་བརྗོད་གཞི་ནི་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་དང་མཛད་རྗེས། དེ་བཞིན་ཕ་ཡུལ་ཕྱོགས་སུ་རྒྱང་བལྟ་བྱས་པ། ཞེས་ཉེ་རབས་བོད་ཀྱི་ལོ་རྒྱུས་སྐོར་ཡིན་འདུག
དེ་ཡང་ཕྱི་དྲིལ་འགྲེམས་སྟོན་ཚན་པས་བཞུགས་སྒར་དྷ་རྨ་ཤཱ་ལའི་གངས་ཅན་སྐྱིད་གཤོང་དུ་འགྲེམས་སྟོན་རྒྱ་སྐྱེད་ཀྱི་ལས་གཞིར་དམིགས་ནས་ཐེངས་འདིར་དཔལ་འབྱོར་འདུ་འགོད་ཆེད་ཁེ་ན་ཌ་དང་ཨ་རིའི་གྲོང་ཁྱེར་ཁག་གཅིག་ནང་བོད་དོན་པར་རིས་སྐོར་སྐྱོད་འགྲེམས་སྟོན་གནང་བཞིན་ཡོད་པ་དང་། ད་བར་སྐོར་སྐྱོད་ཟིན་པའི་ས་ཁུལ་ཁག་ནང་ས་གནས་བོད་མིའི་ཁྲོད་ལོ་ན་རྒན་པ་དང་གཟའ་མཇུག་སློབ་གྲྭར་སྐྱོད་བཞིན་པའི་སློབ་ཕྲུག་སོགས་ཀྱིས་གཙོས་བོད་ཀྱི་གྲོགས་པོ་དང་བོད་དོན་རྒྱབ་སྐྱོར་བ་བརྒྱ་ཕྲག་བརྒལ་བས་དོ་སྣང་ཧ་ཅང་གནང་དང་གནང་མུས་ཡིན་འདུག
སྐབས་དེར་བོད་དོན་དངོས་བྱུང་གི་གློག་བརྙན་ ‘Out of this world: A journey into Forbidden Tibet’,ཞེས་པ་བསྟན་འདུག གློག་བརྙན་དེ་ནི་ཕྱི་ལོ་ ༡༩༤༩ ལོར་ཨ་རིའི་གསར་འགོད་པ་དང་རླུང་འཕྲིན་ལས་རིམ་རྒྱང་བསྲིང་བ་སྐུ་ཞབས་ལོ་ཝེལ་ཐོ་མ་སི་Lowell Thomasལགས་དང་ཁོང་གི་བུ་གཉིས་བོད་དུ་སྐྱོད་སྐབས་ས་གནས་སུ་མཐོང་ཐོས་མྱོང་གསུམ་གྱི་གནས་ཚུལ་ཕྱོགས་སྒྲིག་གནང་བའི་དངོས་བྱུང་གློག་བརྙན་ཞིག་ཡིན་འདུག གློག་བརྙན་དེར་བྱང་ཨ་རིའི་མངའ་ཁུལ་དུ་བོད་རིགས་མང་ཤོས་ཡོད་པའི་ས་གནས་མང་ཚོགས་རྣམས་ཀྱིས་དགའ་མོས་ཧ་ཅང་བྱས་འདུག
སྤྱིར་འགྲེམས་སྟོན་དེ་ནི་མི་ནི་སོ་ཊ་ས་གནས་བོད་རིགས་ཐེབས་རྩ་ཁང་དང་ཨ་རི་སྐུ་ཚབ་དོན་ཁང་གཉིས་ཀྱིས་མཐུན་འགྱུར་གོ་སྒྲིག་གནང་བ་ཞིག་ཡིན་འདུག་པ་བཅས།།
