ཕྱི་ལོ་ ༢༠༡༨ ཟླ་ ༥ ཚེས་ ༩ རེས་གཟའ་ལྷག་པ།
༄༅། །འདི་གར་ནང་སྲིད་ལས་ཁུངས་ནས་བཏང་གནས་ནང་འཁོད་དོན། དེ་ཡང་འདོད་རྒུ་གཡུལ་རྒྱལ་གླིང་ས་གནས་འགོ་འཛིན་ལས་ཁུངས་ནས་སེ་ལ་ཀུལ་བོད་ཁྱིམ་ལས་རིགས་སློབ་གཉེར་ཁང་གི་འགན་འཛིན་བཀྲ་ཤིས་ཟླ་བ་ལགས་སུ་ཇི་ལྟར་འབོད་སྐུལ་ཞུས་པ་བཞིན།
ཕྱི་ལོ ༢༠༡༨ ཟླ་ ༥ ཚེས་ ༥ ཉིིན་ལས་རིགས་སློབ་གཉེར་ཁང་གི་ཕུར་མཉེ་ཚན་པའི་སློབ་ཕྲུག་དང་། དགེ་རྒན་གཅིག་བཅས་ཀྱིས་འདོད་རྒུ་གཡུལ་རྒྱལ་གླིང་ས་གནས་ཀྱི་དང་ཟུར་རྒས་གསོ་ཁང་གི་རྒས་ཁོག་རྣམས་ཀྱི་ཕྱག་ཞབས་གཉིས་ཀྱི་སེན་མོ་གཏུབས་ཏེ་གཙང་བཟོ་བྱས་པ་དང་། ལྷག་པར་དུ་རྒས་ཁོག་ཕྱག་ཞབས་ནད་པ་དང་། རྒལ་རྒྱབ། ཞོག་སྟོད་སོགས་རུས་ཚིགས་ནད་པ་རྣམས་ལ་དེང་དུས་ཀྱི་དར་ཁྱབ་ཆེ་བའི་ SPA ལུགས་ལྟར་ཕུར་མཉེ་བཏང་སྟེ་ཞབས་འདེགས་བསྒྲུབས་ཡོད།
སྐབས་དེར་སློབ་ཕྲུག་ན་གཞོན་ཚོས་གཙང་བཙོག་མེད་པར་རྒས་ཁོག་ཚོར་སྲི་ཞུ་བསྒྲུབས་པར་བརྟེན་རྒས་ཁོག་ཚོའི་དགའ་ཚོར་དང་བཅས་བསྔགས་བརྗོད་གནང་ཡོད།
དེ་གའི་ས་གནས་འགོ་འཛིན་ཚེ་དབང་ཕུན་ཚོགས་ལགས་ཀྱིས་ལས་རིགས་སློབ་ཁང་གི་འགན་འཛིན་བཀྲ་ཤིས་ཟླ་བ་ལགས་སུ་མུ་མཐུད་ཟླ་རེའི་མཚམས་སུ་དེ་ལྟར་གནང་ཐུབ་ན་ཕན་ཐོགས་ཆེན་པོ་ཡོང་ངེས་ཀྱི་འབོད་སྐུལ་ཞུས་དོན་ལྟར་ཞལ་བཞེས་གནང་ཡོད་པ་བཅས།
